Luka 17
17
Hakɛ
(Matiyu 18.6-7, 21-22; Maraka 9.42)
1Yisa ya a fɔ ala karan-dannu ye ko, “Koe minnu si mɔgɛnu nabui hakɛ rɔ, fɔ wonu ni ma. Kɔnɔ min si a ma, a ni bui, gbalo ye wo tigi kuma! 2Yanni a ni denni nɛ kɛ kelen nabui hakɛ rɔ, a fisa wo mɔgɛ ye, kuru-belebele-wɛ ni kiri a kan la ka a lakɛ kɔgɔ-yi dumɛ rɔ. 3#Matiyu 18.15 Wo ni a ma wo fɛrɛma!
“Ni i na-kelen-nyɔgɛ ya hakɛ kɛ i la, ta a makuma. A wa i madiya, a makoto. 4Ni a ya hakɛ kɛ i la kinyama wɔrɔnfila tele kelan kɔrɔ, a ni na i wara wo bɛɛ rɔ ko, ‘I yandi, n makoto,’ nba, i ni a makoto.”
Dɛnkɛninyɛ Wara-Koe
5Yisala kilayɛnu ya a fɔ Mari ye ko, “Mala dɛnkɛninyɛ kuma sa.”
6Mari ya anu yabi ko, “Ni wola dɛnkɛninyɛ koloyara ka ke foni-kole#17.6 Foni-kole: Min sɛbɛnɛ yan Kiriki-kan rɔ, wo le masitadi (mustard) kole la. Ma ma kole wo lɔn min kɛ, ma ya mala kolo-dɔgɔyanɛ sigi doi wo gbɛ rɔ. rɔ, wo si a fɔ toro-kuri kɛ ye ko, ‘I nyɛrɛ wurun dugi rɔ ka ta i sɔ tungban tɛma!’ A si ila kumɛ bira.
Wɔli-Kɛlɛ si min Ma
7“Ni wɔli-kɛlɛ ye wole do bolo min bi sɛnɛ sala, ni wo ma, a ye sagɛnu fɛ-birala, a wa na tumɛ min ka bɔ sɛnɛ rɔ, i ti a fɔ a ye ko a ni a mayigi fen dɔn tinɛ. 8I si a fɔ a ye ko, ‘Ta, nta kima rabɛn fɔlɔn ka wo sigi n kɔrɔ. Wo kɔma, a ni na to a dɔnna.’ 9Mɔgɔ ti baraka bira wɔli-kɛlɛ wo ye bawo i ya a sɔ min na, a ara wo le ma. 10A ye wo nya na le wole fanan bolo. Min fɔra wo ye, wo wa wo bɛɛ ma tumɛ min, wo si a fɔ ko, ‘Wɔli-kɛlɛ le male la dɔrɔn. Ma ara mala wɔlɛ le dɔrɔn kɛ.’ ”
Kunato Tan Dandan-Koe
11Yisa ye tala Yerusalɛm tumɛ min, a tenbira Samariya anubɛ Kalili sigisɔnnu tɔ. 12A ye donna so-nɛ do rɔ tumɛ min, kunato mɔgɔ tan ya a labɛn kilɛ la. Anu ya anu mata a la 13ka gbele-gbelen ko, “Ma tigi Yisa! Kinikini ma ma!”
14 #
Saraka-Masɔlɛnuta Tɔnnu 14.1-32
Yisa ya anu yen tumɛ min, a ya a fɔ anu ye ko, “Wo ta saraka-masɔlɛnu bara, anu ni wo lakɔrɔsi.”
Anu bi tala tumɛ min, anu dama kɛndɛyara. 15Mɔgɔ kelen de anu tɔ, wo ya a yen tumɛ min ko a ara kɛndɛya, a sɛgira Yisa wara. A ye Alla tantola a kulu-mayɛlɛnɛ la. 16A ya a sa dugi ma Yisa kin kɔrɔ ka baraka bira a ye, ado Samariya kɛ le kei wo la.
17Yisa ya nyinikalɛ kɛ, a ko, “Wo mɔgɔ tan de ma kɛndɛya nun, ba? Mɔgɔ kɔnɔntɔ toe doi don? 18Nfenna anu dama ma sɛgi ka baraka bira Alla ye? Fɔ sundan kɛ dɔrɔn, wo le nara?” 19Yisa ya a fɔ a ye ko, “I lasɔ, i ni ta. Ila dɛnkɛninyɛ ara i lakɛndɛya.”
