VIKHOLWA 8

1Saulu yaliho, manasanga khu likhutsa lia Stefano.

Saulu Yatambitsa Likanisa

Khulitukhu lienelo, vandu vi likanisa lia Yerusalemi vatambitswa vululu muno. Khulwa yako, vasuuvili voosi vasalanyinywa shia havundu hosi mu tsisomo tsia Yudeya nende Samaria; navutswa varumwa vali nivashili khusalanyinywa. 2Valala khu vandu vali vihaana nu mwoyo mulala khu Nyasaye vayeveela mu shilindwa mmbili kwa Stefano, nivalila tsikhwili tsiu khumwikhula.

3Navutswa Saulu yachelitsa khutivitsa likanisa; yachenda chenda mu shia inzu yosi, khukumila vandu vasatsa nende vakhali nu khuvavoha mucheela.

Lilwatsa li Ivanjeli mu Samaria

4Mumatukhu kenako, vandu vali nivasalanyinywa vilwatsa likhuva lienelo shia havundu hosi ha vatsitsanga. 5Filipu yakholomokha natsia mu litaala lia Samaria, naraanga khwilwatsila vandu makhuva khulondokhana khu Kristo. 6Vituma via vandu vahulishitsa nu mwoyo mulala milwatso ka Filipu yavoolanga, lwa valola viloleshitsu via yakhola. 7Matimoni karula mu vandu vanyishi nikayulanga tsikhwili; khandi vandu vanyishi vali nivafwokoya nende yavo vali nivalema nivahona. 8Khulwa yako, khwali nu vuyaanzi vunyishi mu litaala likali lienelo.

9Mundu walaangwangwa Simoni yali mu litaala likali lienelo, navutswa matukhu kandi yakholanga vukhumu. Yachenyinya Vasamaria lwa yichinjilila, navoola ndi wayitsula tsingulu tsinyishi. 10Vandu vanyishi, vakali khu vati vamusuuvila, nivavoola havulavu, “Mundu uyu ni tsingulu tsia Nyasaye tsilaangwangwa ‘Tsingulu Tsinyishi.’ ” 11Vamuhulishitsa shichila yali wavachenyinya khumatukhu manyishi nu vukhumu vwevwe. 12Navutswa vasuuvila Filipu, lwa yilwatsa Ivanjeli khulondokhana khu Vwami vwa Nyasaye, khandi khulondokhana khu lira lia Yesu Kristo, ma vandu vasatsa nende vakhali nivabatiswa. 13Khali Simoni mwenoyo yasuuvila. Namali khubatiswa, yachenda na Filipu. Yali ni lichenya, lwa yalola vindu viu khuchenyinya nende viloleshitsu viakholwangwa.

14Lwa varumwa vali nivali Yerusalemi vahulila ndi Vasamaria vamali khuhuchilila likhuva lia Nyasaye, varuma Petro nende Yohana khwitsa khuvo. 15Lwa vatukhaho, va vasaalila vanyole Roho Mutakatifu, 16shichila Roho Mutakatifu yali nashili khwitsakhu khu khali mulala khuvo. Vali vabatiswa vutswa khuvirila mu lira liu Mwami Yesu. 17Nalwo lwa Petro nende Yohana vavikha khuvo makhono kavo; ma vandu venavo, nivanyola Roho Mutakatifu.

18Lwa Simoni yalola ndi vandu venavo vanyoli Roho, lwa varumwa vavikha khuvo makhono kavo, yachelitsa khuha Petro nende Yohana tsisenti; 19navoola, “Mbikhu khandi tsingulu yitsi, khu mundu wambikhakhu makhono kaanje anyole Roho Mutakatifu.”

20Navutswa Petro yamuvoolela, “Utivitswi ni tsisenti tsiotsio, shichila ukanakananga unyala khukuula ni tsisenti shihanwa shia Nyasaye! 21Uvulakhu shitonye inoho lisanga mu muhinzilu kweru, shichila uli nu mwoyo mutamanu imbeli wa Nyasaye. 22Khulwa yako, wikanile khurula mu vutamanu vwovwo vwenovo, usaale khu Mwami Nyasaye, akhusemehe tsinganakani tsili mu mwoyo kwokwo tsienetso. 23Ni kilikali, kali havulavu ndi wayitsula imbotokha, khandi vwoni vwa khukhola khuva murukwa.”

