Apɔsul Dɛn Wok 4

Dɛn Put Pita ɛn Jɔn na Jel

1Wɛn Pita ɛn Jɔn bin de tɔk to di pipul dɛn, dɛn man we de mek sakrifays fɔ pipul sin wit di bigman fɔ dɛn wan we bin de gyad Gɔd in Os, ɛn dɛn Sadyusi, kam mit dɛn. 2Dɛn pipul ya bin vɛks bad bad bikɔs Pita ɛn Jɔn bin de tɛl di pipul dɛn se we pɔsin day, i go rayz bak. Dɛn tɛl di pipul dɛn se Jizɔs bin rayz frɔm di grev, so wɛn ɛnibɔdi day, di pɔsin go rayz frɔm in grev. 3Dɛn ol Pita ɛn Jɔn, bɔt we ivintɛm bin dɔn kam, dɛn go kip dɛn na jel sote do klin. 4Plɛnti pipul we yɛri wetin Pita ɛn Jɔn bin de tɔk biliv wetin dɛn yɛri, ɛn ɔl di man dɛn bin rich bɔt fayv tawzin.

Dɛn Kɛr Pita ɛn Jɔn Go Kot

5Di ɔda de, ɔl dɛn bigman we de rul na di kɔntri wit ɔl di ɔda bigman dɛn, ɛn dɛn Ju Lɔ ticha go mit na wan ples na Jerusɛlɛm. 6Dɛn mit Anas we na bin di edman pan dɛn man we de mek sakrifays fɔ pipul sin, ɛn Kaye fas, wit Jɔn, Alɛgzanda, ɛn di ɔda man dɛn we fambul to Anas. 7Dɛn pul Pita ɛn Jɔn kɔmɔt na jel, kɛr dɛn go bifo ɔl di man dɛn we bin dɔn gɛda de. Di man dɛn aks Pita ɛn Jɔn se, “Usay una gɛt di pawa fɔ mek dis man ya waka? Udat gi una?”

8Gɔd in Spirit bin de pan Pita, so Pita tɛl dɛn se, “Una we de rul ɛn una dɛn bigman we de na ya! 9Una briŋ wi kam na ya tide ɛn aks wi bɔt di gud we wi du fɔ da man we nɔ bin ebul waka ɛn udat in pawa wi tek mɛn am; 10wɛl, a gladi fɔ tɛl una ɛn ɔl di pipul dɛn na Izrɛl se una bin kil Jizɔs we kɔmɔt Nazarɛt ɛn una nel am na di krɔs, bɔt Gɔd mek i rayz frɔm di grev. Nain pawa mek dis man ya we nɔ bin ebul waka, wɛl gud fashin. 11Na bɔt Jizɔs, Gɔd bin tɔk se,

‘Da ston we una we de bil bin se nɔ bɛtɛ,

nain dɔn kam bi di ston we bɛtɛ pas ɔl di ɔda ston dɛn na di os.’

12Nɔbɔdi nɔ de na wɔl we ebul sev pɔsin; na Jizɔs nɔmɔ ebul sev pɔsin.”

13Di bigman dɛn na di Ju gran kot si se Pita ɛn Jɔn nɔ bin sabi rid ɛn rayt, ɛn dɛn na bin ɔdinari pipul, bɔt dɛn nɔ bin de fred fɔ tɔk. Na dat mek dɛn wɔnda; ɛn dɛn kam gɛt fɔ no se dɛn bin de wit Jizɔs. 14Di bigman dɛn nɔ bin ebul fɔ tɔk bad bɔt Pita ɛn Jɔn bikɔs di man we dɛn mɛn bin tinap klos dɛn. 15Di bigman dɛn na di Ju gran kot bin want ɛŋ ed so dɛn tɛl Pita ɛn Jɔn fɔ go na do. 16Dɛn aks dɛn kɔmpin se, “Wetin wi fɔ du wit Pita ɛn Jɔn? Ɔlman na Jerusɛlɛm dɔn si se na dɛn dɔn mɛn da man we nɔ bin ebul waka; nɔto kɔna dis tin bi ɛn wi nɔ go se na lay. 17Wɛl, fɔ mek dis kayn nyuz nɔ prɛd, una lɛ wi kɔl dɛn ɛn wɔn dɛn traŋa wan mek dɛn nɔ tɛl nɔbɔdi igen bɔt Jizɔs.”

