CHISƆSI 'A SƆ MƆƐ NU 20

Pɔɔ n bɛ a bɔɛ n na, an ta‑a Masidonia ni Kiisi chɛnyɛ n dɔ

1An gbun chɛ ɔ chima‑a kɛn, mbɛ Pɔɔ‑a Chisɔsi fɛ mɔɛ chɛ n chee kaina dɔndɔ. A ban‑da kɛn an faa chima bai fɔ‑a an ye, a‑a a saa wan an na. Mbɛ a‑a an to, a ta‑a Masidonia chɛnyɛ ɔ. 2A ben ben‑da wan Masidonia chɛnyɛ chɛ gbɛɛ ɔ, ɛ ta‑a nɔ mɔɛ chɛ n faa ma nande‑a bai sɛsɛ a. Mbɛ a ka‑a nɔ, a ta‑a Kiisi chɛnyɛ ɔ, 3a ni kaina kau sawa ko a. A ɛ gbɛ a ma bɛn tena wan, ta koe a Siyia chɛnyɛ ɔ dɛndɛ ɔ, mbɛ a‑a a ɔ gbɛ, mbɛ Chu mɔɛ n ni dɔbɛnɛ an dɔ, a fa koe a. A wɛɛ‑a a yiima mun fan, mbɛ a yɛ‑a to Masidonia. 4Kai Piyɔsi 'a den kaienɛ Sopata, min ka‑a Bɛyia duu ɔ, a bea‑a wan Pɔɔ fɛ, mbɛ an fea ta‑a a a. Mɔ dɔ mende nu, miin bɛɛ bea‑a a fɛ, an fan nii nɛ, Ayisitakɔsi a, an fea Sɛkundɔsi a, miin ka‑a Tɛsadonika duu ɔ. A yɛ to, ni Kayɔsi, min ka‑a Dabi duu ɔ, an fea Tikikɔsi a, ni Tɔfimɔsi miin ka‑a Esia chɛnyɛ n dɔ. Mɔɛ dankama ni Timoti an na. 5An fan ta‑a nn ya ɔ, mbɛ an‑na nn ma kɔn Towasi duu ɔ. 6Chɛɛ biidi dɛnfɛ daun bɛn ba chɛ ben‑da kɛn, nn si‑a wan dɛndɛ ɔ, a ka Fiipai duu ɔ. Tee duu gbakɔ, nn‑na an tan fan Towasi, nn ni kaina tɛn sɔngbɔ dɔndɔ ko a.

Pɔɔ dankama tachɛ, Towasi duu ɔ

7Tɛnɛ kan kɔ dɔɛ ma, nn bɛn‑da wan kaina dɔndɔɛ, daun chɛ koe a.#20:7 daun chɛ koe a - A fɔ buɛ dɔ mende an nɛ: Mansa Chisɔsi 'a daun fenɛ daun koe a. Pɔɔ‑a Yataa bai sa wan mɔɛ chɛ n tena. A toen ni ben koe an na, a banda ka. Chɛ an fɛ mu, a koɔ‑a wan an tena, aan su ta‑a a tɛ ma. 8Dambo sɛsɛ a manden fan ni, banda a chen chɛ a, nn ni ka kaina bɛnɛ chɛ ɔ. 9A tima chɛ a, kamin tɔngbɔ dɔndɔ ni wan nɔ, min tɔ ni Yutikɔsi. Pɔɔ ni koɛ chɛ gbɛɛ chɛ tena tima min na, a ni si ɔ wunda a wan, a gbu chinɔenɛ ɛ. Mbɛ Pɔɔ che‑a kaina wan, Yutikɔsi boo tɛ‑a wunda chɛ a, mbɛ a bea‑a duu ma, a bɔ chenɛ chɛ si tena sawa chɛ ɔ. An mbe gbɛ a ya‑a, a faenɛ ni don. 10Chɛɛ Pɔɔ yii‑a wan nɔ duu ma, mbɛ a‑a a ma bun su chɛ kun ma. Mbɛ a‑a su chɛ bia a boo fea a, a ɔ, “Wo ma wo faa gbaa, a ɛ fɔɛ ɔ.” 11Mbɛ a sɛ‑a to banda a chen chɛ a, a‑a biidi tɛ kai, mbɛ an bɛ gbɛɛ‑a a daun kaina dɔndɔ. A to‑a wan koɔ‑a an tena, aan banda ɔ ka‑a, mbɛ a ta‑a. 12Pɔɔ ta‑a kɛn, mɔɛ chɛ n‑na kamin tɔngbɔɛ chɛ ya wan, a chɛndɛ chen, an ta‑a a ma sɔ‑a a waa a. Chɛ‑a an bu ɔ dia wan, a ɔ benden ba a.

