LUKA 1
1
1Khu Theofilo,
Vandu vanyishi vachelitsi khuhandika makhuva khulondokhana khu vindu viakholekha mu khutsi. 2Vahandika makhuva khulondokhana khu ka khwavoolelwa na yavo valola vindu vienevo nivikholekhanga, khurula muliraanga khandi nivilwatsa likhuva. 3Khulwa yako, Yivi Theofilo, lwa inzi mwene mali khurunishitsa vulahi vwene khulondokhana khu vindu vienevo viosi khurula muliraanga, ndoli nu vulahi khu khuhandichilakhu munjila indahi makhuva kenako, 4nikanyalikha umanye katoto koosi khulondokhana khu vindu via wechitswa.
Livulwa lia Yohana Mubatisi Liavoolwa
5Mumatukhu ka Herode yali nali mwami wu lusomo lwa Yudeya, khwaliho nu musalisi walaangwangwa Zakaria, warulanga mu mukaanda ku vusalisi kwa Abiya. Mukhali wewe yalaangwangwa Lisabeti; khandi yali mwitsukhulu wa Haruni. 6Voosi vavili vali vandu vi likhola liu vulunji imbeli wa Nyasaye; khandi vali vayaanzitsa Nyasaye, shichila valondanga malako ku Mwami Nyasaye, nivakhola ka yenyanga vuchila khukhola shindu shitamanu. 7Vali nivashili khwivulakhu mwana wosi, shichila Lisabeti yali mukhali mukuumba; khandi vo vavili vali vasakhula muno.
8Litukhu lindi, Zakaria yali nakholanga muhinzilu kwekwe khuli musalisi mu Litempeli, khandi narweshitsanga muhinzilu kwekwe kwa shia litukhu. 9Yarovolwa khuvirila khu ikura, khuli kuli mwiima ku vusalisi khutsia mu Litempeli liu Mwami Nyasaye, nukhusamba vubani khu vwaali. 10Lwa isaa yatukha yu khusamba vubani, shituma shia vandu vali nivali ilwanyi nivasaalanga.
11Khulwa yako, injelosi yu Mwami Nyasaye yalolekha khuye, nisinjile khuluveka lu mukhono musatsa ku vwaali vu khusambilakhu vubani. 12Lwa Zakaria yalola injelosi yeneyo, yali nilichenya naria. 13Navutswa injelosi yeneyo yamuvoolela, “Zakaria, lekha khuria! Nyasaye umali khuhulila lisaala liolio; khandi mukhali wowo Lisabeti atsitsanga khukhwivulila mwana wi shiyayi. Uliitsa khumukulikha lira Yohana. 14Uliitsa khusangala nuyaanza; khandi vandu vanyishi valiitsa khuyaanza niyakhivulwa. 15Aliitsa khuva mundu wi tsingulu imbeli wu Mwami; khandi aliitsa khuvula khung'wakhu idivai inoho malwa. Roho Mutakatifu aliitsa khwitsula muye, niyakhivulwa. 16Aliitsa khandi khukalushitsa Vaisraeli vanyishi khu Mwami Nyasaye, uli Nyasaye wavo; 17aliitsa khwimila imbeli wu Mwami mu tsingulu nende vunyali vunyishi khuli vu Muprofeti Eliya. Aliitsa khuhambanyinya khandi vatata nende vaana; aliitsa khukalukhanyinya vandu vambakhananga khulonda malako khuva valunji; aliitsa khurecheshitsila Mwami vandu veve.”
18Zakaria yareeva injelosi, “Nyala khumanya munjila shina niiva yaka kaliitsa khuva kilikali? Ndi musakhulu, khandi mukhali wanje wasakhula.” 19Injelosi yamuchipa, “Ninzi Gaburieli. Sinjilanga imbeli wa Nyasaye; neye undumi nomolome nivi khukhuvoolela vindu vilahi yivi. 20Navutswa uliitsa khuhonjela khandi ukhaywi khulomoloma, lwa wambakhane khusuuvila mu likhuva lianje liliitsa khuva liatoto mumatukhu kenyekhanga.”
21Vandu vali nivalindililanga Zakaria vali nilichenya, shichila Zakaria yikhala khuluhono mu Litempeli. 22Zakaria yarula ilwanyi, vuchila khulomolomakhu khuvo; navutswa vali vamanyi ndi Zakaria uloli malolo mu Litempeli. Lwa Zakaria yakhaywa khulomoloma, yavachelela shia shindu shiosi na makhono keke. 23Lwa Zakaria yali namali matukhu ku muhinzilu kwekwe ku vusalisi mu Litempeli, yakalukha natsia ingo wewe. 24Lwa matukhu kandi kali nikakhavira, mukhali wewe Lisabeti yaheelitsa, vuchila khurulakhu munzu khu mieli chiranu. 25Yavoola, “Nunundi Mwami Nyasaye ukhonyi; umali khundulitsa mu tsisoni imbeli wa vandu!”
