LUKA 22
22
Liloshitsa liu Khwiira Yesu
(Mat 26:1-5; Mk 14:1-2; Yoh 11:45-53)
1Litukhu liali nilili himbi khutukha liu khukhola Mulukha Kukhulia Mukati kwalombwa vuchila Mamela, kwalaangwangwa Mulukha kwa Pasaka. 2Vasalisi vakali nende veechitsi va Malako vali ni vakhavanga khuli vanyala khwiira Yesu; navutswa varia vandu.
Yuda Yahuchilila Khutsama Yesu
(Mat 26:14-16; Mk 14:10-11)
3Khulwa yako, Shetani yinjila mu Yuda, walaangwangwa Isikarioti, wali mulala khu veechi likhomi na vavili. 4Yuda yasimukha natsia khulomoloma na vasalisi vakali nende vandu vasinjililanga valindi vi Litempeli makhuva khulondokhana khuli anyala khutsama Yesu khuvo. 5Vali nu vuyaanzi vunyishi, nivirulitsa khumurunga tsisenti. 6Yuda yahuchilila khukhola ndio, naraanga khukhava vwiyangu vulahi vu khutsama Yesu khuvo, vuchila shituma shia vandu khumanya ka yenyanga khukhola.
Yesu Yirechekha Khulia Shiukhulia Shia Pasaka na Veechi Veve
(Mat 26:17-25; Mk 14:12-21; Yoh 13:21-30)
7Litukhu liatukha liu khukhola Mulukha Kukhulia Mikati Chialombwa Vuchila Mamela, lwa vasinzanga vimeme via makondi ku khukholela musango ku Mulukha kwa Pasaka. 8Yesu yaruma Petro nende Yohana, navoola, “Tsi mwirecheshitsi shiukhulia shiu Mulukha kwa Pasaka.”
9Vamureeva, “Ni hena ha wenyanga khutsi khwirecheshitsa?”
10Yesu yavachipa, “Lwa muliitsa khuva numwinjilanga mu litaala likali, mulavukana nu mundu nachinji matsi mushivuyi; mumulonde khutukha mu inzu yayinjila; 11muvoolele mwene inzu, ‘Mwechitsi areevanga, Ni hena wa inzu ya veechi vaanje nende inzi khuliilamu shiukhulia shiu Mulukha kwa Pasaka?’ 12Aliitsa khumumanyinya vwiyangu munzu ingali yikolofa yarecheshitswa vulahi. Murecheshitsili mwenomo.”
13Vasimukha nivatsia, nivanyola vindu viosi khuli Yesu yali navavoolele; nivarecheshitsa shiukhulia shiu Mulukha kwa Pasaka.
Shiukhulia shiu Mwami Shiukhumalilikha
(Mat 26:26-30; Mk 14:22-26; 1 Vakor 11:23-25)
14Lwa isaa yali niyakhatukha, Yesu yikhala hamesa khulia shiukhulia na varumwa veve. 15Yesu yavavoolela, “Nayikomba muno khulia shiukhulia shiu Mulukha kwa Pasaka yishi na munyi nishili khunyakhana! 16Muvoolelanga ndi shinzitsanga khuliakhu khandi#22:16 Mahandiko Matakatifu kandi kakhale kavoolanga “Shinzitsanga khuliakhu khandi tawe.” Shiukhulia shia Pasaka, nikashili khurweshitswa mu Vwami vwa Nyasaye tawe.”
17Nalwo lwa Yesu yavukula shikombe shilimu ni idivai, nasanditsa Nyasaye, navoola, “Vukuli shikombe shi idivai yishi, mukavane vene khuvene. 18Muvoolelanga ndi khuraanjila nunundi shinzitsanga khung'wakhu khandi idivai yiyi, Vwami vwa Nyasaye nuvushili khwitsa tawe.”
[ 19Yesu yavukula shitonye shiu mukati, nasanditsa Nyasaye, natong'olanyinya, naha veechi veve, navoola, “Yuku nakwo mmbili kwanje, kwahaanwa shichila munyi; mukhole yaka khunzitsushitsa.” 20Munjila indala yeneyo, nivakhalia shiukhulia shiukhumalilikha, Yesu yavukula shikombe shilimu ni idivai navoola, “Yishi ni shikombe shi lilakano liyia lia Nyasaye, liahambanyinywa na masahi kaanje, kasuundulwa shichila munyi.]#22:20 Mahandiko Matakatifu kandi kavula makhuva ka Yesu niyakhamala khuvoola, “Yuku nakwo mmbili kwanje” khuli muluvaso 19 khandi luvaso lwosi lwa 20.
