LUKA 10

Yesu Yaruma Veechi Makhomi Saba na Vavili

1Matukhu mati nikamali khuvira, Mwami yarovola vandi makhomi saba na vavili,#10:1 makhomi saba na vavili: Mahandiko Matakatifu kandi kali “na makhomi saba.” navaruma shia vavili khutsia imbeli wewe mu shia litaala khandi shia havundu hosi wa yenyanga khutsia. 2Yesu yavavoolela, “Lichesa ni linyishi muno; navutswa isavu ya vachesi nindititi. Khulwa yako, khutukha musaale khu Mwami mwene lichesa ameete vachesi vu khuchesa mu mulimi kwekwe. 3Ruli hanu mutsi! Loli, murumanga khuli vimeme via makondi khutsia mu vihulukhu. 4Muvuli khuchingakhu shisiko shi tsisenti inoho musiko ku khusumilamu, inoho vilaaro; khandi muvuli khusinjilakhu khu muhaanda, nu khuha mundu milembe. 5Inzu yosi yamwinjilamu, ranji muvoole, ‘Milembe chive munzu yumu!’ 6Niiva mundu uleranga milembe amenyamu, milembe chienyu chiliitsa khuva naye; navutswa nakhamenyamu, milembe chienyu chiliitsa khumukalushila. 7Mwikhale munzu mwenomo, numulia nu khung'wa shiosi shia vamuha, shichila muhinzili utushili khurungwa; khandi muvuli khuhuya huyakhu khurula munzu yiyi numutsia mu yindi. 8Lwa mwinjila mu litaala liosi khandi vamwinjilitsi, muliitsa khulia shia valiitsa khuva nivamuheele, 9nu muhonyinya vandu valwala mu litaala lienelo nu muvavoolela, ‘Vwami vwa Nyasaye vumali khwitsa himbi na munyi?’ 10Navutswa lwa mwinjila mu litaala liosi, ma vandu vali mulio vambakhane khumwinjilitsa, tsi mu tsinjila tsi litaala lienelo numuvoola, 11‘Khali lukuushi lwi litaala lienyu luli mu vilenje vieru, khusukuyanga khumanyinya ndi mukholi shindu shitamanu; navutswa khutukha mumanye ndi Vwami vwa Nyasaye vumali khwitsa himbi na munyi.’ 12Muvoolelanga ndi Khulitukhu liu Khukhalachilwa, Nyasaye aliitsa khulolela tsimbavasi vandu vi litaala lia Sodomu khuvira litaala yili!

Mataala ka Vandu Vambakhana Khusuuvila mu Yesu

(Mat 11:20-24)

13“Munyi vandu vi litaala lia Korazini, muliitsa khuva khu vutiinyu muno! Munyi vandu vi litaala lia Betsesaida muliitsa khuva khandi khu vutiinyu muno! Niiva viloleshitsu viakholelwa mu munyi viakhakholelwi mu mataala ka Tiro nende Sidoni, khani vandu viweneyo vayikanila khale, nivikhale nivifwali tsinguvu tsia makunia khandi niviveshi likooshe. 14Navutswa Khulitukhu liu Khukhalachilwa, Nyasaye aliitsa khulolela tsimbavasi vandu va mataala ka Tiro nende Sidoni khuvira munyi. 15Munyi vandu vi litaala lia Kaperenamu, mukanakananga muliitsa khuheelwa vukhumi khutukha mwikulu? Muliitsa khusiuvwa hasi mu shihatisi!”

16Yesu yavoolela veechi veve, “Mundu umuhulishitsanga, ambulishitsanga. Mundu wambakhananga munyi, anzambakhananga. Mundu unzambakhananga, yambakhananga woyo wanduma.”

Khukalukha khwa Varumwa Makhomi Saba na Vavili khu Yesu

17Vandu makhomi saba na vavili vakalukha nu vuyaanzi vunyishi muno, nivavoola, “Mwami, khali matimoni kakhuhulila lwa khwalomoloma khuvirila mu lira liolio.”

18Yesu yavachipa, “Nalola Shetani niyakulukhanga khuli luheni nuluhemukhanga khurula mwikulu. 19Hulishitsi! Mali khumuha vunyali vu khuseenaka khu tsinzukha nende tsinge; khandi khukuura tsingulu tsiosi tsiu Mutsiku. Shindu shivulakhuho shilitsa khumusalilitsa munyi. 20Navutswa muvuli khusangala shichila matimoni kamuhulilanga, nikhali musangale shichila mira kenyu kahandikwa mwikulu.”

Yesu Yali nu Vuyaanzi

(Mat 11:25-27; 13:16-17)

21Mumatukhu kenako, Yesu yali nu vuyaanzi vunyishi vurulanga khu Roho Mutakatifu, navoola, “Tata, Mwami wi likulu nende lilova! Khusanditsanga shichila wavisa vandu vu vusitsa khandi vi limanya vindu yivi; navutswa wamanyinya vandu valolekhanga khuli vaana vatititi. Ni kilikali, Tata, kikholekha kario khulondokhana khu lienya liolio.

