LUKA 6

Lireevo Khulitukhu li Lisabato

(Mat 12:1-8; Mk 2:23-28)

1Khulituhu lindi li Lisabato, Yesu yali nachendanga nakhalakanyila mu milimi chia varaakamu inganu. Veechi veve varaanga khwamula imu yi inganu nivavunga mu makhono kavo khandi nivalia. 2Navutswa Vafarisayo valala vareeva, “Shichila shina mukholanga ka Malako keru kambakhananga kavulwi khukholwa khulitukhu li Lisabato?”

3Yesu yavachipa, “Mushili khusomakhu shindu khulondokhana khu ka Daudi yakhola, mumatukhu ka ye halala na vandu va yali navo vali nivali ni inzala? 4Daudi yinjila mu inzu ya Nyasaye, navukula mukati mutakatifu, nakulia khandi nahaakhu khali vandu vali nivali naye. Mundu avulakhuho wali nu vunyali vu khulia mukati kwenoko, navutswa ni vasalisi vonyene vanyala khukulia khulondokhana khuli Malako keru kavoolanga.”

5Yesu yavavoolela, “Mwana wu Mundu neye uli nu vunyali khulitukhu li Lisabato.”

Yesu Yahonyinya Mundu Walema Mukhono

(Mat 12:9-14; Mk 3:1-6)

6Khulitukhu lindi li Lisabato, Yesu yinjila mu lisinagogi niyechitsa. Mundu yalimu wu mukhono kwekwe musatsa kwali nu kwalema. 7Vechitsi va Malako nende Vafarisayo valala vaheenza valole niiva Yesu anyala khumuhonyinya khulitukhu li Lisabato, nikanyalikha vanyole shivune shinyala khuchila vamuyaale. 8Navutswa Yesu yamanya ka vakanakananga, navoolela mundu wali niyalema mukhono mwenoyo, “Hamba wusinjile hanu.” Mundu mwenoyo yitsa nasinjilaho. 9Yesu yavareeva, “Mureevanga, Malako keru kahuchililanga khukhole khulitukhu li Lisabato vindu vilahi inoho vindu vitamanu, khuhonyinya vulamu inoho khutivitsa?” 10Khulwa yako, Yesu yishevukha navaheenza voosi; navoolela mundu mwenoyo, “Kololoshitsa mukhono kwokwo.” Mundu mwenoyo yakukololoshitsa, nu kuhona.

11Navutswa veechitsi va Malako nende Vafarisayo vali nu vurima, nivaraanga khureevana vene khuvene ka vanyala khukhola Yesu.

Yesu Yarovola Varumwa Likhomi na Vavili

(Mat 10:1-4; Mk 3:13-19)

12Mumatukhu kenako, Yesu yasimukha natsia khusaala khu shikulu, namalayo vutukhu vwosi nasaalanga khu Nyasaye. 13Lwa vwali nu vwakhashia mu mavwevwe, yalaanga veechi veve, narovolamu likhomi na vavili, va yalaanga Varumwa: 14Simoni (wa yakulikha lira Petro) nende amwavo wewe Andereya; Yakobo nende Yohana, Filipu nende Batsolomeyo, 15Matayo nende Tomasi, Yakobo mwana wa Alufayo, nende Simoni wakwanilanga shivala shieshie, 16Yuda mwana wa Yakobo, nende Yuda Isikarioti, wamanya natsama Yesu.

Yesu Yechitsa khandi Nahonyinya Vandu Vanyishi

(Mat 4:23-25)

17Lwa Yesu yali namali khwikha hasi khurula khu shikulu, yasinjila mu lwomera, halala ni shituma shia veechi veve vanyishi. Shituma shikali shia vandu valiho khurula mu lusomo lwa Yudeya khandi khurula Yerusalemi khandi mu mataala ka Tiro nende Sidoni,#6:17 mataala ka Tiro nende Sidoni: kanyolekhanga ivukwi wi Inyanza ya Meditarenia. kali khuluchinga lwi inyanza. Valiyo khuhonyinywa khurula mu vulwale vwavo. 18Vandu va matimoni kanyashitsanga vitsa nivahonyinywa khandi. 19Shituma shia vandu voosi vachelitsa khumutiilakhu, shichila tsingulu tsiarulanga muye ni tsivahonyinya voosi.

Khuyaanza nende Khuvelela

(Mat 5:1-12)

20Yesu yaheenza khu veechi veve navoola,

“Muli ni ikhaavi munyi vamuli vamanani;

shichila vwami vwa Nyasaye nu vwenyu.

21“Muli ni ikhaavi munyi vamuhulilanga inzala nunundi,

shichila muliitsa khwikuritswa.

Muli ni ikhaavi munyi vamulilanga nunundi;

shichila muliitsa khusekha numuli nu vuyaanzi.

22“Muli ni ikhaavi lwa vandu vamuhimanga, vamwambakhana, vamunyeka, khandi vavoola vindu vitamanu khulondokhana khu munyi, shichila Mwana wu Mundu! 23Mwikhoye khandi muve nu vuyaanzi khulitukhu lienelo, shichila shihanwa shia muliitsa khurungwa mwikulu ni shikali; nindio khandi vakuuka vavo vakholela vaprofeti.

24“Navutswa muli khuvutiinyu munyi vamuli vahinda nunundi,

shichila mwamala khuleminywa mioyo khale.

25“Wooyi! Muli khuvutiinyu munyi vamwikura vinyishi nunundi;

shichila inzala iliitsa khumumala!

Muli khuvutiinyu munyi vamusekhanga nunundi;

shichila muliitsa khwikhula numulila!