24Simoni yavoolela Petro nende Yohana, “Numuyaanza saalilikhu khu Mwami Nyasaye, khu vindu via muvooli vienevo vivuli khungwila.”

25Lwa Petro nende Yohana vavoola makhuva kavo khandi nivamali khwilwatsa likhuva liu Mwami, vakalukha Yerusalemi. Nivali khu luchendo lwavo, vilwatsa Ivanjeli mu michitsi minyishi chia Samaria.

Filipu Yabatisa Mulala khu Varumishi va Etsopia

26Injelosi yu Mwami Nyasaye yavoolela Filipu, “Rula utsi khuluveka luli ikuvanda khu muhaanda kurulanga Yerusalemi nu kutsia mu litaala lia Gaza.” Muhaanda kwenoko kuli mu shiangalangwi. 27Khulwa yako, Filipu yasimukha natsia. Nali khu muhaanda kwenoko, yakana nu Muetsopia, wali nali shitsili khandi mwimilili wi livishilu liu Muruchi wi shikhali wa Etsopia. Mundu mwenoyo yali watsia khusaala Yerusalemi; 28khandi yali nakalukhanga ingo wewe niyikhale khu likaale lielie nasomanga shitabu shiu Muprofeti Isaya. 29Roho Mutakatifu yavoolela Filipu, “Simukha utsi uchendele himbi khu likaare yelo.” 30Filipu yilukhaka natsia khu likaare lienelo. Yahulila mundu mwenoyo nasoma mu shitabu shiu Muprofeti Isaya. Filipu yamureeva, “Unyala khuva wamanya makhuva ka usomanga?”

31Mundu mwenoyo yamuchipa, “Nyala khukamanya munjila shina, mundu nakhambolele shia kavoolanga?” Khulwa yako, mundu mwenoyo yalaanga Filipu khwitsa khwikhala naye. 32Tsimbaso tsia Mahandiko Matakatifu ku mundu mwenoyo yali nasomanga tsiali,

“Yali khuli likondi lihilwangwa khutsia khusinzwa,

khuli shimeme shi likondi shihonjelu lwa shikhalakwa vwoya,

livulakhuho likhuva lia yavoola.

33Vamuha tsisoni, vuchila khukholelwa katoto.

Mundu avulakhuho uliitsa khuvoolakhu shindu shiosi khulondokhana khu vitsukhulu veve?

Shichila warulitswa khulilova.”

34Mundu wali shitsili mwenoyo yareeva Filipu, “Nuyaanza, mbolela nu mundu shina wu muprofeti alomolomakhu? Alomolomanga khuye mwene inoho khulondokhana khu mundu wundi?” 35Khulwa yako, Filipu yaraanga khulomoloma; yaraanjila khu tsimbaso tsia Mahandiko Matakatifu, manamwilwatsila Ivanjeli khulondokhana khu Yesu. 36Lwa vali nivachendanga khu muhaanda, vatukha havundu ha matsi kali nikali. Mundu wali shitsili mwenoyo yavoolela Filipu, “Lola, matsi kali hanu! Shiakhachila mbuli khubatiswa na matsi ni shina?” [ 37Filipu yamuvoolela, “Niiva unyala khusuuvila nu mwoyo kwosi, unyala khubatiswa.” Mundu wali shitsili mwenoyo yavoolela Filipu, “Ndi ni lisuuvila Yesu Kristo nu Mwana wa Nyasaye.” ]#8:37 Mahandiko kandi kavula luvaso lwa 37.

38Khulwa yako, yahaana lilako likaare lienelo lisinjilitswi, ma voosi vavili, ye mwene nende Filipu nivinjila mu matsi; ma Filipu namubatisa. 39Lwa varula mu matsi, nonoho lwa Roho wu Mwami Nyasaye yarulitsa Filipu hawenaho. Mundu wali shitsili mwenoyo shiyalolakhu khandi Filipu tawe; navutswa yatsililila nu luchendo lwelwe nu vuyaanzi. 40Navutswa Filipu yanyolekha nali mu litaala lia Azota. Nali khu luchendo lwelwe, yilwatsa Ivanjeli mu mataala koosi khutukha lwa yatukha mu litaala lia Kaisaria.

Currently Selected:

VIKHOLWA 8: LLLCATHOLIC

Highlight

Copy