LIRAANGA 20
20
Aburahamu nende Mwami Abimeleki
1Aburahamu yarulayo, natsia mu shivala khuluveka luli ikuvanda wa Kanaani. Yamenya hakari ha mataala ka Kadeshi nende Shuri. Lwa yali nashimenyanga mu litaala lia Gerari, 2yavoola likhuva yili khulondokhana khu mukhali wewe Sara, “Ni mbotso wanje.” Khulwa yako, Mwami Abimeleki wamihanga litaala lia Gerari, yaruma likhuva liu khumulerela Sara. 3Navutswa vutukhu vundi, Nyasaye yalolekha khu Abimeleki mu malooro; namuvoolela, “Uli himbi khukhutsa, shichila mukhali wa uvukule; nu mukhali wu musatsa wundi.”
4Navutswa Abimeleki yali nashili khukona naye, navoola, “Mwami Nyasaye, unyala khutivitsa mundu museletse?” 5Aburahamu mwene neye wavoola, “Ni mbotso wanje. Sara mwene neye wavoola makhuva malala mele. Kholi kenako ni inganakani yu mukari indahi, khandi shikholi shindu shitamanu tawe.”
6Khulwa yako, Nyasaye yavoolela Abimeleki mu malooro, “Nu vulahi, manyi vulahi ndi ukholi kenako ninganakani yu mukari indahi, khandi nashio shivune shichili nikhwikalila khukhukholela vwoni. Nashio shivune shichili nimbula khukhuhuchilila khukona naye. 7Navutswa nuyaanza kalushitsa mukhali mwenoyo khu musatsa wewe; shichila nu muprofeti. Alakhusaalila, utsililile khuva mwoyo. Navutswa niiva ulambakhana khumukalushitsa khu musatsa wewe, toto uve numanyi ndi yivi nende vandu vovo voosi muliitsa khwiirwa.”
8Khulitukhu lialondakhu, Abimeleki yavukha kushili mu mavwevwe, nalaanga varumishi veve voosi; navavoolela shia shindu shiosi shiali nishikholeshe. Vandu vali nivaliho, varaanga khuria. 9Nalwo lwa Abimeleki yalaanga Aburahamu namureeva, “Makhuva shina kukhukholi yaka? Nu vwoni shina vwa inzi nakhola, vulombi inzi nende vandu vanzamihanga khukwa mu matiinyu? Ukhakalushilakhu khukhola vindu viukholele tawe.” 10Abimeleki yavoolela Aburahamu, “Ni shina shia wali nukanakane, shiachila nukhola vindu vienevo?”
11Aburahamu yamuvoolela, “Nakhola kenako, shichila nali ninganakani ndi mundu avulakhuho uli hanu uheetsanga Nyasaye luyali; khandi vanyala khunziira vavukule mukhali wanje. 12Ni kilikali, Sara ni mbotso wanje. Nu mwana wi shikhana wa tata wanje yivula; navutswa mama wewe nu lukanu; namuhila ave mukhali wanje. 13Khulwa yako, lwa Nyasaye yandulitsa mu inzu ya tata wanje, khutsia mu shivala shindi, navoolela Sara, ‘Nindi unyala khumanyinya wanyanza: Havundu hosi ha khutukha, ulavoolela shia mundu wosi ndi, Ni mbotso wanje.’ ”
14Khulwa yako, Abimeleki yavukula makondi nende tsing'ombe, varukwa vasatsa nende vakhali; naha Aburahamu. Yakalushitsila Aburahamu mukhali wewe Sara. 15Abimeleki yavoolela Aburahamu, “Shivala shianje shiosi ni yishi; unyala khumenya shia havundu hosi, ha mwene wenyi.” 16Abimeleki yavoolela khandi Sara, “Lola! Mali khuha mbotso wowo ifetsa vitonye iheelefu indala, khumanyinya vandu ndi uli museletse; shia mundu wosi alamanya ndi shiukholi shindu shiosi shitamanu tawe.”
17Nalwo lwa Aburahamu yasaala khu Nyasaye. Nyasaye yahonyinya Abimeleki, nahonyinya mukhali wewe nende vakhana varukwa, nivivula vaana; 18shichila Mwami Nyasaye yali wayiima vandu vi inzu ya Abimeleki lwivulu, shichila Sara, mukhali wa Aburahamu yali niyahila.
Currently Selected:
LIRAANGA 20: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
