Yohana 16
16
1Anini waan kana yayu isaniti hime aka d'ugefachaani teesani laafte isaani kara iraa ingorre. 2Maneeni Waaqa iti kad'atani keesaa isani yaasani. Tana male, hojjaani ind'ufti ta nami isani ijeesu waan Waaqaa hojatu ufi sehu. 3Waan kana maro naafi Abba imbeenneefi isani tolchani. 4Ammo waan kana qara ya isaniti hime, aka yo guyyaani suni gahe, waan anini duri isaniti hime qaabattani.
Huji Lubbu Qulqullo
Waan kana anini gaafa qara isaniti inhimne, waan nu woliini jiruufi. 5Ammo amma gara nama na erge gala; isani keesa tokoleeni ka, Garami deemta? jed'e na gaafatu injiru. 6Taatule waan anini waan kana isaniini jed'eefi, la guddo lalefattani. 7Anini ammo dubbi d'uga isaniti hima: aka anini deemuti ira isani jira. Wonti akanatiifi yo anini indeemini, Qarqaarsi kaani isanii ind'ufu. Ammo yo anini deeme, anini isa isanii erga. 8Inni gaafa d'ufu, aka dabi jiruufi aka d'ugaani jirtuufi aka Waaqi wollaala namaati muru nama garsiise hubachiisa. 9Aka dabi jiru, waan worri d'ugefachu diduufi; 10aka d'ugaani jirtu, waan anini gara Abba d'aquufi, duuba isani iti deebitani na inargitani; 11aka Waaqi wollaala namati muru, waan hayyu lafa tana wollaala iti muraniifi.
12Anini ammalle waan heddu ta isaniini jed'u qaba, ammo amma dandeetani imfud'attani. 13Taatule hojja Lubbuuni d'ugaa d'uftu, isiiti waan d'ugaa iti isani qajeelcha. Isiini waan ufi indubbatu, ammo waan d'ageete ch'ufa dubbatti, waan eegi tana d'ufale isaniti himti. 14Isiini na guddifte waan kiyya fuute isani agarsiifti. 15Wonti Aabbooni qabu ch'ufti tiyya; tanaafi anini, isiini waan kiyya fuute isani agarsiifti isaniini jed'a.
Gammadafi lalefacha
16Eegi bulti diqo deebitani na inargitani; ammalle eegi bulti diqo deebitani na agartani. 17Jennaani jari isaa ka gari waan woliini jed'e, Wonti inni nuuni jed'u kunini maani? Inni, eegi bulti diqo na inargitani jed'a ammalle eegi bulti diqo deebitani na agartani nuuni jed'a, inni ammalle, waan anini gara Abbaa d'aqa jed'eefi akasi jed'e? 18Worri duuba waan jed'e, Wonti inni, Eegi buti diqo jed'e tunini maani? Waan inni jed'eefi imid'aafanne jed'ani. 19Yesoni aka worri isa gaafachu fed'u beennaani waan jed'eeni, Waan anini jed'e suni wolgaafattani? Ta, Eegi bulti diqo na inargitani, ammalle, Eegi bulti diqo deebitani na agartani jed'e suni? 20D'uguma, waan anini isaniini jed'u, Isani laalefattani bootani, ammo nami lafa igammada; isani ilaalefattani, ammo lalalti teesani garagalte gammada taati. 21Nad'eeni yo ch'ininfattu ilaalefatti, maro guyyaani isiini deetu gaheefi. Ammo eegi isiini ilme deete, deebite lalala suni inqaabattu, maro gammada daima lafati d'alteefi. 22Tanaafi isani amma lalala qabdani, ammo anini deebieti isani arga, garaani keesani ingammada, gammada keesani kana nami dandae isani ira imfud'atu.
23Guyya suni woma na ingaafattani. D'uguma, waan anini isaniini jed'u, Waan isani maqa kiyyaani Abba kad'attani ch'ufa inni isanii kenna. 24Arra durati taka maqa kiyyaani woma inkad'anne; kad'ad'a, inargattani, aka gammadi keesani qit'au.
Dabsacha lafa
25Waan kana anini mammaasaani isaniti hime. Guyyaani anini dandae mammaasaani isaniti indubbanne ind'ufa, ammo diideese waan Abba isani agarsiisa. 26Gaafasi maqa kiyyaani kad'attani; ammalle anini, Abba isanii kad'ad'a injed'u; 27wonti akanatiifi Abbaani ufiyu isani jaalata. Inni isani jaalata, waan isani na jaalattani aka anini gara Waaqaati d'ufe d'ugefattaniifi. 28Anini gara Abbati bahe lafati d'ufe; ammalle anini gara lafaati bahe Abbati deebia jed'e.
29Jari isaa waan jed'eeni, Ilaali, ati amma mammaasaani indubbattu ammo diideesite dubbatta. 30Ammatana aka ati waan ch'ufa beetu nu la hubanne; waan nami wo si gaafatuufi inqabdu. Waan kanaafi aka atini gara Waaqaati d'ufte d'ugefanna. 31Yesoni waan jed'eeni, Isani ammatana d'ugefattani? 32Ilaala, guyyaani isani gargari firfirfamtani ind'ufa, amma ya d'ufe; nami ch'ufti gargari firfirfame, koba na lakiftani. Ammo anini koba injiru; Abba wolumaani jirra. 33Waan kana anini ya isaniti hime, aka na keesa nagaya argattani. Lafa keesa d'ipu argattani, ammo garaa jabaad'a! Anini ya lafa dabsad'e.
Yesoni jara ufitiifi kad'ata
Currently Selected:
Yohana 16: BOR
Highlight
Share
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.
