Ko-Dabirɛnu 15

Lanyiri Kiri-Koe Alla anubɛ Burama Tɛma

1Kɛlɛ kɛnu kanɛ a la, Mari ya a yiraka Burama la. A ya Mari kuman-kan lamɔɛn ko, “Burama, i kana kilan. Nde si i latanka ka i barayi boi!”

2Kɔnɔ Burama ko, “E, n tigi Mari Alla, i ye n barayila nfenna ko la? Den sa n bolo. N kɛɛ-bila sa, fɔ nna wɔli-kɛlɛ Ɛliyesa Damasika kɛ, wo le ye n kɛɛ bila.” 3Burama ya a fɔ tun ko, “I ma den di n ma. Woletɔ nna yɔɔn minnu sɔrɔnta nna bɔn la, wo do si ma n kɛɛ-bilɛ la.”

4Mari ya a fɔ Burama ye tun ko, “Wo ti ma. Ɛliyesa ti ma i kɛɛ-bilɛ la muk! I nyɛrɛ-nyɛrɛta dan, i kɛɛ ye tola wo le ye.” 5#Romu 4.18; Hiburunu 11.12 Mari ya a fɔ Burama ye tun ko, “Bɔ luyi ma. I ni lolenu mafɛlɛn san-kole ma. Anu siya nya min, i bɔnsɔn ye siyayala wo nya na le.”

6 # Romu 4.3; Kalesiya 3.6; Yemesi 2.23 A lara Marita kumɛ wo la. Woletɔ Mari ya a yatɛ telenbagɛ la.

7Mari ya a fɔ a ye tun ko, “Ita Mari le nde la min nara i la ka bɔ Yuri soe burɔ Babilɔn nyamanɛ rɔ alako ka nyamanɛ kɛ ma itɛ la.”

8Burama ya Alla manyinika ko, “E, n tigi Mari Alla, n si a lɔn kama ko nyamanɛ kɛ ye mala ntɛ la le?”

9Mari ya a fɔ a ye tun ko, “Ninki-musi min bara san sawa bɔ wo, baa min bara san sawa bɔ wo, saga-yigi min bara san sawa bɔ wo, na wonu na n ye. I ni purulen kelen anubɛ kangbo kelen bi ka wonu sa kolo-fen sawɛ kɛnu kuma.”

10Burama nara kolo-fan kɛnu na ka anu tatɛgɛtɛgɛ kundu fila-fila la. A ya a kundi wonu tala ka anu ma gbaranda fila la. Kɔnɔ a ma koni filɛ wonu tatɛgɛ. 11Dogɛnu yigira soge wonu ma kɔnɔ Burama ya dogɛ wonu gben sogo-kundi wonu ma.

12 # Yobu 4.13-14 Tele-kolo-wulan ma, Burama kinɔgɔra dɔgɔma-ma-de! A tora kinɔgɛ rɔ. A kilanta kosɛbɛ! 13#Bɔ-Koe-Iyipiti 1.1-14; Kɛwɔlɛnu 7.6 Mari ya a fɔ Burama ye kiyo rɔ ko, “I ni a lɔn serr ko i bɔnsɔnnu si ma sundan la nyamani-gbɛrɛ rɔ. Anu si ma yɔɔnnu na ka wɔli nyamanita-mɔgɛ wonu ye. Mɔgɛ wonu si anu tɔrɔ san kɛmɛ nani kɔrɔ. 14#Bɔ-Koe-Iyipiti 12.40-41; Kɛwɔlɛnu 7.7 Kɔnɔ nde si sibolo-gbɛrɛ wonu tɔrɔ minnu bi anu nawɔlila. Wo kɔma, n si a ma, i bɔnsɔn wonu ni bɔ nɔnfulu-siyaman na anu bolo nyamanɛ wo rɔ. 15Kɔnɔ ile si kɔrɔya kɔbɔkɔbɔ! I si faga yisi-kimɛ rɔ. 16Kɔnɔ i bɔnsɔn minnu bi donna yɔɔnyɛ rɔ, wonu bɔnsɔn nani nyɔgɛ wonu denu bi sɛgila nyamanɛ kɛ rɔ yan. Kɔnɔ anu ti don yan fɔ Amoranuna hakɛ da wa fa. Wo kɔma, n si anu gben.”

17Fitiri ma, pinpi ara don gbɛ, ta-kɔ-miran, ta-sisi ye bɔla min tɔ, anubɛ kala-mɛlan tenbira sogo-kundu gbaranda filɛ wonu tɛma. 18-21#Kɛwɔlɛnu 7.5 Tamasere le wo la Mari ya lanyiri min kiri anubɛ Burama tɛma tele wo nyɛrɛ rɔ ko, “N bara nyamanɛ kɛ di i bɔnsɔn ma. Kenanuna nyamanɛ anubɛ Kɛnasinuna nyamanɛ anubɛ Kadimɔnanuna nyamanɛ anubɛ Hɛtinuna nyamanɛ, anubɛ Perasanuna nyamanɛ anubɛ mɔgɔ-layan-bɛnuta#15.19 Mɔgɔ-layan-bɛnu: Min sɛbɛnɛ kitabu rɔ, wo le Rɛfɛnnu. Wo kɔrɛ Hiburu-kan rɔ ko, “Mɔgɔ-layan-bɛnu.” nyamanɛ anubɛ Amoranuna nyamanɛ anubɛ Kenannuna nyamanɛ anubɛ Kagasanuna nyamanɛ anubɛ Yebusinuna nyamanɛ, ka a dabira Iyipiti bɛ ma ha ka ta ke Yufereti bɛ ma, n si wo bɛɛsi latenbi ile bɔnsɔnnu ma.”

Currently Selected:

Ko-Dabirɛnu 15: KCLB

Highlight

Copy