YOHANA 16
16
1“Muvoolele kenako koosi khu mulivula khulekha khulonda lisuuvila lienyu. 2Muliitsa khukhungwa khurula mu masinagogi. Khali ndio, ni kilikali isaa iliitsa khutukha lwa mundu aliitsa khumwiira nakanakana akholanga muhinzilu kwa Nyasaye. 3Vandu valiitsa khumukhola vindu khuli vienevo, shichila vakorwa Tata inoho inzi. 4Navutswa muvoolele vindu vienevo, khu lwa isaa iliitsa khutukha yu khukhola vindu vienevo, mulimanya ndi ninzi wamuvoolelakhu.
Muhinzilu kwa Roho Mutakatifu
“Shinali namuvoolelakhu vindu vienevo muliraanga tawe, shichila nali na munyi. 5Navutswa nunundi nzitsanga khu woyo wanduma; navutswa khali ndio, mundu avulakhuho khali mulala khu munyi unyala khundeva, ‘Ni hena ha utsitsanga?’ 6Lwa mboli nunundi vindu vienevo, muli nu vuveleli mu mioyo chienyu. 7Navutswa muvoolelanga kilikali ndi nu vulahi khu munyi ninduliho, shichila nanyala khuvula khurulaho, Mukhonyani shialiitsa khwitsa khu munyi tawe. Navutswa niiva narulaho, niitsa khumurumila. 8Lwa Mukhonyani aliitsa khwitsa, aliitsa khumanyinya havulavu vutamanu vwa vandu vakhola shichila vwoni, vulunji vwa vandu vakhola shichila vulunji; khandi khulondokhana khuli Nyasaye aliitsa khukhalachila vandu. 9Vakorwa shia shindu shiosi khulondokhana khu vwoni, shichila vandu vayambakhana khusuuvila mwinzi. 10Vakorwa shia shindu shiosi khulondokhana khu ku vulunji, shichila nzitsanga khu Tata, khandi shiumuliitsa khundolakhu inzi tawe. 11Vakorwa shia shindu shiosi khulondokhana khuli Nyasaye aliitsa khukhalachila vandu, shichila mwimilili wi shivala shinu wakhalachilwa khale.
12“Ndi na makhuva manyishi ku khumuvoolela; navutswa nunundi shiumunyala khutsililila khwikhutsila tawe. 13Navutswa lwa Roho aliitsa khwitsa, umanyinyanga katoto khulondokhana khu Nyasaye, aliitsa khumwimilila mu katoto koosi. Shialiitsa khulomoloma khulondokhana khu vunyali vwevwe tawe, navutswa aliitsa khulomoloma khulondokhana khu kahulilanga, khandi avoole makhuva khulondokhana khu vindu viliitsa khwitsa. 14Aliitsa khuhaana vukhumi khwinzi, shichila aliitsa khuhulila ka niitsa khumuvoolela khandi amuvoolele. 15Shia shindu shiosi shia Tata wanje ali nashio ni shianje; nako kachilanga nimuvoolela ndi Roho aliitsa khuhulila ka niitsa khumuvoolela khandi amuvoolele.”
Khuvelela nende Khusangala
16Yesu yatsililila khuvoola, “Matukhu mati karikale ka mutsitsanga khuvula khulola inzi; khandi matukhu mati nikakhavira, muliitsa khulola inzi.”
17Valala khu veechi veve vareevana vene khuvene, “Yaka kanyala khuva kamanyinyanga shina? Akhuvoolelanga matukhu mati karikale shiukhunyala khumulolakhu tawe; khandi matukhu mati nikakhavira, khuliitsa khumulola; khali avoolanga khandi, ‘Shivune shili ndi nzitsanga khu Tata.’ 18Vatsililila khureevana, nu khuvoola shina ‘Matukhu mati karikale’? Khukorelwi shiavoolanga.”
19Yesu yali namanyi venyanga khumureeva mareevo. Khulwa yako, yavavoolela, “Mboli, ‘Matukhu mati karikale shiumuliitsa khulola inzi tawe; khandi matukhu mati nikakhavira, muliitsa khulola inzi.’ Nako kachilanga nu mureevana vene khuvene? 20Muvoolelanga katoto ndi muliitsa khulila nu mwikhula, navutswa vandu vu mu shivala valiitsa khusangala. Muliitsa khuvelela, navutswa khuvelela khwenyu khuliitsa khuchila musangale. 21Lwa mukhali avetsanga nali himbi khwivula mwana, avelelanga shichila isaa yeye yu khunyakhana ivetsanga ni yakhatukha; navutswa lwa mwana avetsanga niyakhivulwa, yivililanga linyakhana lielie, shichila ali nu vuyaanzi mwana umali khwivulwa mu shivala. 22Nindio khandi kali khu munyi: nunundi muvelele; navutswa niitsa khukalukha khandi khumulola, mamusangale muno mu mioyo chienyu, lisangala lia mundu anyala khuvula khurulitsa khu munyi.
23“Lwa litukhu lienelo liliitsa khutukha, muliitsa khuvula khundevakhu shindu shiosi. Muvoolelanga katoto ndi Tata aliitsa khumuha shia shindu shiosi shiamureeva khuvirila mu lira lianje. 24Khali nunundi mushili khureevakhu shindu shiosi khuvirila mu lira lianje. Reevi, muliitsa khunyola khu muve nu vuyaanzi vwatoto.
Yesu Yakuura Shivala
25“Mali khurumishila makhuva ki tsinganu khumuvoolela vindu vienevo. Navutswa litukhu liliitsa khutukha, lwa niitsa khuvula khurumishila makhuva ki tsinganu, navutswa niitsa khulomoloma khu munyi havulavu vuchila khumuvisakhu likhuva liosi khulondokhana khu Tata. 26Lwa litukhu lienelo liliitsa khutukha, muliitsa khureeva Tata shia shindu shiosi khuvirila mu lira lianje; shikali mbolanga namureevela tawe, 27shichila Tata wamuyaanza mwene. Wamuyaanza, shichila mwanyanza khandi mwasuuvila ndi narula khu Nyasaye. 28Narula khu Tata ninzitsa mu shivala; khandi ndulanga nunundi mu shivala, khandi nzitsanga khu Tata wanje.”
29Veechi veve vamuvoolela, “Ulomolomanga havulavu nunundi vuchila khurumishila makhuva ki tsinganu. 30Khwakhamanya nunundi ndi wamanya shia shindu shiosi; khandi shiunyala khwenyakhu mundu akhureeve mareevo tawe. Yaka nako kachilanga nu khusuuvila ndi warula khu Nyasaye.”
31Yesu yavareeva, “Mwakhasuuvila nunundi? 32Navutswa litukhu lili himbi khutukha, khali liatukha khale, lwa munyi voosi muliitsa khusalanyinywa, shia mulala ingo wewe, khandi niitsa khulekhwa wonyene; navutswa katoto shindi wonyene tawe, shichila Tata wanje ali ninzi. 33Muvoolele ndio, khu lwa muli mwinzi, muliva ni milembe. Vandu vu mu shivala shinu valiitsa khuchila munyakhane. Navutswa mwikhutsili! Namala khukuura shivala!”
Currently Selected:
YOHANA 16: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
