Ko-Dabirɛnu 17

Lanyiri Tamasere

1Burama sɔrɔn ya san bi-kɔnɔntɔ ani san kɔnɔntɔ (99) bɔ tumɛ min, Mari bɔra a ye gbɛ rɔ ka a fɔ a ye ko, “Alla Sɛnbɛ-Bɛɛ-Tigi le nde la. I telen n ye. I ni n sako kɛ. 2N si nta lanyiri kiri mabɛ ile tɛma ka i bɔnsɔn siyaya bɛrɛkɛ!”

3Burama ya a laburun a ma dugi ma ka Mari bato. Alla ya a fɔ a ye ko, 4“Lanyiri le kɛ la n bi min kirila i ye. I si ma sibolo siyaman benba la. 5#Romu 4.17 I tɔgɔ ma tun Burama.#17.5 Burama: Tɔgɛ wo kɔrɛ le, “Fa Gbiliyalɛ.” I tɔgɛ le gbɛ Iburayima kamasɔrɔn wo kɔrɛ le sibolo siyamɛnu benba, 6ado nde le ye a mala, i bɔnsɔnnu ni siyaya. N si sibolenu bɔ i bɔnsɔn wonu tɔ. Sibolenu anubɛ mansɛnu si bɔ i bɔnsɔn rɔ. 7#Luka 1.55 N si nta lanyiri latɔnbagaya mabɛ ile anubɛ i bɔnsɔn anubɛ wonu fanan bɔnsɔnnu tɛma. A si ma habadan-lanyiri la alako n ni ma woleta Alla la. 8#Kɛwɔlɛnu 7.5 I ye sundanyɛ la Kenan nyamanɛ min tɔ kɛ la, n si wo di wobɛ i bɔnsɔnnu ma ka a ma wotɛ la habadan! N si ma wota Alla la.” 9Alla ya a fɔ Iburayima ye tun ko, “Woletɔ, i ni nta lanyiri bira, ile anubɛ i bɔnsɔn anubɛ wonu fanan bɔnsɔnnu. 10#Kɛwɔlɛnu 7.8; Romu 4.11 Wobɛ i bɔnsɔnnu bi minnu birala mabɛ tɛma wona, lanyiri wo tamasere le kɛ la, kei bɛɛ ni kemininya. 11-12Wo bɔnsɔnnu bi dan minnu sɔrɔnna wo tɛma, min sɔrɔn wa tele segin bɔ, wo ni wonu nakemininya. Hali yɔɔn minnu sɔrɔnta ila bɔn la anubɛ i ya minnu san sibolo-gbɛrɛnu ma, wonu fanan ni yigi. Anu ni kemininya ka ma lanyiri wo tamasere la min bi mabɛ ile tɛma. 13Kemininya-koe si ma habadan-lanyiri-tamasere la mabɛ tɛma. 14Ni kei min ma yigi, wo si wo gben wo kurun tɔ bawo wo ara nta lanyiri tinya.”

15Alla ya a fɔ Iburayima ye tun ko, “Ila musi Sirayi tɔgɔ ma tun Sirayi. A tɔgɛ le gbɛ Sira.#17.15 Sira: Tɔgɛ wo kɔrɛ le, “Mansɛla dunmusi.” 16Nta duwɛ si to a kuma. A si den-kei sɔrɔn i ye. A si ma bɔnsɔn siyaman na la. Mansɛnu si bɔ a bɔnsɔn rɔ.”

17Iburayima ya a laburun a ma dugi ma. A yɛlɛnta ka a miri a yisi rɔ ko, “Kei min bara san kɛmɛ bɔ, wo si ke dan sɔrɔnna tun? Sira min bara san bi-kɔnɔntɔ bɔ, wo si ke dan sɔrɔnna tun?” 18Iburayima ya Alla manyinika ko, “Nfen bi a tola, Sumanyila ti ma n kɛɛ-bilɛ la?”

19-21Alla ya a yabi ko, “N bara i kan lamɔɛn Sumanyilala ko la. Nta duwɛ si to ale kuma. Bɔnsɔn tan-ni-fila si bɔ ale rɔ. N si a bɔnsɔn wonu nasiyaya bɛrɛkɛ! Kɔnɔ ila musi Sira si den-kei sɔrɔn yati! I si a tɔgɔ sa Isiyaka.#17.20 Isiyaka: Tɔgɛ wo kɔrɛ le, “A yɛlɛnta.” N si nta lanyiri latɔnbagaya ala dan wo ye ka a ma habadan-lanyiri la ale anubɛ a bɔnsɔnnu ye. Kɛ nyɔgɔn tumɛ yari, Sira si dan kɛ sɔrɔn i ye.” 22Alla banta kumala Iburayima ye tumɛ min, a bɔra a fɛ.

23Iburayimala dan Sumanyila anubɛ kei min bɛɛsi ye a warɛ bɔn la, anubɛ ala yɔɔn-kei minnu sɔrɔnta ala bɔn la, anubɛ a ya yɔɔn-kei minnu san, Iburayima ya anu nayigi tele kelan wo kɔrɔ iko Alla ya a fɔ a ye nya min nun. 24Nba, Iburayima ye yigila tumɛ min, wo ya a taran, a sɔrɔn ara san bi-kɔnɔntɔ ani san kɔnɔntɔ bɔ. 25Ala den Sumanyila ye yigila tumɛ min, wo sɔrɔn ara san tan-ni-sawa bɔ. 26-27Wo wulɔn tele kelan, Iburayima anubɛ ala den Sumanyila anubɛ ala yɔɔnnu, anu bɛɛsi yigira wulɔn le.

Currently Selected:

Ko-Dabirɛnu 17: KCLB

Highlight

Copy