Luka 13

Tubi-Koe, ni wo ma, Halaki-Koe

1Wo wati nyɛrɛ rɔ, mɔgɛ donu bi nyɔ minnu ya Kalili sigisɔn kɛnuna koe fɔ Yisa ye. Wonu bi saraka-bɔɛ la tumɛ min, Pailɛti ya wonu denu faga. Anu yele basanta saraka-yele la. 2Yisa ya a fɔ anu ye ko, “Wo miriya ko Kalili kɛ kɛnuna hakɛ tenbira Kalili kɛ doinutɛ la, wa? Woletɔ anu tɔrɔnɛ ka le, wa? 3Ade! N ni a fɔ wo ye, ni wole ma tubi ka yɛlɛma, wo dama si faga iko wonu! 4San-bɔn buira mɔgɔ tan-ni-segin minnu kuma Sailom soe burɔ, wonuna sayɛ ye kama? Wo miriya ko wonu yogo Yerusalɛm kɛnu bɛɛ ko, wa? 5Ade! N ni a fɔ wo ye, ni wo ma tubi ka yɛlɛma, wo dama si faga iko wonu.”

Toro-Gbɔbɛlɛ Tili

6Yisa ya tili kɛ tɛgɛ anu ye ko, “Toro-kuri ye kei do bolo ala nakɔɛ rɔ. A tara a gbɔ nyini tinɛ a la kɔnɔ a ma fen yen. 7Woletɔ a ya a fɔ ala nako-makandannɛ ye ko, ‘A san sawɛ le kɛ la, n bi nala yan tore kɛ gbɔ nyini tinɛ kɔnɔ n ma fen yen. A tɛgɛ kelenna! A kana to dugu-lamonɛ tinyana tun!’ 8Kɔnɔ ala nako-makandannɛ ya a fɔ a ye ko, ‘N fa, a to san kelan kɛ kɔrɔ. N si denkɛ sin ala foolɛ rɔ ka a lafa fen-namɔnɛnu na min si a ma, a ni sabati. 9Ni tore kɛ gbɔra yari, wo kin, ni wo ma, nba, i si a fɔ n ye ko n ni a kuri tɛgɛ.’ ”

Musu Kɔ-Radunɛ Lakɛndɛya-Koe Sulen-Tele Ma

10Sulen-Tele do ma, Yisa ye mɔgɛnu karanna nun Yahudiya-dina-bɔn la. 11Musi do ye nyɔ nun, nyina-yogomɛ ye min fɛ. Wo tɔrɔyanɛ kirayɛ bolo san tan-ni-segin kɔrɔ. A kɔɛ radunɛ, a ti ke a latelenna hali! 12Yisa ya a yen tumɛ min, a ya a kele. A ko, “N na, i wara hɔrɔya ka bɔ ila kirayɛ kɛ kɔrɔ.” 13A ya a bole sa a kuma. Musi wo kɔɛ latelenta kelenna! A ya Alla tantoe dabira.

14 # Bɔ-Koe-Iyipiti 20.9-10; Tɔn-Fɔɛ-Fila-Nyɔgɛ 5.13-14 Dina-bon-kun-tigi diminyara ko Yisa ara dandanli kɛ Sulen-Tele ma. Woletɔ a ya a fɔ mɔgɛnu ye ko, “Tele wɔrɛ ye ma bolo, ma si to wɔlila minnu ma. A bɛnta, mɔgɛnu ni na tele wonu tɔ ka kɛndɛyɛ nyini kɔnɔ wo ma bɛn Sulen-Tele ma mumɛ!”

15Mari ya a yabi ko, “Wole kolandinu! Wo le fanan bi wɔlila Sulen-Tele ma. Wo ye wola kolo-fannu fulenna ka ta yi di anu ma Sulen-Tele ma. 16Nba, Setanɛ ara Iburayima bɔnsɔn-musi kɛ min kiri san tan-ni-segin kɔrɔ, a ma kin, a ni hɔrɔya ka bɔ ala tɔrɔyɛ rɔ Sulen-Tele ma, wa?” 17Yisala yabilɛ kɛ ya a yoge bɛɛ lamiliya. Kɔnɔ a ara kabana-koe minnu bɛɛ ma, nyama bɛɛ sewara wonuna ko la.

Tili ka a Bɛn Kende-Kole Ma

(Matiyu 13.31-32; Maraka 4.30-32)

18Yisa ko, “Allala mansayɛ ye kama? N si a sanka nfen ma? 19A mani de iko kende-kole#13.19 Kende-kole: Kiriki-kan rɔ, masitadi-kole sɛbɛnɛ nyɔ rɔ. A kole dɔgɔ ha kɔnɔ a wa koloya, a si ma ki-fan-belebele la. Wo ya kende-kole min lɔn, ma ya wo sa masitadi-kole gbɛ rɔ. mɔgɛ si min fui ala sɛnɛ rɔ. A si koloya ka ma fui-fan-belebele la. Konanu si anu nyagannu kiri a tɔnsɔnnu na.”