Allata Mansayɛ Na-Koe
(Matiyu 24.23-28, 37-41)
20Farisi donu ya Yisa manyinika Allala mansayɛ na-tumɛ ma. A ya anu yabi ko, “Allala mansayɛ, fen de wo la i ti min namatoe yen. 21Mɔgɔ ti a fɔ ko, ‘A mafɛlɛn, a ye yan!’—ni wo ma, ‘I ma a yen pan!’ Wo ti yen bawo Allala mansayɛ ye wo tɛma kaka.”
22A ya a fɔ ala karan-dannu ye worɔ ko, “Tumɛ wo ye nala, nde, Hadama-dan na-wati-sɔgɛ si wo bira kɔnɔ hali tele kelen, wo ti wo yen! 23Donu si a fɔ wo ye ko, ‘A mafɛlɛn pan, a ye nyɔ!’—ni wo ma, ‘A mafɛlɛn yan, a ye yan!’ Kɔnɔ wo kana ta n nyini tinɛ. 24Iko bandɛ si a nyin masɔgɔ san-kolo tɔnkɔn kelan rɔ ha ka malan a tɔnkɔn doi rɔ nya min, nde, Hadama-dan si na wo nya na le. 25Kɔnɔ fɔ n ni tɔrɔyɛ sɔrɔn fɔlɔn bɛrɛkɛ, ado bi-mɔgɛnu si anu ban n na. 26#Ko-Dabirɛnu 6.5-8 Nde, Hadama-dan ta wati si ma iko koe minnu kera Nowata wati rɔ. 27#Ko-Dabirɛnu 7.6-24 Bɛɛ tora fen-dɔn-kɛla ka anu min, keinu ya musinu furu, musinu tara kei-wara-sigi rɔ. Anu tora wo bɛɛ mala ha Nowa donta kulɔn rɔ lunyɛ min. Nba, yi nara ka anu damasi kasara. 28A si ma fanan iko a mara nya min Lɔtila wati rɔ. Bɛɛ tora fen-dɔn la ka anu min. Anu bi yilayɛ kɛla ka sɛnɛ sa anubɛ ka bɔnnu sɔ. 29#Ko-Dabirɛnu 18.20–19.25 Lɔti bɔra Sɔdɔm soe burɔ lunyɛ min, tɛ anubɛ munku-gbɛ yigira ka bɔ san-kole rɔ ka anu dama halaki. 30A si ma wo nya na le fanan nde, Hadama-dan wa bɔ gbɛ rɔ lunyɛ min.
31 #
Matiyu 24.17-18; Maraka 13.15-16 “Ni wo tele ya a taran, i ye bɔn kuma,#17.31 Bɔn kuma: Anuna bɔn kumɛ ralɛɛnɛ wulɔn. Mɔgɛnu si ta sigi nyɔ ka ki nyɔ fanan. i kana don bɔn la i bolo-fannu bi tinɛ. A ye wo nya na le fanan, ni wo tele ya i taran ila sɛnɛ rɔ, i kana sɛgi bɔn la tun, 32#Ko-Dabirɛnu 19.26 ado min mara Lɔtila musi la, wo ni wo hɛnkili lamiri wo ma! 33#Matiyu 10.39; 16.25; Maraka 8.35; Luka 9.24; Yɔni 12.25 Mɔgɔ-wo-mɔgɔ min ba a raya ka a nyɛrɛ niyi lakisi, wo si bɔnɔ a rɔ. Mɔgɔ-wo-mɔgɔ min ba bɔnɔ a niyi rɔ, wo si a sɔrɔn. 34N bi a fɔla wo ye, su kelan wo rɔ, mɔgɔ fila si taran kinɔgɔla kan-tina-kelen, kelen si bi, doi si to. 35Musu fila si taran fen tugula anu nyɔgɔn fɛ, kelen si bi, doi si to. [ 36Kei fila si taran sɛnɛ rɔ, kelen si bi anu tɔ, doi si to.”]
37Karan-dannu ya Yisa manyinika ko, “Mari, kɛ si ma mintɔ?”
Yisa ya anu yabi ko, “Suyi taranta kan min, dogɛnu si anu nadɛn nyɔ le.”
Currently Selected:
Luka 17: KCLB
Highlight
Share
Copy
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
