Mariko 3

Yeso okogwenia omonto okoboko kwaye kwagataete

(Mat 12:9-14; Luk 6:6-11)

1Yeso agasoa naende ase esinagogi. Agwo narengeo omonto, okoboko kwaye kwagataete. 2Agwo mbarenge oo abanto gete abwo baganetie gotega Yeso barore gose nagwenie omonto oria ase rituko ri’Esabato, banyare komosoera. 3Agateebia omonto oria okoboko kwaye kwagataete, “Tenena gati aa!” 4Akababoria, “Mboronge ase rituko ri’Esabato gokora amaya, gose gokora amabe; gotooria obogima, gose koboita?” Bagakira. 5Akabamogoreria amaiso chinsemo chionsi ase okobea, akaigwa obororo ase engencho y’obokong’u bwe chinkoro chiabo, agateebia omonto oria, “Rambora okoboko kwao!” Agakorambora, na okoboko kwaye gokagwena. 6Erio kegima Abafarisai baria bagasoka, bakagamba amo n’Abaherodiani buna barakore baite Yeso.

Omoganda bw’abaanto engegu y’enyancha

7Erio Yeso akarwa agwo amo n’Aborokigwa baye, bakagenda goika engegu ye’nyancha ya Galili, na omoganda omonene korwa Galili, naboigo korwa ase Boyahudi, 8na Yerusalemu, na Idumea, na ng’umbu ya Yorodani, ne chinsemo chia Turo na Sidoni okabatunyana. Ochia koigwa ebirage bi’amang’ana onsi arenge gokora, omoganda oyio omonene, okamochiera. 9#Mar 4:1; Luk 5:1-3Yeso agateebia aborokigwa baye bamobekere obwato ang’e ase engencho y’abanto; erio omoganda tomomiga. 10Ekiagera agwenetie abanto, bonsi abarenge nemechando bakamosongerera, banyare komokuna. 11Na abanto barenge n’ebirecha bi’eubi bagachia komoorora, bakagwa ase obosio bwaye, bakarera bagateeba, “Aye naye Omwana o Nyasae.” 12Akabitianera mono tibimoorokia.

Yeso ogochora abatomwa ikomi na babere

(Mat 10:1-4; Luk 6:12-16)

13Erio Yeso agatiira gochia egetunwa igoro, akarangeria abwo arigetie ere omonyene; na barabwo bakamochiera. 14Agachoora ikomi na babere, abwo arogete abatomwa erio banyare koba amo nere, erinde abatome bagende korandia, 15na babe nokobua kw’ogoseria ebirecha. 16Baria ikomi na babere achoorete nabwo aba: Simioni nere arogete erieta rinde Petero, 17na Yakobo, omwana o Zebedi, na Yohana, momura omwabo Yakobo, akabaroka erieta Boanergi, engencho yaye: Abana b’enkoba; 18Anderea na Filipo, na Baritholomayo, na Matayo, na Thomas, na Yakobo bw’Alufayo, na Tadayo, na Simioni, oyomo bw’Abazelote, 19na Yudasi Iskariota, nere oyomoruete.

Yeso na Beelizebuli

(Mat 12:22-37; Luk 11:14-23; 12:10)

Erio agasoa nyomba. 20Na omoganda ogasangerereka naende; barabwo abanyene tibanyara nonya nokoria. 21Abaamate baye bagachia koigwa amang’ana aya, bagasoka kogenda komobwata, ekiagera bateebete, “Obakirwe n’eosi.” 22#Mat 9:34; 10:25Na aborokia b’amariiko, abarwete Yerusalemu, bakaboora, “Nabwatire na Beelizebuli, naende agoseria ebirecha ase okobua kw’omonene bw’ebirecha.” 23Erio Yeso akabarangeria bache asare, akabateebia ase emebayeeno, “Inaki Saitani aranyare goseria Saitani? 24Na oborwoti kaboraatananeke ase borobwo obonyene, oborwoti boria tibokonyara gotenena. 25Na enyomba keraatananeke enyene, enyomba eria tekonyara gotenena. 26Na onye Saitani bweimokeire ere omonyene, na gweatanana, takonyara gotenena, korende nabe nomoerio. 27Omonto takonyara gosoa ase enyomba y’omonto omonyene chinguru na gosakora ebinto biaye, atamosibeti ritang’ani oria omonyene chinguru; nario aranyare gosakora enyomba yaye.

28“Ekeene nabateebirie: Ebibe bionsi Mwanyabaanto nabaaberwe, na okorama gwonsi bararame, 29#Luk 12:10korende monto onde bwensi orarame Omoika Omochenu takwaberwa nonya ng’ake, korende nigo arabe nebibe goika kare na kare.” 30Nigo abateebetie ayio ekiagera bateebete, “Nabwatire nekerecha ki’eubi.”

Ng’ina na bamura bamwabo Yeso

(Mat 12:46-50; Luk 8:19-21)

31Ng’ina na bamura bamwabo Yeso bagaacha, bagatenena isiko, bagatoma omonto komorangeria. 32Na omoganda nigo orenge oikaransete omoetanaine, okamoteebia, “Rora nyoko na bamura bamino isiko bare, mbagotagete.” 33Yeso akabairaneria, “Baba na bamura baminto mbarabi?” 34Akabarigereria abwo baikaransete bamoetanaine, akabora, “Rora aba nabwo baba na bamura baminto! 35Inaki oyorakore ogwancha kwa Nyasae, oyio nere baba na momura ominto, na mosubati ominto.”

Currently Selected:

Mariko 3: EKGE

Highlight

Copy