Biredi-Yɛlɛ-Fan Tili

(Matiyu 13.33)

20Yisa ya nyinikalɛ kɛ tun ko, “N si Allala mansayɛ sanka nfen ma tun? 21A mani de iko biredi-yɛlɛ-fan. Musi do ya doni bi ka a basan dɛgɛ-munke ku-musu kelen na ha a bɛɛ yɛlɛta.”

Don-Da-Dɔgɔmɛ

(Matiyu 7.13-14, 21-23)

22Yisa tamatoe Yerusalɛm, a tara so-wɛnu anubɛ so-mɛsɛnu tɔ mɔgɛnu karan tinɛ. 23Do ya a manyinika ko, “N fa, minnu si na kisi, wonu ma siya, wa?”

Yisa ya anu yabi ko, 24“Wo ni wo raya ka don da-dɔgɔmɛ la. N ni a fɔ wo ye, mɔgɔ siyaman si anu taya ka don kɔnɔ anu ti ke donna. 25Bon-tigi wa a lasɔ ka dɛ rasɔgɔ, wo sɔnɛ si to kɔma dɛ matugula ka a fɔ ko, ‘N fa, dɛ laka ma ye!’ Kɔnɔ a si wo yabi ko, ‘N ma wole lɔn. N ma wo bɔ tinɛ lɔn!’ 26Wo si a yabi worɔ ko, ‘Ma ya fen-dɔn-kɛ i fɛ ka ma min kan-tina-kelen. I ya mɔgɛnu karan mala soe burɔ!’ 27#Yaburi 6.8 Kɔnɔ a si a fɔ fanan tun ko, ‘N ma wo bɔ tinɛ lɔn. Wo bɔ n fɛ, wole ko-yogoma-kɛlɛnu!’ 28#Matiyu 22.13; 25.30 #Matiyu 8.11-12Wo wa Iburayima anubɛ Isiyaka anubɛ Yakoba anubɛ nɛbi bɛɛ yen Allala mansayɛ rɔ tumɛ min, a si ma diyi anubɛ nyin-makinyɛ la wo bolo bawo anu ya dɛ rasɔgɔ wo ma. 29Mɔgɛnu si na ka bɔ tele-bɔɛ anubɛ tele-yigi anubɛ tele-kankan filɛ rɔ ka anu sigi tinɛnu bi ladiyɛ rɔ Allala mansayɛ rɔ. 30#Matiyu 19.30; 20.16; Maraka 10.31 Minnu bi a laban la kaka, wonu si ma a fɔlɔtɛ la wulɔn-tele. Minnu bi a fɔlɔtɛ la kaka, wonu si ma a laban la wulɔn-tele.”

Yerusalɛm Keni-Koe Yisa Bolo

(Matiyu 23.37-39)

31Wo wati nyɛrɛ rɔ, Farisi donu nara Yisa wara ka a fɔ a ye ko, “A fisa, i ni bɔ yan ka ta kan-tina-gbɛrɛ rɔ bawo i faga-sɔgɛ ye Hɛrodi la.”

32Yisa ya anu yabi ko, “Wo ta a fɔ suluki wo ye ko, ‘Bi anubɛ sina, n bi nyinɛnu gbenna ka mɔgɛnu dandan. A tele sawa nyɔgɔn, n si ban nna wɔlɛ la.’ 33Hali wo, bi wo, sina wo, sina-matenbi wo, fɔ n ni to tala yarɔ bawo a ma bɛn nɛbi ni faga kan-tina-gbɛrɛ fɔ Yerusalɛm!

34“E, Yerusalɛm, Yerusalɛm! I ye nɛbinu fagala nun tolon! Alla ara kilayɛ minnu sɔ i wara, i ya wonu mabon kurinu na! A sɔgɛ ye n na wati siyaman ka ila mɔgɛ bɛɛ ladɛn iko sisi-denbɛ si ala dannu nadɛn a kanban kɔrɔ nya min kɔnɔ i ma sɔn n ni wo ma! 35#Yaburi 118.26; Yɛrɛmaya 22.5 Nba, Alla-Bato-Bɔn rakolonyanɛ si to feu! N bi kɛ fɔla i ye. I wa a fɔ tumɛ min ko, ‘Min bi nala Mari tɔgɛ rɔ, Allata duwɛ si to wo fɛ.’ Nba, wo si n yen wati wo le tɔ.”

Currently Selected:

Luka 13: KCLB

Highlight

Copy