Matayo 13

Umugani w’umubivyi

1 # Mrk 4:1-20; Luk 8:4-15. Kur’ uwo musi Yesu asohoka ava mu nzu, yicara ku nkombe y’ikiyaga. 2Ishengero ryinshi rikoranira kuri we, bimutera gutambukira mu bgato, yicaramwo; ishengero ryose rihagarara i musozi. 3Ababgira vyinshi mu migani, aravuga, at’ Umubivyi yasohoye imbuto. 4Akibiba, zimwe zigwa i ruhande y’inzira, inyoni ziraza, zirazinobagura. 5Izindi zigwa ku rutare, hatar’ ivu ryinshi; zica zimera vuba, kukw ata vu ryinshi ririho. 6Izuba rirashe, ziraraba, kukw ata mizi zifise, zirūma. 7Izindi zigwa mu mahwa, amahwa arakura, arazinyoha. 8Izindi zigwa mw ivu ryiza, zihunda impeke, zimwe ijana, izindi mirongwitandatu, izindi mirongwitatu birtyo birtyo. 9Ūri n’amatwi ni yumve.

Inyanduruko itera Yesu kwigishiriza mu migani

10Abigishwa baramwēgēra, baramubaza, bati Mbeg’ ikigutera kubigishiriza mu migani n’iki? 11Arabishura, ati Mwebge mwahawe kumenya amabanga y’ubgami bgo mw ijuru, ariko bo ntibābihawe. 12#Mat 25:29; Mrk 4:25; Luk 8:18.Kuk’ ūfise azohabga, bikamucagatira; arik’ ūdafise azokwakwa n’ico yar’ asanzwe afise. 13#Gus 29:4.Igituma mbabgirira mu migani, n’ukw iyo barāba batabona; kand’ iyo bumva batumva, badatahura. 14Kand’ ivyo uwavugishwa n’Imana Yesaya yavuze, bibashitseko,

ngo Kwumva muzokwumva, ariko ntimuzoruha mubitahura;

Kurāba muzorāba, ariko ntimuzoruha muvyihweza.#Yes 6:9, 10; Yoh 12:40; Ivyak 28:26, 27.

15Kuk’ umutima w’ubu bgoko ucuramye,

Amatwi yabo akaba ari bihurugutwi,

Amaso yabo bakayahumiriza:

Ngo ntibarābishe amaso,

Ntibumvishe amatwi,

Ntibatahurishe imitima,

Ngo bahindukire,

Mbakize.

16 # Luk 10:23, 24. Arikw amaso yanyu arahiriwe, kukw abona, n’amatwi yanyu, kuko yumva. 17Ndababgira ukuri yukw abavugishwa n’Imana benshi n’abagororotsi benshi bāhahamiye kubona ivyo mubona, ntibābibona, no kwumva ivyo mwumva, ntibāvyumva.

Yesu asobanura umugani w’umubivyi

18Nuko mweho ni mutahure umugani w’umubivyi. 19Uwumva wese ijambo ry’ubgami ntarimenye, wa Mubi araza, agasahura ikibibge mu mutima wiwe. Uwo ni we yabibge i ruhande y’inzira. 20Uwabibge ku rutare ni we yumva ijambo, agaca aryakirana umunezero; 21ariko ntagira imizi muri we, ahagarara umwanya muto; iyo yadutsweko n’amarushwa bo n’akadenderezo azira iryo jambo, bica bimutsitaza. 22#Mat 6:19-34; 1 Tim 6:9.Uwabibge mu mahwa ni we yumva iryo jambo, arik’ umwitwaririko w’ivy’ isi n’uruhendo rw’ubutunzi bikanyoha iryo jambo, akaba ikirumbirane. 23Uwabibge mw ivu ryiza ni we yumva iryo jambo, akaritahura, uwo ni we rero yama imbuto, umwe akagira ijana, uwundi mirongwitandatu, uwundi mirongwitatu, birtyo birtyo.

Urwamfu mu buro

24 # Mat 13:36-43. Abacira uwundi mugani, at’ Ubgami bgo mw ijuru busa n’umuntu yabivye imbuto nziza mu ndimiro yiwe. 25Abantu basinziriye, haza umwansi wiwe abiba urwamfu mu buro#13:25 buro: mu Kigiriki handitswe ingano. hagati, arīgīra. 26Bumaze gusēsa no kuyangika, urwamfu ruca ruraboneka. 27Abashumba ba nyen’ urugo baraza baramubaza, bati Mbega mutungwa, ntiwabivye imbuto nziza mu ndimiro yawe? Non’ urwamfu rwavuye hehe? 28Na we ati N’umuntu w’umwansi yagize artyo. Ba bashumba baramubaza, bati Non’ uragomba ko tugenda kurutororokanya? 29At’ Oyaye, kuko kumbure mu kurandura urwamfu mworandurana n’uburo. 30#Mat 3:12.Mureke bikurane vyompi gushitsa mw igenya. Maze mu gihe c’igenya nzobgira abagenyi, nti Mubanze mutororokanye urwamfu, muruhambire imikama, muruturire; arik’ uburo mubgimburire mu kigega canje.