18So dɛn kɔl Pita ɛn Jɔn kam insay di ples bak. Dɛn wɔn dɛn traŋa wan se dɛn nɔ fɔ tɔk to ɛnibɔdi bɔt Jizɔs igen ɛn dɛn nɔ fɔ tich ɛnibɔdi bɔt Jizɔs in wok. 19Pita ɛn Jɔn aks dɛn se, “Una tɛl wi, wetin na di rayt tin we Gɔd want: wi fɔ gri fɔ du wetin mɔtalman want ɔ wi fɔ du wetin Gɔd want? 20Wi nɔ go ebul sɛt mɔt ɛn nɔ tɔk bɔt wetin wi dɔn si ɛn yɛri.” 21Di bigman dɛn na di Ju gran kot wɔn dɛn traŋa wan bak ɛn lɛf dɛn fɔ go. Dɛn nɔ du dɛn natin, bikɔs ɔl di pipul dɛn we bin lib de bin de tɛl Gɔd tɛnki fɔ wetin bin jɛs bi. 22Di man we Gɔd mɛn bin dɔn olpas fɔti ia.

Di Kristiɛn dɛn Pre Fɔ Mek Pita ɛn Jɔn Nɔ Fred

23Wɛn dɛn fri Pita ɛn Jɔn, dɛn go mit di ɔda Kristiɛn dɛn ɛn tɛl dɛn wetin bi to dɛn ɛn wetin di bigman dɛn we de mek sakrifays fɔ pipul sin ɛn ɔl di ɔda bigman dɛn tɛl dɛn. 24Wɛn di Kristiɛn dɛn yɛri wetin Pita ɛn Jɔn tɔk, dɛn ɔl pre to Gɔd se, “Yu we na Masta, na yu mek ɔl dis wɔl ɛn ɔltin we lib de. 25Na yu Spirit tɛl yu savant Devid we na wan pan wi grampapa papa dɛn se,

‘Wetin mek dɛn neshɔn we nɔto Ju de vɛks bad wan?

Wetin du dɛn mekɔp fɔ du wetin di Masta nɔ want ɛn dɛn nɔ go ebul du am?

26Dɛn pipul we de rul na dis wɔl want fɔ fɛt Gɔd we na di Masta

ɛn di pɔsin we Gɔd dɔn pik, dat na di Mɛsaya.’

27Fɔ tru, Ɛrɔd ɛn Pɔnchɔs Paylet ɛŋ ed na Jerusɛlɛm wit dɛn Roman pipul ɛn dɛn pipul na Izrɛl fɔ bagin fɔ du Jizɔs bad. Dis Jizɔs ya gi insɛf fɔ wok fɔ yu ɛn nain yu dɔn mek bi di Mɛsaya. 28Dɛn bigman bin gɛda fɔ du ɔltin we yu bin dɔn mekɔp se fɔ bi. Na dat yu bin ebul du bikɔs yu gɛt pawa ɛn na dat yu bin want mek bi. 29So, Masta, yu dɔn yɛri ɔl wetin dɛn bigman na di Ju gran kot tɛl wi, bɔt wi de beg yu fɔ ɛp wi we na yu savant dɛn lɛ wi nɔ fred fɔ tɔk yu mɛsej. 30Sho yu pawa ɛn mɛn dɛn sik pipul. Gi wi pawa so dat wi go du plɛnti wɔndaful wok wɛn wi kɔl yu Savant Jizɔs, we nɔ gɛt sin, in nem.”

31Wɛn dɛn dɔn pre dɔn, di ples we dɛn bin de, shek. Gɔd in Spirit kam pan dɛn ɛn dat mek dɛn nɔ fred fɔ tɔk Gɔd in mɛsej.

Dɛn Ɔl de Sheb Wetin dɛn Gɛt

32Ɔl dɛn wan we bin biliv Jizɔs bin gɛt wanwɔd ɛn wan at. Nɔbɔdi nɔ bin de se, “Na mi wangren gɛt mi prɔpati”, bɔt ɔlman bin de sheb wetin i gɛt wit di ɔda pipul dɛn. 33Di apɔsul dɛn bin de sho se Gɔd in pawa de wit dɛn wɛn dɛn de tɛl ɔda pipul se Jizɔs bin rayz frɔm di grev. Gɔd bin de blɛs dɛn ɔl. 34Dɛn nɔn nɔ bin de krach ed fɔ ɛnitin. Wɛn ɛni wan pan dɛn sɛl in prɔpati, i kin briŋ di kɔpɔ kam 35gi di apɔsul dɛn fɔ sheb am. Di apɔsul dɛn sheb di kɔpɔ gi di pipul dɛn we bin biliv pan Jizɔs ɛn ɔlman gɛt wetindu fɔ am.

36Na so Josɛf, da Livayt we kɔmɔt Sayprɔs, bin du. Di apɔsul dɛn bin de kɔl am Banabas, dat min “Pɔsin we de kɔrej ɔda pipul”. 37I sɛl in grɔn ɛn briŋ am gi di apɔsul dɛn.

Currently Selected:

Apɔsul Dɛn Wok 4: KRIO13

Highlight

Copy