Uumama 25

1Abrahamuuni niiti d'ibi ta Ketura jed'ani fuud'e. 2Ijoolleeni isiini d'alteefi Zimrani, Yokshani, Medani, Midiani, Ishbaki ammalle Sua. 3Yokshaniini abba Shebafi Dedani; ijoolleeni Dedani gosa Shuriti, gosa Letushitiifi gosa Leumi. 4Ijoolleeni Midiani Efa, Eferi, Hanoki, Abida, ammalle Eldaa. Tuni ch'uftinu haguma geetunu ijoolle Ketura.

5Abrahamuuni waan qabu ch'ufa Isaaqoo lakise; 6ammo gaafa jiru ijoolle isaa ta nad'eeni isaa d'ibiini, Sara male, d'alteefi hand'ura naqeefi. Duuba eegi suni ijoolle isaa taani ch'ufa, Isaaqo male, ilaboruti ufiraa godaanise.

Duisafi awaala Abrahamuu

7-8Abrahamuuni eegi jaare hobae, ganni isaa d'ibba tokofi torbatami shani gahe jennaani dulloome. 9Ijoolleeni isaa Isaaqofi Ishmaeliini goda Makpela ka diida Mamre ilaboru jiru, keesati awaalte. Diida suni duri ka Efroni ilma Sohari, ka gosa Hiti. 10#Uum 23.3-16 Diidi suni ka Abrahamuuni duri worra gosa Hiti iraa bite; Abrahamufi Sarale achumati awaalani. 11Abrahamuuni due jennaani Waaqi guddo ilma isaa Isaaqo, ka gaafasi worri isaa fulla Eela Beer-Lahai-Roi jiru eebise.

D'aloota Ishmaeli

(1 Odu duri 1.28-31)

12Ishmaeliini, ka Hajiriini tisseeni Sara ta gosa Misiri Abrahamuu d'alte, 13ijoolle tana d'ale. Maqaani worra, ka aka worri wolgula d'alateeni t'aafani, kana: Nebayothi, Kedari, Adbeeli, Mibsamu, 14Mishma, Duma, Masa, 15Hadadi, Tema, Yeturi, Nafishi, Kedema. 16Ijoolleeni tunini abbooti gosa kud'ani lama, ta ollafi arda worrale ch'ufa maqa worraa gula yaamani. 17Ishmaeliini, gaafa inni due, ganni isaa d'ibba tokofi sodomi torba. 18Ilmaani Ishmaeli lafa Havilafi Shuri jiddu, d'aatu kara Ashuru, ka Misiriini ilaboru, teete. Worri ilmaani Abrahamu taani d'ibi hanqate qofa godaane.

D'aloota Esautiifi Yakobo

19Oduuni tuni ta Isaaqo, ilma Abrahamu. 20Isaaqooni, gaafa inni Rebeka fuud'e ganni isaa afurtama. Isiini dubra Bethueli, ka gosa Aramu, ka lafa Mesopotamia, maqaani oboleesa isiileeni Labani. 21Isiini ato ijoolle ind'aliini guddo deemte jennaani Isaaqooni guddo Waaqa kad'ateefi. Waaqi kad'a isaa d'agaye, Rebekaani garaachoofte. 22Isiini lakoole garaa qabdi, ammo ato isiini ind'aliinu ijoolleeni garaa keesati wolwolaante. Rebekaani waan jette, Bada, wonti akana ka nati bue kunini maani? Duuba d'iba isii suni Waaqa gaafatte.

23 # Rum 9.12 AABBO Waaqi waan jed'eeni,

Gosa lamati garaa kanke keesa jira;

atini ijoolle lama ta wolimfeene d'alta,

toko kaani ira jaba,

guddaani hojattu diqa taha.

24Guyyaani ala hobae jennaani Rebekaani ijoolle lakoole lama d'alte. 25Ka qara d'alate diima d'iiga, nafi dabassa, tanaafi maqa Esau baasanifi. 26Ka lameeso hirba Esauti qanch'oorfate d'alate, tanaafi maqa isaa Yakobo baasani. Gaafa ijoolleeni tuni lamaani d'alatte, ganni Isaaqo jaatama.

Aka Esauuni angafooma isaa gurgurate

27Ijoolleeni lachu gugurdatte, Esauuni nama adamo dansa ka waan ala jaalatu tahe, ammo Yakobooni nama ch'allisa worra imbaane tahe. 28Isaaqooni, ka fooni bineensa ala guddo jaalatu, Esau jaalate, ammo Rebekaani Yakobo ira jaalatte.

29Guyya toko ato Yakobooni sagale d'aabachu jiru, Esauuni, ka beela qabu, adamo gale 30waan Yakobooni jed'e, Anini beelaa injiru, waan diimtu d'aabu jirtu suni naa kenni. (Suni gula Esauuni Edomu jed'ani.)

31Yakobooni waan jed'eeni, Hojja atini angafooma kanke naa gurgurte, sii kenna. 32Esauuni waan jed'eeni, Hayye dansa, anini ufuftu diquma beelaani induiini, angafoomi kiyya maani na bahaniti?

33 # Ebr 12.16 Yakobooni waan jed'eeni, Qara ato anini sagale sii inkennine kakhad'i, aka angafooma naa kennitu. Esauuni aka angafooma Yakoboo kennu kakhate. 34Jennaani Yakobooni qit'afi fuutole kenneefi. Esauuni fuuto d'uge, qit'a ufii nyaate kae iti d'aabate. Akanaani Esauuni angafooma isaa tufi gula d'abe.

Aka Isaaqooni lafa Gerari tae

Currently Selected:

Uumama 25: BOR

Highlight

Copy