Umugani w’akabuto ka sinapi n’uw’ umwambiro

31 # Mrk 4:30-32; Luk 13:18, 19. Abacira uwundi mugani, at’ Ubgami bgo mw ijuru busa n’akabuto ka sinapi, umuntu yābiriye akagatera mu ndimiro yiwe. 32#Dan 4:12, 21; Ezk 17:23; 31:6; Zab 104:12.Kandi ni kanzinya hanyuma y’imbuto zose, arikw iyo gakuze kaba kanini kakaruta ibirimwa vyose, kakaba igiti. Maz’ inyoni zo mu kirere zikaza zikārika mu mashami yaco.

33 # Luk 13:20, 21. Abacira uwundi mugani, at’ Ubgami bgo mw ijuru busa n’umwambiro, umugore yābiriye akawuvanga n’ingero zitatu z’ifu, gushitsa ah’ iribututumbire yose.

34 # Mrk 4:33, 34. Ivyo vyose Yesu yabibgiye ishengero mu migani, nta co yababgiye atabaciriye umugani. 35Ni co catumye ivyo umuntu yavugishwa n’Imana yavuze biboneka,

ngo Nzoteranura akanwa kanje, nce imigani,

Nzovuga ivyahishijwe uhereye ku kuremwa kw’isi.#Zab 78:2.

Yesu asobanura umugani w’urwamfu

36 # Mat 13:24-30. Maz’ asezera ishengero, yinjira mu nzu. Abigishwa biwe baza kuri we, bati Dusobanurire umugani w’urwamfu rwo mu ndimiro. 37Na we arabishura, at’ Ūbiba imbuto nziza n’Umwana w’umuntu. 38#1 Kor 3:9.Indimiro n’isi. Imbuto nziza ni bo bana b’ubgami. Urwamfu n’abana ba wa Mubi. 39Umwansi yarubivye ni wa Murwanizi. Igenya n’umuhero w’isi. Abagenyi n’abamarayika. 40#Yoh 15:6.Nk’uk’ urwamfu rutororokanywa rugaturirwa mu muriro, ni ko bizoba ku muhero w’isi. 41#Zef 1:3; Mat 25:31-46; 7:23.Umwana w’umuntu azotuma abamarayika biwe, na bo bazotororokanya ibitsitaza vyose n’abakoze ibizira, babikūre mu bgami bgiwe. 42#Mat 8:12.Bazobaterera mw itanure ry’umuriro, ni ho hazoba amarira no kuryanya insya z’amenyo. 43#Dan 12:3.Bun’ abagororotsi bazokwaka nk’izuba mu bgami bga Se. Ūri n’amatwi ni yumve.

Izahabu n’imaragarita

44 # Mat 19:29; Luk 14:33; Flp 3:7; Imig 2:4. Ubgami bgo mw ijuru busa n’izahabu zanyegejwe mw itongo. Umuntu yazubutseko, arazihisha, aragenda, umunezero umutera gushōra ivy’ afise vyose, agura iryo tongo.

45Kand’ ubgami bgo mw ijuru busa n’umudandaza arondera imaragarita#13:45 rāba Mat 7:6. nziza. 46#Imig 8:10, 11.Abonye imaragarita imwe, y’igiciro kinini, aragenda, ashōra ivy’ afise vyose, arayigura.

Urusenga

47 # Mat 22:9, 10. Kand’ ubgami bgo mw ijuru busa n’urusenga runiniya#13:47 rāba Mat 4:18. rwaterewe mu kiyaga, rukoranya ifi z’amoko yose. 48Rwuzuye, barukwegera i musozi, baricara barobanurira nziza mu gisangaza, mbi barazita. 49#Mat 25:32.Uko ni ko bizoba ku muhero w’isi. Abamarayika bazoza, barobanure ababi mu bagororotsi, 50babaterere mw itanure ry’umuriro; ni ho hazoba amarira no kuryanya insya z’amenyo. 51Mbeg’ ivyo murabitahuye vyose? Baramwishura, bat’ Ego me. 52Na we arababgira, ati Ni co gituma umunyabgenge w’ivyanditswe wese, amaze guhinduka umwigishwa w’ivy’ ubgami bgo mw ijuru asa na nyen’ urugo asokorora mu vyo atunze ibintu bisha n’ivya kera.

Yesu anēbagurwa n’abo mu ntāra y’i wabo

53 # Mrk 6:1-6; Luk 4:15-30. Yesu amaze guca iyo migani, avayo. 54#Mat 7:28; 11:1; 19:1; 26:1.Aja mu ntāra y’i wabo, yigishiriza mw isinagogi yabo, bituma batangara, bat’ Ubu bgenge n’ivyo bitangaza mbeg’ uyu yabikūye hehe? 55Mbega si wa mwana w’umubāji? Nyina ntiyitwa Mariya, kand’ abavukana na we si Yakobo na Yosefu na Simoni na Yuda? 56#Yoh 7:15, 52.Bashiki biwe ntibar’i wacu bose? Non’ ivyo vyose yabikūye hehe? 57#Yoh 4:44.Ivyiwe birabatsitaza. Yesu arababgira, at’ Umuntu avugishwa n’Imana ntabura icubahiro, atari mu ntāra y’i wabo no mu nzu y’i wabo. 58Kandi nta bitangaza vyinshi yahakoreye, kubg’ ukutizera kwabo.

Currently Selected:

Matayo 13: RUN1967

Highlight

Copy