YOHANA 18
18
Yesu Yakumilwa
(Mat 26:47-56; Mk 14:43-50; Luka 22:47-53)
1Lwa Yesu yali namali khusaala, yarulaho na veechi veve natsia khwambukha Luhoongo lwa Kiduroni. Khwali nu mulimi kwi misayituni havundu henaho, kwa Yesu nende veechi veve vinjilamu. 2Yuda, mundu watsama Yesu yali wamanya havundu henaho; shichila Yesu nende veechi veve vali vamenya nivakanilaho. 3Khulwa yako, Yuda yasimukha natsia mu mulimi kwenoko, nu mukaanda kwa vasikali va Varoma, nende valala khu valindi vi Litempeli vali nivarumilwi na vasalisi vakali nende Vafarisayo. Vasimukha nivachinji tsitochi, tsitaaha nende viuchi. 4Yesu yali wamanya shia shindu shiosi shiali nishitsitsanga khwikholekha khuye. Yisuunda imbeli navareeva, “Nu mundu shina wamukhavanga?”
5Vachipa, “Yesu wa Nazareti.”
Yesu yavavoolela, “Ninzi ye.”
Yuda, mundu wamutsama yali nasinjile havundu henaho na vandu venavo. 6Lwa Yesu yavavoolela, “Ninzi ye,” vandu venavo vakalukha inyuma, nivakwa hasi. 7Yesu yavareeva khandi, “Nu mundu shina wamukhavanga?”
Vachipa, “Yesu wa Nazareti.”
8Yesu yavavoolela, “Mbele nimuvoolele khale ndi ninzi ye. Khulwa yako, niiva mukhavanga inzi, vooleli vandu yava vatsi.” 9Yesu yavoola ndio, khu makhuva ka yali niyavoola karweshitswi: “Tata, shinyala khukorishitsakhu khali mulala khu yavo va wamba tawe.”
10Simoni Petro, wali nali ni shivavi, yashisomola nareema shiroyi shisatsa shiu murukwa wu Mukali wa vasalisi voosi. Murukwa mwenoyo yalaangwangwa Maluku. 11Yesu yavoolela Petro, “Kalushitsa shivavi shioshio mushiula shiashio! Ukanakananga nyala khuvula khung'wa mu shikombe shi linyakhana, shia Tata wanje ambele?”
Yesu Yahilwa khu Anasi
12Vasikali va Varoma halala nu mwimilili wavo nende valindi va Vayahudi vakumila Yesu. Vamuvoha 13nivamuhila lukhuraanga khu Anasi; shichila yali mukuuka wa Kayafa, wali nali Mukali wa vasalisi voosi khumuhika kwenoko. 14Kayafa uyu neye mundu wali navoolele vimilili va Vayahudi ndi nu vulahi mundu mulala khukhutsila vandu voosi.
Petro Yambakhana Yesu
(Mat 26:69-70; Mk 14:66-68; Luka 22:55-57)
15Simoni Petro nende mwechi wundi valonda Yesu. Mwechi wundi mwenoyo yali wamanyikhana muno khu Mukali wa vasalisi voosi; khu, yinjila na Yesu mu lwanyi lu mu inzu yu Mukali wa vasalisi voosi, 16Petro nashisinjile ilwanyi himbi ha shilivwa. Mwechi wundi mwenoyo yakalukha ilwanyi, nalomoloma nu mwana wi shikhana wali nali ha shilivwa, niyinjilitsa Petro munzu. 17Mwana wi shikhana wali nali ha shilivwa yareeva Petro, “Yivi shiuli khandi mulala khu veechi vu mundu woyo?”
Petro yachipa, “Shindi mulala khuvo tawe.”
18Varumishi nende valindi vali vavwani mulilu shichila vushindu vwali nuvuvalechi. Vali nivasinjile ha mulilu kwenoko nivakworanga; khali Petro khandi yasinjilaho navo niyora mulilu.
Mukali wa vasalisi voosi Yareeva Yesu Mareevo
(Mat 26:59-66; Mk 14:55-64; Luka 22:66-71)
19Mukali wa vasalisi voosi yareeva Yesu mareevo khulondokhana khu veechi veve, khandi khulondokhana khu mechitso keke. 20Yesu yamuchipa, “Nalomolomanga khu mundu wosi havulavu; khandi shia khase khosi nzechitsanga mechitso kaanje koosi mu masinagogi nende mu Litempeli, ha Vayahudi voosi vakanilanga. Shindu shivulakhuho shia navoolakhu muvwivisi. 21Khulwa yako, shichila shina undevanga mareevo? Reeva vandu vahulila ka navoola; katoto vamanya ka navavoolela.”