Pɔɔ ta‑a, Midetɔsi duu ɔ

13Pɔɔ na‑a dɔbɛnɛ chɛ wan nn na, mbɛ a ɛ ta‑a nn ya ɔ, a chenɛ ma, Asɔsi duu ɔ. A ɔ, nn sin tana, nn ni si dɛndɛ ɔ, a ta Asɔsi, a ya ɔ. A ɔ, a ɛ nn tan‑da nɔ wan, mbɛ nn ta‑a a ya ɔ. 14A‑a nn tan kɛn Asɔsi duu ɔ, a sɛ‑a wan dɛndɛ ɔ nn kun ma, mbɛ nn bɛ ta‑a Mitidene duu ɔ. 15Nn ka‑a wan nɔ dɛndɛ ɔ, mbɛ nn ta‑a Kiɔsi ya teen ma, tee dɔndɔɛ ma. Tee dɔndɔ gbakɔ to, nn che‑a wan dɛndɛ ɔ Samɔsi yii tinɛ ɔ. Nn chi‑a nɔ wan. Mbɛ banda ɔ ka‑a kɛn, nn che‑a wan gbɛ Midetɔsi duu ɔ. 16Pɔɔ yiima ɔ bɛnden fan ni, a ni Ɛfisɔsi ma sangba. Koe min na mu, a nii ma to ni tima kan kɔ kan yayi koe a Esia chɛnyɛ ɔ. A toen ni tachɛ a gbandi ma an chɛ koe a. Ni a ni bɛn fan, a ni che Chuusaɛn duu ɔ, tee chɛ ma, an ni min chee Pɛndekɔsi.

Pɔɔ‑a bai sa, gbakoo n tena, Ɛfisɔsi duu ɔ

17Pɔɔ to‑a Midetɔsi wan, mbɛ a‑a sakana a ta Ɛfisɔsi chɔchi gbakoo n tena, an na koe a, a tan‑da. 18An che‑a kɛn Pɔɔ ma, a‑a a fɔ wan an ye, a ɔ, “Wo‑a a ɔ yen fan, n ni buɛ min dɔ wo tɛ ɔ, tima ɔ tima ko a. A ka n 'na tee saa saa ma Esia chɛnyɛ chɛ ɔ, aan a sɔ n ka tee ma nɔ. 19Chu mɔɛ n‑na kun puinɛ chɛ wan, a yama boo a, a si n ma. Chɛɛ n‑na n fandi ma yii wan, n‑na wai chɛ wan Mansa Chisɔsi ko a, di ni wɛɛ n ya a, n faa wɛɛ yɔndenɛ ɛ, a si ko ma gbaaen chɛ n ma, Chu mɔɛ n‑na min sa n ma. 20Wo‑a a ɔ sɔn fan to, mbɛ n ma ko ɔ ko ɔ nun ni wo ma, n ni ma Yataa bai sa‑a wo tena. Chɛɛ fanka ɔ den, a basan wo 'a chenɛ n bɛɛ a, n‑na wo kan fan koe n na, miin mu demanɛ a wo tena. 21N‑na dasi gbau gbau be wan Chu mɔɛ n ma, ni miin bɛɛ ma Chu mɔ a, a si an kan kɔ sɔ koe a, an 'na ko yama n na, an ni an ya a mun Yataa ma. A yɛ to, a si an kai fa koe ma mmɔ 'a mansa Chisɔsi a. 22Sanche gbɛ sin, n yen ko, n mbe ee che Yataa Nyina da a kuiɛ bɔ a ɔ, n mbe ka ta‑a Chuusaɛn duu ɔ wan. N gbu ma a ɔ sɔn, koe min mbe n tan‑da nɔ. 23Mɔɔ dechee Yataa Nyina ɛ min fɔ tena n ye, duu kan kɔ kan dɔ, n mbe ta min dɔ. Mbɛ tɔɔya sɛsɛ, a basan pimbi chenɛ a sa a, ɛ wan n ya ɔ. 24Chɛɛ ni n 'na wai chɛ koe mu, n ma n ta fɔɛ chɛ ya ni fen kɔ fen na. Wai chɛ, Mansa Chisɔsi‑a min be n ma, n ni a a ban koe mu. N ni sakana bai chɛndɛ chɛ ɔ yian mɔɛ n na, a si Yataa 'a koadia demanɛ ma.