21“Navutswa, loli! Mundu unzamanga ali hanu khu imesa khuliitsanga shiukhulia naye! 22Mwana wu Mundu atsitsanga khukhutsa khuli Nyasaye yaviritsa kalikholekha, navutswa mundu utsitsanga khumutsama ali khu vutiinyu muno!”
23Khulwa yako, veechi varaanga khwireevana vene khuvene ni viina khuvo wali natsitsanga khukhola ndio.
Ni Viina Mukali Muno
24Veechi va Yesu varaanga khuhangalitsana mulilomoloma vene khuvene nivareevana ni viina unyala khuva mukali muno muvo. 25Yesu yavavoolela, “Vami va vandu vi tsimbia tsindi vali nu vunyali khuvo; khandi yavo vali nu vunyali khuvo vilaanganga vene ‘Valina va Vandu.’ 26Navutswa kenako kavuli khwikholekha mu munyi. Nikhali, mukali muno mu munyi aliitsa khuva khuli mutititi; khandi mwimilili ave khuli murumishi. 27Ni viina mukali, mundu uliitsanga shiukhulia inoho mundu uhaananga shiukhulia? Toto, nu mundu uliitsanga shiukhulia. Navutswa ndi mu munyi khuli murumishi.
28“Mwamenya ninzi mu matiinyu kaanje koosi. 29Mukavilakhu nunundi vwami, khuli Tata wanje yangavilakhu, 30khu mulilia shiukhulia khandi muling'wa hamesa hanje mu Vwami vwanje; khandi mulikhala mu visoko viu vwami numukhalachila tsimbia likhomi na tsivili tsia Israeli.
Yesu Yavoola Kushili Khuli Petro Amwambakhana
(Mat 26:31-35; Mk 14:27-31; Yoh 13:36-38)
31“Simoni, Simoni! Hulishitsa! Shetani umali khuhuchililwa khumuchelitsa munyi voosi, khwahukhanyinya vali valahi khurula mu vatamanu, khuli mulimi yahukhanyinyanga inganu khurula mukhulio. 32Navutswa mali khukhusaalila uvuli khuva ni lisuuvila liteteshele; khandi nu wakhakalukha khwinzi, tinyilitsa vasuuvili voshio mwoyo.”
33Petro yavoolela Yesu, “Mwami, nzirecheshe khutsia nivi mucheela, khali khukhutsa.”
34Yesu yamuvoolela, “Petro, khuvoolelanga ndi itaywa nishili khulakula vutukhu vunu ulavoola hali khavaka wangorwa.”
Shiveti, Shisiko, nende Shishavi
35Nalwo lwa Yesu yareeva veechi veve, “Lwa namuruma mumatukhu kenako khutsia, vuchila shisiko shi tsisenti, musiko nende vilaaro, ni shina shia mwali nu mwacheheelwakhu?” Vachipa, “Khuvulakhu shindu shia khwacheheelwa.”
36Yesu yavavoolela, “Navutswa nunundi, leshi mundu uli ni shisiko shi tsisenti inoho musiko akuvukule. Leshi khandi mundu uvula shivavi akuulitsi likoti lielie akuule shivavi. 37Muvoolelanga ndi Mahandiko Matakatifu kavoolanga, ‘Yasanga mulinyakhana lia vandu vatamanu,’ khutukha karweshitswi khulondokhana khwinzi, shichila kahandikwa khulondokhana khwinzi kakwitsanga katoto.”
38Veechi vavoola, “Mwami, lola! Khuli hanu ni vivavi vivili.” Yesu yachipa, “Luvwele.”
Yesu Yasaala khu Shikulu shia Misayituni
(Mat 26:36-46; Mk 14:32-42)
39Yesu yasimukha narula mu litaala likali natsia khu Shikulu shia Misayituni khuli kwali mwiima kwekwe; ma veechi veve nivamulonda. 40Lwa yatukha havundu henaho, yavavoolela, “Musaale muvuli khukwa mu machelitso.”
41Yesu yisuundakhu hambeli hatititi wi lichina linyala khusiuvwa khurula khuvo, nasikama hasi naraanga khusaala; 42navoola, “Tata, niiva ni lienya liolio, rulitsa shikombe shi linyakhana yishi khwinzi; lia khava lienya lianje tawe; navutswa lienya liolio likholeshe.” [ 43Khulwa yako, injelosi yalolekha khuye khurula mwikulu nimuha tsingulu. 44Lwa yali nanyakhananga muno, yasaala nu mwoyo kwosi; khandi tsinjeli tsietsie tsialolekha khuli masahi nikaroonyanga hasi khu malova.]#22:44 Mahandiko Matakatifu kandi kakhale kavula tsimbaso 43 nende 44.
45Lwa Yesu yali namali khusaala, yakalukha khu veechi veve, nanyola vakonanga tsindolo, nivavelele mu mioyo; 46navareeva, “Shichila shina mukonanga? Vushi musindolo musaale khu muvuli khukwa mu machelitso.”
