LIRAANGA 18
18
Aburahamu Yalaakwa Mwana vi Shiyayi
1Mwami Nyasaye yalolekha khu Aburahamu himbi khu misala chi miseno chia Mamure. Lwa Aburahamu yali niyikhale himbi ha muliango kwi liheemo lielie mbasu nu kuli mululu muno, 2yaheenza khandi nalola vandu vasatsa vavaka nivasinjile havundu henaho. Lwa yali niyakhavalola vwangu, yilukhaka natsia khuvakanila. Yasikama niyinama hasi, 3navoola, “Munyi vami, leshi khuvirakhu hango hanje vuchila khusinjila; ndi hanu khumurumishila. 4Lekha mulerele matsi musave vilenje vienyu; munyala khuhulushila ha musala hanu. 5Nyenyanga khumulerela shiukhulia shia munyala khulia, munyole tsingulu tsiu khutsililila nu luchendo lwenyu. Mumbele luyali lwa mwinjile hango hanje; leshi murumishile.”
Vamuvoolela, “Nu vulahi muno; khola khuli lwa uvooli.”
6Aburahamu yinjila vwangu mu liheemo navoolela Sara, “Khola vwangu, vukula likunia lilimu nu vusi vulahi vwene, ukande mikati.” 7Khulwa yako, Aburahamu yilukhaka natsia mu shiayo shi tsing'ombe niyahulamu shimoli shilahi shiene, khandi shikhomeelu, khandi naha murumishi wewe; wamanya natsia vwangu khushisinza. 8Yavukula ichilimi ya maveele, maveele, nende inyama, naha vandu yavo valii. Aburahamu yali nasinjile himbi khuvo ha musala henaho, lwa vali nivaliitsanga shiukhulia.
9Khulwa yako, vamureeva, “Ni hena wu mukhali wowo Sara ali?”
Aburahamu yavavoolela, “Ali mu liheemo yelo.”
10Mulala khu vandu venavo yavoola “Mieli tisa nichiakhavira khurula nunundi, niitsa khukalukha, navutswa mukhali wowo Sara, aliitsa khuva niyivula khale mwana wi shiyayi.”
Sara yali inyuma wu mundu mwenoyo, mu muliango kwi liheemo, nahulishitsanga. 11Aburahamu nende Sara vali vasakhula, khandi Sara yali wavira mihika chiu khwivula vaana. 12Sara yaseshela mu mwoyo navoola, “Lwa nasakhula, khandi musatsa wanje wasakhula, nyala khwivula mwana wosi?”
13Mwami Nyasaye yareeva Aburahamu, “Shichila shina Sara nasekha navoola, ‘Ni kilikali, nyala khwivula mwana ninasakhula?’ 14Shindu shilikhuho shinyala khulechelela Mwami Nyasaye? Khuli mboli khale, mieli tisa nichiakhavira khurula nunundi, niitsa khukalukha, khandi Sara aliitsa khuva niyivula khale mwana wi shiyayi.”
15Navutswa Sara yambakhana, navoola, “Shiseshikhu tawe”; shichila yali waria.
Yamuvoolela, “Shikali kario tawe, navutswa wakhasekha.”
Aburahamu Yasaalila Sodomu
16Nalwo lwa vandu yavo vasimukha, nivatsia havundu ha vanyala khulolelaho litaala lia Sodomu, khandi Aburahamu natsia navo. 17Mwami Nyasaye yivoolela mwene, “Shinyala khuvisa khuvoolela Aburahamu ka nzitsanga khukhola tawe. 18Vitsukhulu veve valiitsa khuva vanyishi, khandi luhia lwi tsingulu tsinyishi; khandi khuvirila khuye, vandu vi tsimbia tsiosi mu shivala, valiitsa khukasistswa. 19Mali khumurovola, khu ave ye unyala khwimilila vaana veve nende vitsukhulu veve khulonda makhuva kaanje, nu khukhola likhola liu vulunji khandi katoto. Niiva valiitsa khukhola ndio, niitsa khukholela Aburahamu shia shindu shiosi, shia nali nalaaka niitsa khumukholela.”
