YOHANA 14
14
Yesu Neye Injila yu Khutsia khu Tata
1Yesu yavoolela veechi veve, “Muvuli khunyakhana mu mioyo chienyu. Suuvili mu Nyasaye khandi musuuvile mwinzi khandi. 2Inzu ya Tata wanje ilimu ni viko vinyishi; nikakhavele kario, shimbele namuvoolela nzitsayo khumulombela vwiyangu tawe. 3Niiva natsia khumulombela vwiyangu vwenovo, niitsa khukalukha khumuvukula khumuhila wamba nindi, khu muve khandi wamba nindi. 4Mwamanya injila itsitsanga wanzitsanga.”
5Tomasi yareeva Yesu, “Mwami, khwakorwa wa utsitsanga; khu khunyala khumanya ndina injila yu khutsiayo?”
6Yesu yamuchipa, “Ninzi injila, katoto, nende vulamu. Mundu avulakhuho utsitsanga khu Tata nakhavirili khwinzi. 7Muva nu mwamanya inzi toto, khani mwamanya Tata wanje khandi; navutswa khuraanjila nunundi, mumali khumumanya khandi mumuloli.”
8Filipu yavoolela Yesu, “Mwami, khumanyinyi Tata; nako koosi ka khwenyanga.”
9Yesu yachipa, “Filipu, namenya na munyi voosi khumatukhu manyishi; navutswa kanyala khuva mwangorwa? Mundu walolakhu inzi walola Tata. Khulwa yako, unyala khuvoola munjila shina, ‘Khumanyinyi Tata’? 10Filipu, shiunyala khusuuvilakhu inzi ndi mu Tata, na Tata ali mwinzi tawe?” Yesu yavoolela veechi veve, “Makhuva kamuvoolelanga, shikali kaanje mwene tawe. Navutswa Tata uli mwoyo mwinzi akholanga muhinzilu kwekwe. 11Musuuvili inzi, lwa muvoolelanga ndi inzi ndi mu Tata, na Tata ali mwinzi. Niiva shikali kario, musuuvile shichila mihinzilu chiakholanga. 12Muvoolelanga kilikali ndi mundu usuuvilanga mwinzi, aliitsa khukhola mihinzilu chia inzi kholanga khandi. Aliitsa khukhola khali mihinzilu chi tsingulu mikali khuvira chienecho, shichila nzitsanga khu Tata wanje. 13Niitsa khumukholela shia shindu shiosi shiamureeva khuvirila mu lira lianje, khu Mwana akhuminyi Tata. 14Munyala khundeva shiamwenyi shiosi khuvirila mu lira lianje, ninzi niitsa khumukholela.
Yesu Yavalaaka Roho Mutakatifu
15“Niiva mwanyanza, muliitsa khutsililila khulonda malako kaanje. 16Ninzi niitsa khureeva Tata, naye aliitsa khumuha Mukhonyani wundi, uliitsa khumenya na munyi mihika ni mihika. 17Neye Roho umanyinyanga katoto. Vandu voosi mu shivala shivanyala khumuhuchilila tawe, shichila vashili khumulolakhu khandi vamukorwa. Navutswa munyi mwamumanya, shichila amenyanga na munyi, khandi ali na munyi.
18“Lwa niitsa khutsia, shiniitsa khumulekha munyi khuli vavisandu tawe; navutswa niitsa khukalukha khu munyi. 19Matukhu mati nikashili khuvira, vandu vu mu shivala shivaliitsa khundolakhu inzi tawe; navutswa munyi muliitsa khulola inzi. Lwandi mwoyo, khali munyi muliitsa khuva mwoyo. 20Khulitukhu lienelo, nalwo lwa muliitsa khumanya ndi inzi ndi mu Tata wanje, na munyi muli mwinzi, khuli lwa inzi ndi mu munyi.
21“Mundu uhuchililanga malako kaanje, khandi akalonda neye mundu wayaanza inzi. Tata wanje aliitsa khuyaanza mundu wayaanza inzi. Khali inzi mwene niitsa khumuyaanza, nu khwimanyinya mwene khuye.”
22Yuda (shiali Yuda Isikarioti tawe) yamureeva, “Mwami, shichila shina uli ni lienya liu khwimanyinya mwene khu khutsi, navutswa khu vandu vu mu shivala tawe?”
23Yesu yachipa, “Niiva mundu wayaanza inzi, alatsililila khulonda mechitso kaanje. Tata wanje alamuyanza. Inzi nende Tata wanje khuliitsa khwitsa khuye khandi khumenye naye. 24Mundu wakhayaanza inzi, shianyala khulonda mechitso kaanje tawe. Mechitso kamuhulilanga, shikali kaanje mwene tawe; navutswa ni ka Tata wanje, wanduma.
25“Muvoolele yaka, lwa shili na munyi. 26Navutswa Mukhonyani, nali Roho Mutakatifu, wa Tata aliitsa khuruma khuvirila mu lira lianje, aliitsa khumwechitsa shia shindu shiosi. Aliitsa khumwitsushitsa shia shindu shiosi shia namwechitsa.
27“Murichilanga munyi milembe. Ni milembe chianje mwene chiamuheetsanga. Shichili khuli milembe chia vandu vu mu shivala vahaananga tawe. Muvuli khunyakhana mu mioyo chienyu inoho khuria. 28Mwahulila nimuvoolela, ‘Ndulaho, navutswa niitsa khukalukha khu munyi.’ Muva numwanyanza, mwakhasangali shichila nzitsanga khu Tata wanje; lwa Tata ali nu vunyali vunyishi khumbira. 29Mali khumuvoolela nunundi makhuva yaka nikashili khwikholekha, khu, lwa kaliitsa khwikholekha, mulisuuvila. 30Shinyala khulomoloma na munyi khuluhono tawe, shichila mwimilili wamihanga shivala shinu yitsanga. Shikali ali ni tsingulu tsiu khungura tawe; 31navutswa khutukha vandu vu mu shivala vamanye ndi nayaanza Tata; khandi kholanga vutswa shia shindu shiosi shia Tata ambolelanga khole.
“Hambi nunundi; leshi khuruli havundu hanu.
Currently Selected:
YOHANA 14: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