Livulwa lia Yesu Liavoolwa
26Khumweli kwa sita khurula Lisabeti navelekha mwana, Nyasaye yaruma injelosi Gaburieli khutsia mu litaala lili mu lusomo lwa Galilaya lialaangwangwa Nazareti, 27khu mwana wi shikhana muchima walaangwangwa Mariya, waselelwa nu mundu walaangwangwa Yosefu, wali nali mwitsukhulu wu Mwami Daudi. 28Injelosi yasimukha nitsia khu Mariya nivoola, “Milembe! Yivi wakasitswa muno, Mwami Nyasaye ali nivi!”#1:28 Mahandiko kakhale malala kameetakhu “Yivi wakasitswa mu vakhali voosi!”
29Mariya yali nilinyakhana linyishi mu mwoyo khulondokhana khu likhuva lia injelosi yamuvoolela, nava nilichenya shia kavoolanga. 30Injelosi yamuvoolela, “Mariya, lekha khuria, shichila Nyasaye umali khukhulolela tsimbavasi. 31Uliitsa khuvelekha, wivuli mwana wi shiyayi, wa uliitsa khumukulikha lira Yesu. 32Aliitsa khuva ni tsingulu khandi aliitsa khulaangwa Mwana wa Nyasaye Uli Ikulu khu Viosi. Mwami Nyasaye aliitsa khumwamihitsa khuva mwami, khuli kuuka wewe Daudi, 33khandi aliitsa khwamiha vitsukhulu va Yakobo mihika ni mihika; ma vwami vwevwe vulivula khuvwa!”
34Mariya yavoolela injelosi, “Ndi mwana wi shikhana muchima; yaka kanyala khwikholekha munjila shina?”
35Injelosi yamuchipa, “Roho Mutakatifu aliitsa khukhwimilila, khandi tsingulu tsia Nyasaye Uli Ikulu khu Viosi tsiliitsa khuva nivi. Khulwa yako, khulondokhana khu shivune yishi, Mwana Mutakatifu mwenoyo aliitsa khulaangwa Mwana wa Nyasaye. 36Khali mwiikho wowo Lisabeti atsitsanga khwivula mwana, khali niiva nu mushele. Woyo wa vavoolanga, nu mukhali mukuumba ali ninda yi mieli sita. 37Shindu shivulakhuho shinyala khukuura Nyasaye.”
38Mariya yavoola, “Ndi murumishi wu Mwami Nyasaye; nu vulahi nikakholeshe khwinzi khuli uvooli.” Khulwa yako, injelosi yamulekha.
Mariya Yacheniha Lisabeti
39Mumatukhu kenako, Mariya yasimukha natsia vwangu mu litaala lili mu shivala shi vikulu shia Yudeya. 40Yinjila mu inzu ya Zakaria naha Lisabeti milembe. 41Lwa Lisabeti yahuchilila milembe chia Mariya, mwana yinuya munda mwemwe; ma tsingulu tsia Roho Mutakatifu nitsitsula mu Lisabeti, 42navoola nu mwoyo mukali, “Uli mukhali wakasitswa muno mu vakhali vandi voosi, khandi mwana wa wivula wakasitswa! 43Shichila shina likhuva yili nilikholekha khwinzi, ndi mama wu mwami wanje witsi khunjeniha? 44Lwa mbuchilile milembe chiochio, mwana uli munda mwanje yinuuyi nilisangala. 45Ali ni ikhaavi mundu uli ni lisuuvila ndi ku Mwami Nyasaye amuvoolela kaliitsa khurweshitswa!”
Lwimbo lwa Mariya Khwitsominya Nyasaye
46Mariya yavoola, “Mwoyo kwanje kwitsominyanga Mwami Nyasaye;
47khandi sangalanga mu mwoyo kwanje,
shichila Nyasaye Muhonyinyi wanje,
48shichila umali khunzitsushitsa inzi, murumishi wewe mwichehitsi!
Khuraanjila nunundi vandu vi likhula liosi,
valiitsa khunaanga wakasitswa,
49shichila Mwami Nyasaye umali khukholela vindu vi tsingulu.
Lira lielie ni litakatifu;
50alolelanga tsimbavasi yavo voosi vamuheetsanga luyali
khurula khu likhula lilala khutukha khu likhula lindi.
