YOHANA 11

Likhutsa lia Lazaro

1Mundu wundi walaangwangwa Lazaro, wi litaala lia Betsania, yali walwala. Mariya nende mwana wi shikhana wavo Malita vamenyanga mu litaala lienelo. 2Mariya, nali mbotso Lazaro walwalanga, neye wali mulala mwele wavekha vilenje viu Mwami Yesu makura; khandi niyeeya vilenje vienevo ni liswi lielie. 3Khulwa yako, vaana vi shikhana vanga Lazaro venavo varuma likhuva khu Yesu, nivavoola, “Mwami, mulina wowo wa yivi mwene wayaanza alwalanga.”

4Lwa Yesu yahulila ndio, yavoola, “Vulwale yuvu shiuvunyala khumwiira tawe; navutswa nu vulwale vuliho shichila vukhumi vwa Nyasaye, khu Mwana wa Nyasaye aheelwi vukhumi khuvirila muvwo.”

5Yesu yali wayaanza Malita nende Mariya, halala na mbotso wavo Lazaro. 6Khali ndio, lwa Yesu yahulila ndi Lazaro alwalanga, yatsililila khumenya havundu ha yali nali khumatukhu kandi kavili. 7Yavoolela veechi veve, “Hambi khukalushi mu lusomo lwa Yudeya.”

8Navutswa veechi veve vamureeva, “Mwechitsi, matukhu mati kamali khuvira, lwa Vayahudi venyanga khukhulesa na machina. Wenyanga khukalukhayo khandi toto?”

9Yesu yareeva veechi veve, “Mbasu shiukuli ni tsisaa likhomi na tsivili? Mundu uchendanga mbasu nu kwakhanga shianyala khwisikarila tawe, shichila alolanga vulavu vwakhanga mu shivala shinu. 10Navutswa mundu uchendanga vutukhu anyala khwisikarila, shichila avula vulavu.” 11Yesu yavoola ndio, nameetakhu, “Mulina weru Lazaro umali khukona tsindolo; navutswa natsiayo khumuvushitsa khurula mu tsindolo.”

12Veechi vachipa Yesu, “Mwami, niiva Lazaro umali khukona tsindolo, alasosa.”

13Yesu yali ulomolome makhuva khulondokhana khu likhutsa lia Lazaro; navutswa veechi veve vali ninganakani ndi Yesu avoolanga Lazaro umali khukona tsindolo tsiatoto. 14Khulwa yako, Yesu yavavoolela havulavu, “Lazaro umali khukhutsa, 15khandi sangalanga shichila munyi, lwa mbuli khuvaho, khu nikanyalikha musuuvile. Chendi khutsi khumulola.”

16Tomasi (wali ni lira lindi Likhwane) yavoolela veechi veshie, “Chendi khali voosi khutsi nu mwechitsi, khu nikanyalikha khuve nu khukhutsanga naye!”

Yesu neye Mwisimushitsi nende Vulamu

17Lwa Yesu yatukhaho, yanyola Lazaro namali mu shilindwa khumatukhu kane. 18Litaala lia Betsania liali himbi tsikilomita tsivaka khurula Yerusalemi; 19khandi Vayahudi vanyishi vali vayitsa khuleminya mwoyo Malita nende Mariya khulondokhana khu likhutsa lia mbotso wavo.

20Lwa Malita yahulila ndi Yesu yali niyitsanga, yasimukha natsia khumwakanila; navutswa Mariya yarikala hango. 21Malita yavoolela Yesu, “Mwami, niiva wakhavele hanu, mbotso wanje shiavele wakhutsa tawe! 22Navutswa manyi ndi shia shindu shiosi shiutsitsanga khureeva khu Nyasaye, Nyasaye aliitsa khukhuha.”

23Yesu yamuvoolela khandi, “Mbotso wowo aliitsa khwisimukha khurula mu likhutsa.”

24Malita yamuvoolela, “Manyi ndi aliitsa khwisimukha khurula mu likhutsa, khandi khulitukhu liukhumalilikha, lwa vandu vakhutsa valiitsa khwisimushitswa khurula mu likhutsa.”

25Yesu yavoolela Malita, “Ninzi mwisimushitsi wa vandu khurula mu likhutsa nende vulamu. Mundu usuuvilanga mwinzi, alatsililila khuva mwoyo, khali niiva aliitsa khukhutsa; 26khandi mundu uli mwoyo khandi asuuvilanga mwinzi, shialiitsa khukhutsa tawe. Ni kilikali, unyala khuva usuuvilanga mu makhuva yaka?”

27Malita yamuchipa, “Mwami, ni kilikali! Ndi ni lisuuvila ndi nivi Masiha, Mwana wa Nyasaye, wenyekhanga khwitsa mu shivala.”

Yesu Yalila

28Lwa Malita yali namali khuvoola ndio, yasimukha natsia khulaanga mwana wi shikhana wavo Mariya. Yamuvoolela muvwivisi, “Mwechitsi ali hanu; khandi akhureevanga.” 29Lwa Mariya yahulila ndio, yarula vwangu natsia khumulola. 30Yesu yali nashili khwinjila mu muchitsi; navutswa yali nashili havundu ha Malita yamwakanila. 31Lwa Vayahudi vali nivali munzu nivaleminyanga mwoyo Mariya, valola Mariya natsitsanga ilwanyi; vamulonda, nivakanakana atsitsanga ha shilindwa khulililaho.