Yesu Yakumilwa
(Mat 26:47-56; Mk 14:43-50; Yoh 18:3-11)
47Yesu yali nashilomolomanga, lwa shituma shia vandu vatukhaho; vali vimililwi nu mundu walaangwangwa Yuda, mulala khu veechi likhomi na vavili. Yisuunda khu Yesu namutsunzuna khuluseye; 48navutswa Yesu yamureeva, “Yuda, utsamanga Mwana wu Mundu numutsunzuna khuluseye?”
49Lwa veechi va Yesu yali navo valola makhuva kali nikatsitsanga khwikholekha vareeva, “Mwami, khunyala khukwanila vivavi vieru?” 50Mulala khuvo yareema murukwa wu Mukali wa vasalisi voosi, namukutula shiroyi shieshie shisatsa.
51Navutswa Yesu yavoola, “Luvwele!” Yatiila khu shiroyi shienesho namuhonyinya.
52Khulwa yako, Yesu yavoolela vasalisi vakali nende vimilili va valindi vi Litempeli na vasakhulu vali nivatushiho khumukumila, “Shichila shina mwitsi ni vivavi nende vikong'o khungumila, khuli mundu munuuli? 53Lwa navetsanga na munyi shia khase khosi mu Litempeli, shiumwangumila tawe. Navutswa isaa yenyu yu khungumila neyo yinu, lwa tsingulu tsi shisuundi tsiamihanga.”
Petro Yavoola Shiamanyikhu Yesu Tawe
(Mat 26:57-58,69-75; Mk 14:53-54,66-72; Yoh 18:12-18,25-27)
54Vakumila Yesu nivamurulitsaho; nivamuhila mu inzu yu Mukali wa vasalisi voosi; ma Petro navalonda ihalekhu. 55Lwa vali nivakhahaambitsa mulilu hakari wu lwanyi khandi nivikhale halala, Petro yikhala navo. 56Mwana wi shikhana mulala khu varumishi yamulola ha mulilu mu vulavu; yamuheenza vulunji navoola, “Mundu uyu avele na Yesu!”
57Navutswa Petro yambakhana navoola, “Mukhali yivi, namukorwa!”
58Hari hatititi, mundu wundi yalola Petro khandi, navoola, “Yivi khandi uli mulala khuvo.” Navutswa Petro yachipa, “Mundu yivi, shindi mulala khuvo tawe.”
59Himbi isaa indala niyakhavira mundu wundi khandi yavoola, “Ni katoto mundu uyu yali na Yesu, shichila arulanga mu lusomo lwa Galilaya!”
60Navutswa Petro yavoola, “Mundu yivi, shimanyi makhuva kulomolomanga tawe!”
Lwa yali nashilomolomanga, itaywa yalakula vwangu. 61Mwami yishevukha naheenza Petro vulunji. Petro yitsushitsa makhuva ku Mwami yali niyamuvoolela, “Itaywa nishili khulakula nunundi, uliitsa khuvoola hali khavaka wangorwa.” 62Khulwa yako, Petro yasimukha natsia ilwanyi naraanga khulila.
Yesu Yakholelwa shihenye henye Manashiutwa
(Mat 26:67-68; Mk 14:65)
63Vandu vali nivalindi Yesu, vamukholela shihenye henye khandi nivamushuta. 64Vamuvoha ni shitambaya mu tsimoni tsietsie, nivamureeva, “Vuula! Ni viina ukhutuuyi!” 65Vamunyeka manyeko manyishi lukanu.
Yesu Yahilwa Imbeli wi Shikhaalo
(Mat 26:59-66; Mk 14:55-64; Yoh 18:19-24)
66Lwa vwashia mu mavwevwe, vasakhulu, vasalisi vakali, nende veechitsi va Malako vakana halala, ma Yesu nalerwa imbeli wi Shikhaalo. 67Vamureeva, “Khuvoolele, nivi Masiha?”
Yesu yavachipa, “Niiva namuvoolela, shiumunyala khusuuvila inzi tawe; 68khandi niiva namureeva lireevo shiumunyala khunjipa tawe. 69Navutswa khuraanjila nunundi Mwana wu Mundu aliitsa khwikhala khuluveka lu mukhono musatsa ku Mwami Nyasaye.”
70Voosi vamureeva, “Nivi Mwana wa Nyasaye toto?”
Yesu yavachipa, “Munyi vene navo vamuvoolanga ninzi ye.”
71Vareevana vene khuvene nivavoola, “Shiukhwenyi vashiahidi vandi tawe! Khutsi vene khumali khuhulila makhuva kavooli.”
Currently Selected:
LUKA 22: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