51Neye wakhola vindu viu khuchenyinya khuvirila mu vunyali vwevwe;
nasalanyinya vandu vilola mu ka valoshitsanga khukhola koosi.
52Neye wishitsa vu vunyali khurula mu visoko viavo viu vwami,
khandi naninyinya vichehitsi.
53Umali khwikuritsa vali ni inzala ni vindu vilahi,
nu khukhunga vahinda makhono mele.
54Umali khurweshitsa lilaaka lia yalomba na vakuuka veru,
khandi witsi khukhonya murumishi wewe Israeli.
55Witsushitse khulolela Aburahamu tsimbavasi tsietsie,
khandi khu vitsukhulu veve voosi mihika ni mihika!”
56Mariya yamenya na Lisabeti himbi khu mieli chivaka; nakalukha ingo wavo.
Livulwa lia Yohana Mubatisi
57Lwa litukhu liali ni liakhatukha lia Lisabeti khwivula, yivula mwana wi shiyayi. 58Vareende veve nende viikho veve vahulila ndi Mwami Nyasaye umulolele tsimbavasi tsiu khuchenyinya, nivasanga mulikhoya lielie.
59Khulitukhu lia munane, vitsa khusheva mwana; khandi nivenya khumukulikha lira Zakaria khuli tata wewe yali nalaangwangwa. 60Navutswa mama wewe yavoola, “Avuli khulaangwa ndio, navutswa alanjwi Yohana.”
61Vamuvoolela, “Khuvulakhuho nu mwiikho wowo wosi ulaangwangwa ndio!” 62Khulwa yako, vamanyinya vimanyilu khu tata wewe, nivamureeva ni lira shina lia yenyanga mwana wewe ave nalaangwangwa.
63Zakaria yareeva shindu shiu khuhandikakhu, nahandikakhu, “Lira lielie ni Yohana.” Voosi vali nilichenya! 64Isaa yeneyo, Zakaria yaraanga khulomoloma naraanga khwitsominya Nyasaye. 65Vareende veve voosi varia; ma makhuva khulondokhana khu vindu vienevo nikalanda shia havundu hosi mu shivala shi vikulu shia Yudeya. 66Shia mundu wosi wahulila ndio, yakanakana makhuva khulondokhanakhu nareeva, “Mwana uyu atsitsanga khuva mwana lukanu shina?” Kali kamanyikhane havulavu ndi tsingulu tsiu Mwami Nyasaye tsili muye.
Vuprofeti vwa Zakaria
67Roho Mutakatifu yitsula mu Zakaria, naraanga khuvoola vuprofeti vwevwe:
68“Khwitsominyi Mwami Nyasaye, uli Nyasaye wa Israeli;
shichila umali khwitsa khukhukhonya vandu veve nu khuvavoholola.
69Ukhuheele Muhonyinyi wu vunyali,
Mwitsukhulu wu murumishi wewe Daudi,
70khuli yali ni yalaaka khuvirila mu vaprofeti veve vatakatifu
mumatukhu kakhale
71ndi aliitsa khukhuhonyinya khurula khu vatsiku veru,
khurula khu tsingulu tsia yavo vakhuhimanga.
72Yavoola aliitsa khuvela tsimbavasi vakuuka veru,
nu khwitsushitsa lilakano lielie litakatifu,
73lia yali niyisuuhila kuuka weru Aburahamu,
74namali khukhuhonyinya khurula khu vatsiku veru,
aliitsa khukhukhola khumurumishila vuchila khuria,
75nikanyalikha khuve vatakatifu
khandi valunji imbeli wewe khumatukhu koosi ka khushili mwoyo.
76Yivi mwana wanje, uliitsa khulaangwa muprofeti wa Nyasaye Uli Ikulu khu Viosi;
shichila uliitsa khwimila imbeli wu Mwami khumulombela injila,
77khuvoolela vandu veve khuli valiitsa khuhonyinywa,
nu khusemehwa khurula mu vwoni vwavo.
78Nyasaye weru nu mwirulili khandi wi tsimbavasi.
Aliitsa khuchila vulavu vwevwe vuleranga vuhonyinyi vukhwashili
79khandi vwashili yavo voosi vamenyanga mu shisuundi shi likhutsa,
khu khwimilila khuvirila munjila ileranga milembe.”
80Mwana yavilukha nava ni tsingulu mu mmbili nende mu roho; khandi yamenya mu shiangalangwi khutukha lwa yalolekha havulavu khu Vaisraeli.
Currently Selected:
LUKA 1: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