20Mwami Nyasaye yavoolela Aburahamu, “Mali khuhulila ndi vindu vitamanu vikholekhanga mu mataala ka Sodomu nende Gomora, khandi vwoni vwa vakholanga nu vunyishi muno. 21Nzitsanga khukholomokha nziyo khulola niiva makhuva kambulilanga ni katoto inoho nu vuvehi.”
22Nalwo lwa vandu vavili venavo varulaho, nivatsia mu litaala lia Sodomu; navutswa Mwami Nyasaye yatsililila khuva na Aburahamu. 23Khulwa yako, Aburahamu yisuunda himbi khu Mwami Nyasaye, namureeva: “Ni kilikali, uliitsa khutivitsa vandu vi likhola liu vulunji nende vandu vatamanu? 24Niiva khuli na vandu vi likhola liu vulunji makhomi karanu mu litaala lienelo, unyala khutivitsa litaala liosi? Shiunyala khuvalolela tsimbavasi, uhonyinyi vandu makhomi karanu? 25Toto, shiutsitsanga khwiira vandu vi likhola liu vulunji nende vandu vatamanu tawe. Shikanyala khwikholekha kario tawe. Shiunyala khukhola ndio tawe. Mukhalachi wa vandu voosi mu shivala khutukha akhole likhola liu vulunji.”
26Mwami Nyasaye yavoola, “Niiva nanyola vandu vi likhola liu vulunji makhomi karanu mu litaala lia Sodomu, nalolela tsimbavasi litaala lienelo shichila vo.”
27Aburahamu yalomoloma khandi navoola: “Mwami Nyasaye, nuyaanza semeha shichila nomolome khu yivi vuchila khukhuria. Ndi mundu vutswa khandi mbulakhu vunyali vu khuvoola shindu shiosi. 28Khuvoole haundi, khuliitsa khuvaho na vandu vi likhola liu vulunji makhomi karanu. Unyala khutivitsa litaala lienelo, shichila vandu varanu vavulakhu?”
Mwami Nyasaye yavoolela Aburahamu, “Niitsa khulekha khutivitsa litaala lienelo, niiva nanyolayo vandu vi likhola liu vulunji makhomi kane na varanu konyene.”
29Aburahamu yalomoloma khandi navoola, “Haundu valanyo lekhayo vandu makhomi kane.”
Mwami Nyasaye yavoolela Aburahamu, “Niitsa khulekha khutivitsa litaala lienelo, niiva nanyolayo vandu makhomi kane konyene.”
30Aburahamu yavoola, “Mwami Nyasaye, nuyaanza lekha khuva nu vurima; navutswa khutukha nomolome khandi. Haundi, unyala khunyolayo vandu makhomi kavaka konyene?”
Mwami Nyasaye yavoolela Aburahamu, “Niitsa khulekha khutivitsa litaala lienelo, niiva nanyolayo vandu makhomi kavaka konyene.”
31Aburahamu yavoola, “Mwami Nyasaye, nuyaanza semeha, shichila nomolome khu yivi vuchila khukhuria. Nukhole shina nunyolayo vandu makhomi kavili konyene?”
Mwami Nyasaye yavoola, “Niitsa khulekha khutivitsa litaala lienelo, niiva nanyolayo vandu makhomi kavili konyene.”
32Aburahamu yavoolela Mwami Nyasaye, “Nuyaanza lekha khuva nu vurima. Nzitsanga khulomolomakhu khandi lulala lwonyene. Nikave karina nunyolayo vandu likhomi vonyene?”
Mwami Nyasaye yavoola, “Niitsa khulekha khutivitsa litaala lienelo, niiva nyala khunyolayo vandu likhomi vonyene.” 33Lwa Mwami Nyasaye yali namali khulomoloma na Aburahamu, yarulaho, Aburahamu nakalukha ingo wewe.
Currently Selected:
LIRAANGA 18: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
