YOHANA 21

Yesu Yalolekha khu Veechi Veve Saba

1Matukhu mati nikakhavira, Yesu yalolekha khandi khu veechi veve, himbi khu inyanza ya Tiberia. Nindi kikholekha: 2Simoni Petro, Tomasi (wali ni lira lindi Likhwane), Natsanieli wi litaala lia Kana mu lusomo lwa Galilaya, vaana va Zebedayo, nende veechi vandi va Yesu vavili vali nivali voosi halala. 3Simoni Petro yavavoolela, “Ngalukhanga khutsia khuluva tsisutsi.”

Vamuvoolela, “Khali khutsi khulakhulonda.” Khulwa yako, vasimukha nivanina mu liaro nivatsia naye; navutswa shivaluvakhu khali isutsi yosi mu vutukhu vwenovo tawe. 4Nukushili mu mavwevwe khulitukhu lialondakhu, Yesu yasinjila khuluchinga lwi inyanza; navutswa veechi shivali nivamanyi ni Yesu tawe. 5Yesu yavareeva, “Valina, munyala khuva muluvikhu isutsi yosi tawe?”

Vamuchipa, “Khuvula isutsi yakhuluvi.”

6Yesu yavavoolela, “Siuvi ineti yenyu mu matsi khuluveka lu mukhono musatsa kwi liaro. Numukhola ndio, mulaluvayo tsisutsi tsindi.” Vasiuva ineti yeneyo mu matsi nivakhaywa khuchikhwesa khurula mu matsi, shichila tsisutsi tsiali muyo tsinyishi.

7Mwechi wa Yesu yali niyayaanza yavoolela Petro, “Nu Mwami!” Lwa Simoni Petro yahulila ndi nu Mwami Yesu, yifwala tsinguvu tsietsie tsia yali nanavuli khukhola muhinzilu, naruma mu matsi. 8Navutswa veechi vandi va valonda nivali mu liaro, nivakhwesa ineti yali niyitsule tsisutsi; shichila liaro liali nilili himbi tsimita imia indala khurula khuluchinga. 9Lwa vatukha khuluchinga lwi inyanza, valolaho mulilu kwa mandaa nu kulimu ni isutsi nende mukati. 10Yesu yavavoolela, “Nderelikhu tsindala khu tsisutsi tsia mukumili.”

11Simoni Petro yakalukha niyinjila mu liaro nakhwesesa ineti khuluchinga. Ineti yeneyo yali yitsule tsisutsi tsingali tsiosi imia indala makhomi kavaka na tsivaka. Khali niiva tsisutsi tsiali muyo tsinyishi, ineti yeneyo shiyarandukha tawe. 12Yesu yavavoolela, “Hambi mulii.” Mundu avulakhuho khu veechi veve wamureeva, “Nivi viina?” Vali nivamanyi nu Mwami. 13Khulwa yako, Yesu yasimukha natsiayo, navukula mukati navaha. Yavukula khandi isutsi navaha.

14Yulu nalwo lwa khavaka lwa Yesu yalolekha khu veechi veve, namali khwisimushitswa khurula mu likhutsa.

Yesu nende Petro

15Lwa vali nivamali khulia, Yesu yavoolela Simoni Petro, “Simoni mwana wa Yohana, wanyanza toto khuvira vandi yava voosi?” Petro yamuchipa, “Mwami Yesu, ni katoto; wamanya ni kilikali nakhuyaanza.” Yesu yamuvoolela, “Linda vulahi vimeme via makondi.” 16Yesu yareeva Petro lwa khavili, “Simoni mwana wa Yohana, wanyanza toto?”

Petro yamuchipa, “Mwami, ni katoto; wamanya ni kilikali nakhuyaanza.”

Yesu yamuvoolela, “Waye vulahi vimeme via makondi kaanje.” 17Yesu yareeva Petro lwa khavaka, “Simoni mwana wa Yohana, wanyanza toto?”

Petro yavelela mu mwoyo shichila Yesu yamureeva lwa khavaka, “Wanyanza toto?” Yavoolela Yesu, “Mwami Yesu, wamanya shia shindu shiosi; khali wamanya ndi ni kilikali nakhuyaanza!”

Yesu yavoolela Petro, “Waye vulahi makondi kaanje. 18Muvoolelanga katoto ndi, lwa wali nushili muvukha, wifwalanga tsinguvu khutsia shia havundu hosi ha wenyanga khutsia; navutswa lwa wahindila, ulakololoshitsa makhono koko vulunji, ma mundu wundi akhuvohe khukhuhila havundu ukhenyanga khutsia tawe.” 19Yesu yavoola ndio khwivaala khuli lwa Petro aliitsa khukhutsa khuhaana vukhumi khu Nyasaye. Khulwa yako, Yesu yavoolela Petro, “Nonda!”

Yesu nende Mwechi wewe Wayayaanza

20Petro yishevukha inyuma nalola mwechi wa Yesu yali niyayaanza navalondanga. Neye mwechi wali niyitiili himbi khu Yesu, lwa vali nivaliitsanga shiukhulia nareeva Yesu, “Mwami, ni viina utsitsanga khukhutsama?” 21Lwa Petro yamulola, yareeva, “Mwami Yesu, voolakhu shindu khulondokhana khuye?”

22Yesu yachipa Petro, “Niiva nyenyanga atsililile khuva mwoyo khutukha lwa nikalukha, kali nu vukhonyi shina khu yivi? Nonda!”

23Makhuva kalanda mu valondi va Yesu ndi mwechi mwenoyo aliitsa khuvula khukhutsa. Yesu, shikali yavoola aliitsa khuvula khukhutsa tawe; navutswa yavoola, “Niiva nyenyanga atsililile khuva mwoyo khutukha lwa niitsa khukalukha, kali nu vukhonyi shina khu yivi?”

24Neye mwechi wahaana vushiahidi khulondokhana khu vindu yivi, khandi nahandika. Khwamanya ndi ka yavoola ni katoto.

Limalila

25Yesu yakhola khandi vindu vindi vinyishi. Viosi viva ni viahandikwa mu vitabu, ndi ninganakani ndi shivala shiosi shishiakhavele nu vwiyangu vu khuvikhamu vitabu vienevo viosi tawe.

Currently Selected:

YOHANA 21: LLLCATHOLIC

Highlight

Copy