32Mariya yatukha havundu ha Yesu yali nali; khandi lwa yalola vwangu Yesu, yakwa ha vilenje hehe; navoola, “Mwami, niiva wakhavele hanu, mbotso wanje shiavele wakhutsa tawe.”

33Lwa Yesu yamulola nalilanga; khandi Vayahudi va yali nachendi navo nivalilanga, yavelela mu mwoyo kwekwe, nanyakhana. 34Yavareeva, “Ni hena hamumurele mmbili kwekwe?” Vachipa, “Mwami, hamba ulole.”

35Yesu yalila. 36Nalwo lwa Vayahudi vavoola, “Lolikhu khuli yali niyamuyaanza!”

37Navutswa valala khuvo vavoola, “Nikava mundu uyu yahonyinya mundu muvekhu, yakhikalili Lazaro khukhutsa.”

Lazaro Yisimushitswa Khurula mu Likhutsa

38Lwa Yesu yali navelele muno mu mwoyo kwekwe khandi, yatukha ha shilindwa; shilindwa shienesho shiali luhangaywa, khandi lichina liali ni likhunishwi mu vwinjililu vwi shilindwa tsana. 39Yesu yavavoolela, “Rulitsikhu lichina yili.” Malita, wali nali mbotso wa Lazaro yavoolela Yesu, “Mwami, matukhu kakhavira kane khurula nu khumura mu shilindwa; vukuundu vulahuunya vutamanu muno!”

40Yesu yamuvoolela, “Shimbele nikhuvoolele ndi niiva unyala khusuuvila, uliitsa khulola vukhumi vwa Nyasaye!” 41Vandu vali nivaliho varulitsakhu lichina. Yesu yaheenza mwikulu navoola, “Tata wanje, khusanditsanga shichila umali khumbulishitsa. 42Namanya ndi shia khase khosi umbulishitsanga; navutswa mbolanga yaka khukhonya vandu vasinjile hanu, khu vasuuvili ndi nivi wanduma.” 43Lwa Yesu yali namali khuvoola ndio, yalaanga nu mwoyo mukali, “Lazaro, rula mu shilindwa!” 44Mukhutsu mwenoyo yarula ilwanyi, makhono keke nende vilenje nivivoheelwi ni tsinguvu tsi shilindwa, khandi shilaka nishivoheelwi khuvotokhana khu vweni vwevwe. Yesu yavavooleela, “Muvohololi atsi.”

Khuli Valoshitsa Khwiira Yesu

(Mat 26:1-5; Mk 14:1-2; Luka 22:1-2)

45Khulwa yako, Vayahudi vanyishi vali nivitsa khucheniha Mariya, khandi vali nivaloli ka Yesu yali nakholi, vasuuvila mu Yesu. 46Navutswa valala khuvo vasimukha nivatsia khulola Vafarisayo; nivavavoolela ka Yesu yali nakholi. 47Nalwo lwa Vafarisayo halala na vasalisi vakali vakana nende vandu vi Shikhaalo; nivavoola, “Ni shina shia khunyala khukhola? Lolikhu viloleshitsu vinyishi viu mundu uyu akholanga vutswa! 48Niiva khulamulekha atsililile khukhola khuli akholanga, shia mundu wosi alatsililila khusuuvila muye; khandi Varoma vanyala khwitsa khwononyinya Litempeli lieru nende shivala shieru!”

49Mulala khu Vafarisayo venavo, walaangwangwa Kayafa wali nali Mukali wa vasalisi voosi khumuhika kwenoko, yavavoolela, “Shindu shivulakhuho shia mwamanya! 50Shiumumanyikhu nu vulahi khulekha mundu mulala khukhutsila vandu voosi, khuvira shivala shieru shiosi khutivitswa.” 51Shiyavoola kenako khuvirila khu vunyali vwevwe mwene tawe; navutswa shichila yali nali Mukali wa vasalisi voosi khumuhika kwenoko. Yaprofetanga ndi Yesu aliitsa khukhutsila Vayahudi; 52khandi shikali shichila vo vonyene tawe, navutswa khulera mu mmbili mulala vandu va Nyasaye vali ni vasalanyinywa shia havundu hosi.

53Khuraanjila khulitukhu lienelo, vimilili va Vayahudi valoshitsa khuli vanyala khwiira Yesu. 54Khulwa yako, Yesu, shikali yachendakhu havulavu mu lusomo lwa Yudeya tawe; navutswa yarula natsia havundu handi himbi mu shiangalangwi natukha mu litaala lialaangwangwa Efurahimu, ha yamenya na veechi veve.

55Lwa litukhu liu Mulukha kwa Pasaka lia Vayahudi liali nilili himbi khutukha, vandu vanyishi varula mu mataala kavo, nivatikulukha Yerusalemi khutsiayo khukhola mwiima ku khwinihitsa, mulukha nu kushili khutukha. 56Khulwa yako, vatsililila khukhava Yesu nivavoolelana vene nivali mu Litempeli, “Ni shina shia mukanakananga khukhola? Ni katoto shianyala khwitsa mu mulukha tawe?” 57Vasalisi vakali nende Vafarisayo vali nivahaani lilako ndi mundu alikhuho unyala khumanya havundu ha Yesu ava nali, avavoolele khu vatsiyo khumukumila.

Currently Selected:

YOHANA 11: LLLCATHOLIC

Highlight

Copy