22Lwa Yesu yali niyakhavoola ndio, mulala khu valindi vali nivasinjileho yamusamula lukhovi namuvoolela, “Hee! Nindi unyala khulomoloma khu Mukali wa vasalisi voosi?”
23Yesu yamuchipa, “Niiva mboli shindu shiosi shitamanu, voolela vandu voosi vali hanu shindu shienesho. Navutswa niiva ku vulunji kali mukamboli, shichila shina nusamula lukhovi?”
24Khulwa yako, Anasi yahila Yesu, nashivoheelwi makhono khu Kayafa, wali nali Mukali wa vasalisi voosi.
Petro Yambakhana Yesu khandi
(Mat 26:71-75; Mk 14:69-72; Luka 22:58-62)
25Lwa Simoni Petro yali nashisinjile havundu henaho niyoranga mulilu, vamureeva, “Yivi shiunyala khuva khandi mulala khu veechi vu mundu woyo?”
Petro yambakhana, navoola, “Shindi mulala khuvo tawe.”
26Murumishi mulala khu varumishi vu Mukali wa vasalisi voosi, nali mwiikho wu mundu wa Petro yareema shiroyi yareeva, “Kanyala khuva shinakhulolakhu numuli naye mu mulimi tawe?”
27Petro yambakhana khandi, ma hari hatititi itaywa nilakula.
Yesu Yahilwa khu Pilato
(Mat 27:1-2,11-14; Mk 15:1-5; Luka 23:1-5)
28Nukushili mu mavwevwe, Yesu yarulitswa mu inzu ya Kayafa, nahilwa mu inzu yu vwami ya gavana wa Varoma. Vimilili va Vayahudi shivinjilakhu mu inzu yu vwami yeneyo tawe; shichila venyanga khutsililila khuva vanihu khulondokhana khu mulukha, khu valii shiukhulia shiavo shiu Mulukha kwa Pasaka. 29Khulwa yako, Pilato yasimukha natsia ilwanyi khuvo navareeva, “Ni shindu shina shichilanga numuyaala mundu uyu?”
30Vachipa, “Niiva mundu uyu shiyakhakholi shindu shitamanu khwakhamuleri khu yivi tawe.”
31Pilato yavavoolela, “Munyi vene muvukule mumukhalachili khulondokhana khu malako kenyu vene.”
Vavoolela Pilato, “Khuvula vunyali vu khukhalachila mundu likhutsa.” 32Yaka kikholekha khurweshitsa makhuva ka Yesu yali navooli khulondokhana khuli lwa aliitsa khukhutsa.
33Pilato yakalukha mu inzu yu vwami, nalaanga Yesu; namureeva, “Nivi Mwami wa Vayahudi?”
34Yesu yachipa, “Yivi mwene neye ureevanga lireevo inoho vandu vandi vakhuvoolele makhuva khulondokhana khwinzi?”
35Pilato yamureeva, “Ukanakananga ndi Muyahudi? Vandu vovo mwene halala na vasalisi vakali navo vakhulera khwinzi. Ni shina shiunyala khuva nukholi?”
36Yesu yavoola, “Vwami vwanje shiuvuli vu mu shivala shinu tawe. Niiva vwakhavele vu mu shivala shinu, valondi vaanje vakhakwani, khu vimilili va Vayahudi vavuli khungumila. Navutswa nunundi vwami vwanje vwarula havundu handi!”
37Khulwa yako, Pilato yareeva Yesu, “Nivi mwami toto?”
Yesu yamuchipa, “Yivi mwene uvoolanga ninzi mwami. Nashio shivune shionyene vutswa shiachila ninzivulwa khandi ninzitsa mu shivala, khulomoloma makhuva khulondokhana khu katoto. Mundu wumenyanga khulondokhana khu katoto, ambulishitsanga.”
38Pilato yamureeva, “Likhuva ‘Katoto’ livoolanga shina?”
Yesu Yakhalachilwa Likhutsa
(Mat 27:15-31; Mk 15:6-20; Luka 23:13-25)
Pilato yarula nakalukha ilwanyi khulola vandu navavoolela, “Mbulakhu shindu shitamanu shiakholi shinyala khuchila khalachili mundu uyu. 39Navutswa khulondokhana khu mwiima kwenyu kwa muli nakwo, shia khase khosi muvohololanga muvohe mulala khulitukhu liu Mulukha kwa Pasaka. Mwenyanga mbe nimuvohololelanga Mwami wa Vayahudi?”
40Valaanjilila nivavoola, “Shiukhwenyi mundu uyu tawe! Mundu wa khwenyanga ni Baraba!” Baraba yali munuuli.
Currently Selected:
YOHANA 18: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
