Uumama 34

1Guyya toko Dina, intalti Yakobofi Lea, imaltu gara nad'eeni gosa Kanaani d'at'e. 2Duuba gurbaani toko, ka Shekemu jed'ani, ka ilma namicha gudda lafa suni, ka gosa Hivi, ka Hamori jed'ani, isi arge jennaani qabe buufate. 3Ammo intalti sunini guddo mid'aadi arge jennaani jaalate isi dubbifate, 4waan abbaani jed'e, Anini aka atini intala Yakobo na kad'attu fed'a.

5Yakobooni aka intala isaa fafeesani d'agaye, ammo maro ijoolleeni isaa ala tikha jirtuufi woma tokole tolchu dide, haga isiini galtuti. 6Abbaani Shekemu Hamoriini Yakobooni haasau d'aqe. 7Ijoolleeni Yakobo ala galte waan hammaate d'ageennaani aka hama rifatte guddo dallante, waan Shekemuuni intala worra buufate gosa Israeli miid'eefi. 8Hamoriini waan Yakobooni jed'e, Gurbaani kiyya Shekemuuni ya guddo intala tante jaalate, anini si kad'ad'a intala naa kenni. 9Koota, wold'ageenna, aka nu dubra teesani fuune, isanileeni dubra teenna fuutani. 10Duuba isanileeni lafa teenna keesa fulluma feetani nagayaani teetani, aka feetani dilaaltani horile horattani.

11Shekemuuni waan abba Dinatiifi oboleyaani isiitiini jed'e, Waan kana naa tolcha, duuba anileeni waan isani feetani isanii tolcha. 12Waan feetani nati himad'a, ammalle hori qarat'a ka anini isanii baasu, haguma feetani nati himad'a; anini waan isani feetani ch'ufa isanii kenna, yo isani intala teesani ch'alla nati gurgurtani.

13Ilmaani Yakobo, waan Shekemuuni oboleeti worra Dina fafeeseefi, Shekemufi abba isaa Hamori sobde lafaa balleesite. 14Waan worri jed'eeni, Oboleeti teenna nami qabanqaba inqabatini imfuud'u; sunini nuu waan ch'eeraati. 15Yo isani qabanqaba qabattani aka keenna taatani ch'alla intala teenna fuutani, 16nuleeni teesani fuuna. Nu woluma keesa qubanne nama takaa taana. 17Yo isani dubbi teenna diddani qabanqaba qabachu baattani, nu intala teenna fud'anne isani iraa godaanna.

18Hamorifi gurbaani isaa Shekemuuni dubbi tana maachani, 19duuba gurbaani hojuma suni gale, waan intala Yakobo jaalateefi, waan Tahi jed'aniini ch'ufa tahe. Inni worra isaani keesa guddo gurra qaba.

20Hamorifi ilmi isaa Shekemuuni fulla fullo dira suni d'aqani waan biyyaani jed'ani, 21D'iiro, worri kuni worra nagayaati, ha lafa teenna keesa taani fulla fed'ani godaanani. Lafti ballo, wolti nuu geeti. Koota, dubra worra fuune, worrileeni ha teenna fuud'u. 22Yoi worri kuni nu woliini tae nu worra taka taanu, yo nuleeni, aka worra, nama d'iira ch'ufa, qabanqaba qamnuufi. 23Hori worraatifi wonti worri qabu ch'ufti teenna intaatu? Koota, wold'ageenna, aka worri nu woliini tau. 24Worri lafa suni ch'ufti dubbi Hamoritiifi gurba isaa gula gale, nama worra ka d'iira ch'ufa qabanqaba qabani.

25Guyya sadeeso, ato madaani kolaante jiitu, ilmaani Yakobo ta oboleyaani Dina lama, Simeonifi Lawiini, goraade guuratte d'ossaani dira suni duudde, nama d'iira ch'ufa fit'e, 26Shekemufi abba isaale. Duuba Dina mana Shekemu keesaa fuud'ani itiini d'aabatani. 27Nami d'iira ch'ufti hobaanaani ilmaani Yakobo dachaate dira suni soqatte, waan ch'ufa guuratte, aka haalo oboleeti worra ta fafeesani baaftu. 28Ree, looni, harrefi waan dirafi oobru keesati argani ch'ufa fud'atani. 29Waan worri qabu ch'ufa fud'atani, nad'eenifi ijoolle boojiani, waan mana keesati argani ch'ufa itiini d'aabatani.

30Yakobooni waan Simeonifi Lawiini jed'e, Ya gaargala natiini d'uftani; amma tana maqa kiyya ya gosa Kanaanitiifi gosa Perizitiifi nama ch'ufa ka lafa tana keesa jiruti ajeesitani. Nami kiyya diqa; yo worri kuni ch'ufti kalchaani na had'e, worra keenna ch'ufa imballeesani. 31Ammo worri waan jed'eeni, Nu nama oboleeti teenna aka sharmut'a iti tabatu iti lakimna?

Aka Waaqi Yakobo Betheliti eebise

Currently Selected:

Uumama 34: BOR

Highlight

Copy