26“Wooyi! Muli khuvutiinyu munyi va vandu voosi vamwitsominyanga,

shichila nindio khandi vakuuka vavo vakholela vaprofeti vu vuvehi.

Muyaanze Vatsiku Venyu

(Mat 5:38-48; 7:12a)

27“Navutswa muvoolelanga munyi vamumbulilanga ndi muyaanze vatsiku venyu, khandi mukholele yavo vamuhimanga malahi. 28Mukasitsi yavo vamulaamanga, musaalili yavo vamukholelanga vindu vitamanu. 29Niiva mundu alamusamula lukhovi khuluseye, mumuhe luseye lundi khandi; niiva mundu aliitsa khuvukula likoti lienyu, mumuleshe avukuli lishati khandi. 30Mundu namusava shindu mumuhe; khandi lwa mundu wundi avukulanga shindu shienyu, mukhareevi amukalushitsili tawe. 31Mukholele vandi khuli munyi mwenyanga vo vamukholele khandi.

32“Niiva mulayanza vandu vamuyaanza vonyene vutswa, nu vukhala shina vwa muli navwo? Khali vandu vooni vayaanza yavo vavayaanza. 33Niiva mulakholela malahi vandu vamukholelanga malahi vonyene vutswa, nu vukhala shina vwa muli navwo? Khali vandu vooni vakholanga ndio. 34Niiva mulahaana shindu khu vandu va mwenyanga valimurunga, nu vukhala shina vwa muli navwo? Khali vandu vooni vahaananga khu vandu vooni, mavenya varunjwi mu vunyishi khandi. 35Navutswa muyaanze vatsiku venyu, khandi muvakholele malahi. Muhaane vuchila khukalushitsilwa; ma murungu kwenyu kuliva mukali. Muliitsa khuva vaana va Nyasaye Uli Ikulu khu Viosi, shichila nu mulahi khu vandu vambakhananga khusanditsa nende viimani. 36Muve vandu vi tsimbavasi, khuli Tata wenyu ali wi tsimbavasi.

Muvuli Khukhalachila Vandi

(Mat 7:1-5)

37“Muvuli khukhalachila vandi, khu Nyasaye alivula khumukhalachila; muvuli khutula vandi, khu Nyasaye alivula khumutula; musemehe vandi, Nyasaye alimusemeha. 38Muhe vandi, khu Nyasaye alimuha. Ni kilikali, muliitsa khunyola shipimu shitushili, vukhonyi nu mwoyo mulala, nu vwitsule mu makhono kenyu -- vwosi vwa munyala khukasitswa navwo. Shipimu shiamupimilamu vandi, nashio shia Nyasaye aliitsa khumupimilamu.”

39Yesu yavavoolela lukanu yulu: “Mundu muvekhu anyala khwimililakhu muvekhu wundi? Shivanyala khukwa voosi vavili mu vwina? 40Mwechi shiali mukali khuvira mwechitsi wewe tawe; navutswa mwechi wosi namali khwechitswa aliitsa khuva khuli mwechitsi wewe.

41“Khulwa yako, shichila shina ulolanga khasala khali mumoni ya amwavo wowo, navutswa shiunyala khulola kusala kuli mumoni yoyo tawe? 42Inoho wakhavoolela ndi amwavo wowo, ‘Mwana weru, lekha khurulitsi khasala khali mumoni mwomwo,’ navutswa yivi mwene shiunyala khulola kusala kuli mumoni mwomwo tawe? Yivi wikhola kholitsanga khuva wi likhola liu vulunji! Raanga khurulitsa kusala kuli mumoni mwomwo, khu ulole vulahi vwene khuli urulitsa khasala khali mumoni ya amwavo wowo.

Musala na Matunda Kakwo

(Mat 7:16-20; 12:33-35)

43“Musala mulahi shiukwamanga matunda matamanu, inoho musala mutamanu matunda malahi tawe. 44Shia musala kwosi kwamanyikhana, shichila matunda kakwo; shichila matunda ku mukhuyu shikanyala khwatuulwa khurula khu misala chia mavwa; inoho matunda ki misabibu khwatuulwa khurula khu marakalu tawe. 45Mundu mulahi ali ni vindu vilahi mu livishilu liu mwoyo kwekwe makhola vindu vilahi; khandi mundu mutamanu ali ni vindu vitamanu mu livishilu liu mwoyo kwekwe makhola vindu vitamanu. Mundu alomolomanga khulondokhana khu kali nako mu mwoyo kwekwe.

Vumbashi Vavili vi inzu

(Mat 7:24-27)

46“Khulwa yako, shichila shina munaanganga, ‘Mwami, Mwami,’ navutswa mwayambakhana khukhola kamuvoolelanga? 47Shia mundu wosi unondanga mahulila makhuva kaanje nu khukakhola, niitsa khumumanyinya khuli ali. 48Ali khuli mundu yumbakhanga inzu yeye, ayeevanga hasi mulilova khura musinji kwekwe khu lwanda. Lwa michelelo chia matsi chiitsa chiachelitsa khupomola inzu yeneyo, navutswa yakhaywa khukwa, shichila yali niyumbakhwa vulahi. 49Navutswa mundu uhulilanga makhuva kaanje khandi avula khukalonda, ali khuli mundu yumbakhanga inzu yeye vuchila khuyeeva musinji; lwa michelelo chia matsi chiakholomokha, chiahilana inzu yeneyo vwangu, nikwa hasi yosi!”

Currently Selected:

LUKA 6: LLLCATHOLIC

Highlight

Copy