MARIKO 16

Yesu Yisimushitswa Khurula mu Likhutsa

(Mat 28:1-8; Luka 24:1-12; Yoh 20:1-10)

1Lwa litukhu li Lisabato liali niliakhavira, Mariya Magadalena, nende Mariya mama wa Yakobo, nende Solome vakuula makura kahuunyanga mwayu mulahi, nivatsia khuvekha khu mmbili kwa Yesu. 2Nukushili mu mavwevwe khulitukhu lia Jumapili, liuva niliakharula ivukwi, vasimukha nivatsia khu shilindwa. 3Vareevana vene khuvene, “Ni viina wanakhukhonye khukolongominya lichina khurula mu vwinjililu vwi shilindwa?” 4Navutswa lwa vaheenza ikulu, valola lichina likali, nilikolongominywi khale. 5Khulwa yako, vinjila mu shilindwa, nivalola muyayi muvukha niyifwali ikaanzu indavu niyikhale khuluveka lu mukhono musatsa; nivava nilichenya muno.

6Yavavoolela, “Mukhachenyi tawe; manyi ndi mukhavanga Yesu wa Nazareti, wavambwa. Shiali hanu tawe; wisimushitswi khurula mu likhutsa! Loli, hanu naho ha vali nivamura. 7Navutswa, simushi mutsi muvoolele veechi veve, khali Petro, ‘Aranganga khutsia imbeli wenyu mu lusomo lwa Galilaya, numushili khutukhayo; muliitsa khumulolayo, khuli yali niyamuvoolela.’ ”

8Vakhali venavo vasimukha nivatsia, nivilukhaka khurula ha shilindwa nu vuri nu khutechela. Shivavoolelakhu mundu wosi shindu shiosi tawe, shichila vali varia.

Yesu Yalolekha khu Mariya Magadalena

(Mat 28:9-10; Yoh 20:11-18)

[ 9Lwa Yesu yali namali khwisimukha khurula mu likhutsa nu kushili mu mavwevwe khulitukhu lia Jumapili, yalolekha lukhuraanga khu Mariya Magadalena, wa yali niyakhungamu matimoni saba. 10Khulwa yako, Mariya Magadalena yasimukha natsia navoolela yavo vali nivavele naye, lwa vikhulanga nivalila. 11Lwa vahulila navoolanga ndi Yesu ashili mwoyo, khandi umali khumulolakhu, vambakhana khumusuuvila.

Yesu Yalolekha khu Veechi Veve Vavili

(Luka 24:13-35)

12Yaka nikamali khwikholekha, Yesu yalolekha mu likoondo lukanu lundi khu veechi vandi veve vavili, nivali khunjila nivatsitsanga mu shivala shiavo. 13Vakalukhayo nivavoolela veechi vandi; navutswa vambakhana khuvasuuvila.

Yesu Yalolekha khu Veechi Veve Likhomi na Mulala

(Mat 28:16-20; Luka 24:36-49; Yoh 20:19-23; Vikh 1:6-8)

14Lukhumalilikha lwene, Yesu yalolekha khu veechi veve likhomi na mulala lwa vali nivaliitsanga shiukhulia. Yavakondeshela, shichila shivali ni lisuuvila khandi shichila vali ni mioyo mitiinyu khusuuvila yavo vamulola namali khwisimushitswa khurula mu likhutsa.

15Yesu yavavoolela, “Simushi mutsi shia havundu hosi mu shivala, mwilwatse Ivanjeli khu vandu voosi. 16Shia mundu wosi uliitsa khusuuvila, nu khubatiswa, aliitsa khuhonyinywa; navutswa mundu uliitsa khwambakhana khusuuvila, aliitsa khukhalachilwa. 17Vandu vasuuvila valiitsa khuheelwa tsingulu tsiu khukhola viloleshitsu. Valiitsa khukhunga matimoni khuvirila mu lira lianje khandi valiitsa khulomolomela mu tsinomonomo tsinjeni; 18niiva valiitsa khukumila khu tsinzukha inoho khung'wa isuumu yosi, shivanyala khusalila tawe. Valiitsa khuvikha makhono kavo khu vandu valwala, nivahona.”

Yesu Yahilwa Mwikulu

(Luka 24:50-53; Vikh 1:9-11)

19Lwa Mwami Yesu yali namali khulomoloma khuvo, yahilwa mwikulu, niyikhala khuluveka lu mukhono musatsa kwa Nyasaye. 20Veechi veve vasimukha nivatsia khwilwatsa shia havundu hosi, ma Mwami nahinzila navo. Yamanyinya likhuva lielie ni liatoto khuvirila mu viloleshitsu via vakhola.]#16:20 Mahandiko malala kakhale nende likalukhanyinya liakhale kavula tsimbaso 9-20.

LIMALILA LINDI LIAKHALE

[ 9Vakhali vasimukha nivatsia khu Petro na valina veve, nivavavoolela muvwimbi shia shindu shiosi shia vali nivamali khuvoolelwa. 10Yaka nikamali khwikholekha, Yesu mwene yaruma veechi veve khutsia ivukwi nende imbo, khwilwatsa likhuva litakatifu khandi lichilanga vandu ni vahonyinywa mihika ni mihika.]#16:10 Mahandiko malala kakhale nende likalukhanyinya liakhale, nu vwimbi vwi limalilikha yili, khumeeta khulimalilikha liraambi li tsimbaso 9-20.

Currently Selected:

MARIKO 16: LLLCATHOLIC

Highlight

Copy