Henna 11

1Gumiini gaargala ufiiti AABBO Waaqati gungumte, jennaani inni d'agaye dallane, ibida gubbaa worrati erge. 2Ibidi suni jiddu worrati wogube moga olla toko balleese. Jennaani gumiini Musati boote, inni AABBO Waaqa kad'ate, ibidi d'aame. 3Duuba fulla suni maqa Tabera baasani, wonti akanatiifi ibidi AABBO Waaqaa artiti nama gube.

Aka Musani jaarole torbatama fohate

4Worra seseega yau, ka worra Israeli intahiniti ka, worra gula godaanu, jira. Duuba worri sunini guddo fooni jaalate sabdaeni, worri Israelileeni gungume waan jed'e, Ato sila fooni nyaannu qabaanne akami dansa! 5Gaafa Misiri keesa jirru nu qurt'umi haguma feenu nyaanne gaafi male, mee mid'aani aka bododafa, qulubi fa, sagale miooftu d'ibi ta duri nu nyaanne qaabad'a. 6Ammo nu amma yayu gogonne hobaane, wonti tokoleeni ka nu soorannu injirtu sagale manna jed'ani tana male!

7 # Bah 16.31 (Mannani tunini mid'aani didiqo hahad'icha adadi aka haampe jira. 8-9#Bah 16.13-15Isiini halkani fit'eesa keesa olaati gabuuti. Boriyyaate nami kae guurate, daakhe d'aabate, qit'a tolfata. Hojja nyaatani aka qit'a d'ad'ani d'aabani mioofti.)

10Musani aka gumiini wolwoldeete balbala waaro ufi durati gugungumte d'agaye laalefate, wonti akanatiifi AABBO Waaqati worraati dallane. 11Jennaani waan AABBO Waaqaani jed'e, Atini maanifi waan hamtu kana na tolchita? Atini maanifi na dabsite, ulfinna worra kana ch'ufa nara keete, akana na tolchita? 12Worra kana ch'ufa nati garaachae d'ale? Atini maanifi akko worraa na tolchita, anini worra kana aka daima hampaare, lafa atini ababoota worrati kakhateeni d'ufa? 13Anini eesa fooni worra kana nyaachisu arga? Worri kunini guyya ch'ufa aka saree gururie fooni nyaatu nara barbaada. 14Anini worra kana ufiti indandau, baani worraa ya nati ulfaate! 15Yo atini ka akana na tolchitu taate na nahi, na ijeesi, aka anini deebie gaargala akana siraa inarganne.

16AABBO Waaqi waan Musani jed'e, Jaarole torbatama, ta gurra qabdu, ta gumi keesa mataa fakaatu, wolti yaami, fulla balbala Waaro Woyyumati natiini kooti, worri ka arti sibira ejaanjuti. 17Duuba anini gabue, artiti siini dubbad'a, ammalle jabeenna lubbuu ka qara si kennele haga gari siraa fuud'e worraa kenna. Akanaani worri si qarqaare, baani worraa siti sablate, wahela argatta. 18Amma tana waan biyyaani jettu, Guyya boriti jed'a, ufi qulqulleesa, fooni nyaatani inargattani. AABBO Waaqi ya gururisu teesani, ta isani, Eentu fooni nu nyaannu nuu kenna? Gaafa nu lafa Misiri keesa jirru hagana ira jira jettani d'agaye. 19Amma tana AABBO Waaqi fooni isani nyaatani isanii kenna. Guyya tokofa, lamafa, shanifa, kud'anifa yokhaani diddamafa ch'alla inyaatani, 20ammo bulti addeesafi dukana ch'ufa nyaatani, haga fooni suni isani ira dabrani funnaaniini isani keesa dachaaniti. Wonti kunini ch'ufti, woni isiini taatufi, waan isaani, AABBO Waaqa ka jiddu teesani keesa jiru kana diddani, Maanifi lafa Misiri keesa baane? jettani gungumtanifi.

21Musani waan AABBO Waaqaani jed'e, Gumiini anini deemuni tunini nama kunki d'ibba jaati, atini duuba d'uguma haga jia toko fooni worraa kenna jetta? 22Loonifi ree worra quubsitu dandaani inqalani? Qurt'umini galaana ch'ufti yo guurani worra ingeeti?

23AABBO Waaqi waan Musani jed'e, Harka kiyya gababa seeta? Duuba atini amuma tana aka dubbini guutamte yokhaani inguutamne agarta!

24Jennaani Musani gabahe waan AABBO Waaqi isaani jed'e biyyati hime. Inni jaarole nama torbatama yaame, Waaro Woyyuma d'aatuni d'ufe. 25Jennaani AABBO Waaqi dumansa keesa gabue isaani dubbate, jabeenna lubbu qara isaa kenne haga toko iraa fuud'e, jaarole torbatama taani qoode. Lubbuuni ira bute jennaani worri haga gababa toko aka raaga iyye.

26Jaarole torbatama suni keesa, nami lama, ka Heldadifi Medadi jed'ani, fulla Waaro suni d'ufu dide worrati hafe. Achi olla keesati, worrale lubbuuni ira bute, worrileeni aka raaga iyye. 27Namichi kaimtichi toko utaale, waan Heldadifi Medadini tahani Musati hime.

28Jennaani Yoshuani, ilmi Nuni, ka haga kaimoma isaati Musa jala hojatu, waan Musani jed'e, Worra kana ch'allisisi, Aabbo!

29Musani waan jed'eeni, Atini waan worri kunini tahe ira hameenna agarta? Yo sila taate anini aka AABBO Waaqi lubbu isaa nama ch'ufa ira buuse aka raaga iyyisisu fed'a! 30Jennaani Musafi jaaroleeni Israeli torbatami taani waaro ufiti dachaate.

Aka AABBO Waaqi simpirre worri Israeli nyaatu ergeefi

31AABBO Waaqi bubbe erge gara galaanati simpirreeni gosa toko ta lafati gad'iaate d'und'uma lama lafa hanqate bariftu, d'ufeeni. Simpirreeni sunini olla worra gama ch'ufaani marsite, lafa qabatte, fageenna lafa haga deema guyya toko ch'ufa guute. 32Tanaafi guyyaafi halkani sunifi boriyyaatele simpirre suni guuratani; nami tokoleeni ka kilo kuma toko inguuratini injiru. Duuba aka goffatani, d'aatu waaro ufiti lafati afaani. 33Ato worri fooni afaani qabu, AABBO Waaqi worrati dallane, ch'iisa d'ukuba hama worratiini d'ufe. 34Fulla suni Kibroth-Hataava jed'ani, akasi jechuuni Awaala worra sabdicha, wonti akanatiifi achiti worra jaalate fooniini sabdae awaalani. 35Gumiini achi kaate Haserothi qubate achi teete.

Aka Miriamu gaargalchani

Currently Selected:

Henna 11: BOR

Highlight

Copy