1 VAKORINZO 3

Varumishi va Nyasaye

1Vasuuvili vashianje, shinali nalomoloma khu munyi, khuli lwa nomolomanga khu vandu vali na Roho tawe. Navutswa nalomoloma khu munyi khuli vandu vu mu shivala shinu, khuli vaana vatititi mu limenya liu Vukristayo. 2Namung'weshitsa maveele, navutswa shiukhulia shitinyu tawe; shichila mwali numushili khutukha vamulia shiukhulia khuli shienesho. Khali shiumunyala khulia shiukhulia khuli shienesho tawe; 3shichila mushili vandu vu mu shivala shinu. Lwa munyi vene muli nimbotokha khandi mwamenya nu mulembananga, shikamanyinyanga mumenyanga khuli vandu vu mu shivala shinu, khandi muli nu mwiima khuli kwa vandu vu mu shivala shinu? 4Lwa mulala khu munyi avoolanga, “Nondanga Paulu,” na wundi avoola, “Nondanga Apolo,” toto shiumukholanga khuli vandu vu mu shivala shinu vakholanga? 5Khali ndio, Apolo ni viina? Paulu ni viina? Ni varumishi va Nyasaye vonyene, vachila numusuuvila. Shia mulala khu khutsi akholanga muhinzilu kwa Mwami yamuha akhole. 6Inzi naraaka vukuutsa, Apolo nasama na matsi vukuutsa vwenovo. Navutswa Nyasaye neye wachila vukuutsa vwenovo nuvumeela. 7Shikali mundu uraakanga vukuutsa inoho usamanga na matsi uli nu vukhonyi muno khuvira wundi tawe. Ni Nyasaye wonyene uchilanga shindu nishimeela. 8Mundu uraakanga nende mundu usamanga na matsi vakholanga muhinzilu mulala; navutswa Nyasaye aliitsa khurunga shia mulala murungu kwekwe khulondokhana khu muhinzilu kwa ye mwene yakhola. 9Khutsi khuli vutswa vahinzili vakhukholanga mihinzilu na Nyasaye; navutswa munyi navo vamuli khuli mulimi kwa Nyasaye.

Munyi muli khandi khuli mumbakho kwa Nyasaye. 10Ninzi wraanjitsa musinji khuli mumbashi wamanya khumbakha, khuvirila khu tsimbavasi tsia Nyasaye yamba; navutswa mundu wundi yumbakhanga khu musinji kwenokwo. Nu vulahi shia mulala nali nu vucheli vu khumanya khuli yumbakhanga. 11Mundu avulakhuho unyala khuraanjitsa musinji kundi nu kukhali yoko kwraanjitswa, nu kuli Yesu Kristo. 12Niiva mundu aliitsa khumbakha khu musinji yuku narumishilanga itsahabu, ifetsa, machina malahi ku vukuuli vululu, misala, vunyasi inoho makata, 13muhinzilu kwekwe kuliitsa khumanyikhana havulavu khuli kwakholwa. Litukhu lia Kristo aliitsa khulolekha liliitsa khukura havulavu; shichila litukhu lienelo liliitsa khulolekhana nu mulilu, na mulilu kwenoko kuliitsa khupima, nu khumanyinya vulahi vwa shia muhinzilu ku mundu. 14Niiva muhinzilu ku mundu yakhola khu musinji kwenoko kuliitsa khuvula khusambwa, mumbashi mwenoyo aliitsa khunyola murungu. 15Navutswa niiva muhinzilu ku mundu yakhola kuliitsa khulaalitswa nu mulilu, mumbashi shialiitsa khurungwa tawe. Ye mwene aliitsa khuhonyinywa, navutswa aliitsa khuva khuli mundu wilukhanga navirila mu tsimemo tsiu mulilu.

16Toto, mushili khumanyakhu ndi muli khuli Litempeli lia Nyasaye khandi Roho wa Nyasaye ali mwoyo mu munyi? 17Niiva mundu anyala khwononyinya Litempeli lia Nyasaye, Nyasaye alamwononyinya. Litempeli lia Nyasaye ni litakatifu, khandi munyi navo vamuli khuli Litempeli lienelo.

18Mundu avuli khwikaata mwene. Niiva mulala khu munyi akanakananga ali nu vusitsa mumatukhu kanu, nu vulahi mwene navele muyiingwa, khu aliva nu vusitsa. 19Shia mundu wosi uli nu vusitsa mu shivala shinu, alolekhanga khuva nu vusilo khu Nyasaye. Mahandiko Matakatifu kavoolanga, “Nyasaye akumilanga vasitsa mu vucheli vwavo,” 20khandi Mahandiko Matakatifu kandi kavoolanga, “Mwami Nyasaye wamanya ndi ka vasitsa vakanakananga ni ki shikhaya.” 21Khulwa yako, mundu avuli khwichinjilila khulondokhana khu ka vandu vakholanga. Ni kilikali, shia shindu shiosi ni shienyu; 22ave ni Paulu inoho Apolo inoho Kefa inoho shivala shinu inoho vulamu inoho likhutsa inoho vindu vikholekhanga mumatukhu kanu inoho mumatukhu kaliitsa khuvaho, viosi ni vienyu. 23Munyi navo vandu va Kristo, na Kristo nu wa Nyasaye.

Currently Selected:

1 VAKORINZO 3: LLLCATHOLIC

Highlight

Copy