22“Tata wanje wamba shia shindu shiosi. Mundu avulakhuho wamanya Mwana, nikakhali Tata; khandi mundu avulakhuho wamanya Tata, nikakhali Mwana nende yavo vu Mwana arovola khumanyinya Tata”

23Nalwo lwa Yesu yishevukha veechi veve navavoolela muvwivisi, “Muli ni ikhaavi shichila muloli kamulolanga! 24Muvoolelanga ndi vaprofeti vanyishi nende vami vikombanga valole kamulolanga; navutswa vakhaywa khulola. Vali ni lienya liu khuhulila kamuhulilanga, navutswa vakhaywa khukahulila.”

Lukanu lu Musamaria Mulahi

25Mwechitsi wa Malako yasinjila nachelitsa khureeka Yesu, nareeva, “Mwechitsi, ni shina shianyala khukhola khunyole vulamu vwi mihika ni mihika?”

26Yesu yamuchipa, “Ni shina shia Mahandiko Matakatifu kavoolanga? Unyala khukasoma ndina?”

27Mwechitsi mwenoyo yachipa, “ ‘Uyaanze Mwami Nyasaye, uli Nyasaye wowo nu mwoyo kwosi, ni liiva liolio liosi, ni tsingulu tsiotsio tsiosi, nende tsinganakani tsiotsio tsiosi’; khandi ‘Uyaanze mureende wowo khuli mwene wiyaanza.’ ”

28Yesu yamuvoolela, “Uchipi vulahi muno; khola ndio utsililile khuva mwoyo.”

29Navutswa mwechitsi wa Malako, khulu khwikhola mwene khuva wi likhola liu vulunji, yareeva Yesu, “Ni viina mureende wanje?”

30Yesu yachipa, “Litukhu lindi, mundu yali nakholomokhanga khurula Yerusalemi natsia mu litaala lia Yeriko, ma vandu vanuuli nivamukumila. Vamufwalula tsinguvu tsietsie nivamurumula; vilukha nivamwivala narikalili lia ha mwoyo. 31Ikhaavi indahi, musalisi yali nakholomokhanga khu muhaanda kwenoko. Lwa yalola mundu mwenoyo yachenda navirila haluveka handi. 32Khali mundu warulanga mu vandu vu lwivulu lwa Levi yakhola ndio khandi. Lwa yalola mundu mwenoyo yachenda navirila haluveka handi. 33Navutswa Musamaria, wali khu luchendo lwelwe khu muhaanda kwenoko, yatukha ha mundu mwenoyo yali nali. Lwa yamulola, yamulolela tsimbavasi, 34natsia khuye khandi navekha makura nende idivai khu makuule ku mundu mwenoyo nakavoha. Yaninyinya mundu mwenoyo khu ipunda yeye namuhila mu inzu ya vacheni, wa yamulindila vulahi. 35Litukhu lialondakhu, yavukula tsidinari tsivili naha mulindi wi inzu ya vacheni. Yamuvoolela, ‘Umulinde vulahi; khandi shia shindu shiosi shia uliitsa khurumishila khuye, niitsa khukhurunga lwa ngalukha.’ ”

36Yesu yamureeva, “Ni viina khu vavaka venavo, wa ukanakananga yakhola khuli mureende watoto khu mundu wa vanuuli vakumila mwenoyo?”

37Mwechitsi wa Malako yachipa, “Mundu wamuvelela tsimbavasi.”

Yesu yamuvoolela, “Simukha utsi ukhole khuli lwa yakhola.”

Yesu Yacheniha Malita nende Mariya

38Lwa Yesu nende veechi veve vali nivali khu luchendo lwavo, vatukha mu muchitsi mwa mukhali walaangwangwa Malita yamwinjilitsa hango hehe. 39Malita yali nu mwana wi shikhana wavo walaangwangwa Mariya, wali niyikhale ha vilenje wu Mwami khandi nahulishitsa mechitso keke. 40Navutswa Malita yali niliheenda mwoyo nu muhinzilu kwosi kwa yakholanga. Yasimukha natsia khu Yesu namureeva, “Mwami, shiunyala khumbendelakhu mwoyo mwana wi shikhana weru unzivale kholanga muhinzilu kwosi wonyene tawe? Muvoolele akhonye.”

41Navutswa Mwami yamuchipa, “Malita, Malita, uheendanga mwoyo nunyakhana shichila vindu vinyishi; 42navutswa shindu shilala shionyene shia utushili unyole. Mariya urovole shindu shilahi; khandi shilitsa khuvula khurulitswa khuye.”

Currently Selected:

LUKA 10: LLLCATHOLIC

Highlight

Copy