25“A sin, a yen ko gbɛ, n‑na chɛ ɔ sɔn. Mbɛ n ben ben‑da wo wɛn gbɛɛ tɛ ɔ, n mbe ta‑a koɔ‑a wo tena, a si Yataa 'a mansaya ma, wo dɔndɔ wɛɛ ee na‑a n yen‑da to. 26Chɛ an fɛ mu gbɛ, n mbe chɛ ma din tena wo tena bi. Mbɛ ni wo dɔndɔ wɛɛ nɛ, wo ma bauncha ma sɔn ni, wo ee na‑a wo tɛɛ si‑a n ma. 27Koe min na mu, n ma ko kan kɔ kan dɔ nun ni wo ma, a si koe n gbɛɛ ma, miin mbe Yataa yii ma, an ma koe a. 28Wo wo wandi kun ma fɛn, ni mɔɛ chɛ n gbɛɛ, Yataa Nyina‑a miin kai fa wo a. Wo Yataa 'a chɔchi mɔɛ n kun ma fɛn. Yataa gbɔgbɔɔ denɛ, Chisɔsi, a ta wii min bɔn‑da, a fa tima a, an‑na a ma, chɔchi mɔɛ chɛ n ma‑a a wan Yataa ta mɔɛ n na. 29N‑na a ɔ sɔn fan, mbɛ ni n ta‑a, fania kan chɛ mɔɛ n mbe na‑a wan n gbaa. An mbe ma‑a wan, yɔ nya fenɛ nu wo tɛ ɔ, a sin, an mbe ee sai bɔ‑a, wo 'a mɔɛ n na. 30A sin, tima ɛ che‑a wan, mɔɛ dɔ n ni bɔ wo wandi gbu tɛ ɔ, miin mbe bai n fɔ‑a, miin mbe ee a chia ma. An mbe chɛ ma‑a wan, mɔɛ dɔ n ka koe a Chisɔsi 'a chia ma, an ni bea an fɛ. 31Chɛ an fɛ mu, wo wo wandi kun ma fɛn, mɔ bonda chɛ n boo ɔ. Wo wo yii na chii, mbɛ su ɔ tee a, n ni wo a si wan. N‑na chɛ ma wan san sawa ko a, di a n ya a.

32“Sanche gbɛ, n mbe wo kai fa tena Yataa an na. Wo a a tun dan koe a sakana bai chɛ a, a si Yataa 'a koadia demanɛ chɛ ma wo tena. Ɛ kun fan, a ni a ma, wo 'a danaya n dɔ ni gbɛa. A yɛ to, ɛ kun fan, a ni dua chɛ be wo ma, min mbe Yataa boo ɔ, a 'a mɔɛ n gbɛɛ ko a. 33N nii ma to ni, mɔ ɔ mɔ ta boo fen kan kɔ kan na. 34Wo wandi gbu‑a a ɔ sɔn fan, mbɛ n fandi gbu 'a taa sende, n mbe an daun, nn bɛ chɛ n na, miin mbe n fɛ. 35N‑na a ɔ yian fan wo a, chia ɔ chia a, mɔɛ ɛ wai chɛ buɛ min dɔ a boo a, basan koe a mɔɛ n ma, boo ee miin ma, an ma koe chɛ koe a. Mmɔ yii ɛ ma‑a wan bai chɛ kɔ, Mansa Chisɔsi na‑a min fɔ, a ɔ, ‘Dua ɛ fenɛ be mɔɛ ma kaka, a ni ben a bia mɔɛ ma.’ ”

36Pɔɔ ban‑da kɛn koɔ‑a ka mɔɛ chɛ n tena, a‑a a kumbai gbangban fan, an bɛ gbɛɛ an na, mbɛ an‑na samunɛ chɛ Yataa tena. 37A sin, an ni kɛn an saa a a, an gbɛɛ gbaun‑da wan di a, an bea‑a a kaa ɔ, koadia wa ɔ. 38Pɔɔ‑a bai min fɔ an ye, an gbu‑a an faa mɔnɛ kaka. A‑a a fɔɛ min chɛ, a ɔ, an mbe ee na‑a an nyɔn yen‑da to. Mbɛ an ta‑a a ma sɔ‑a, dɛndɛ tena, an kɔ yii da a.

Currently Selected:

CHISƆSI 'A SƆ MƆƐ NU 20: KONONT

Highlight

Copy