Matayo 14

Ogokwa kwa Yohana Omobatisi

(Mar 6:14-29; Luk 9:7-9)

1Ekero keria Herode omorwoti o Galili akaigwa chinkuma igoro ya Yeso; 2agateebia abasomba baye, “Oyo nere Yohana Omobatisi, obokiigwe korwa ase abakuure, eke nakio gekogera chinguru echio chigokora emeremo asare.” 3#Luk 3:19,20Inaki Herode konya obwatire Yohana, omosibire, omobekire echela ase engencho ya Herodia, moka Filipo, momura omwabo, 4#Abal 18:16; 20:21ekiagera Yohana amotebetie, “Teri boronge ase ore komenyana nere.” 5Goika akarigia komoita, korende akairoka abanto, ekiagera konya banchire ng’a Yohana n’omobani orenge. 6Rigachia goika rituko ri’okoinyora okoiborwa kwaye Herode, omoiseke bwe Herodia agatenga gati‐gati y’ abanto, akagokia Herode. 7Erio Herode agatiana ase okomoriera eira ng’a namoe kende gionsi araborie. 8Kobwatekana n’obosemia bwa ng’ina omoiseke oria agateeba, “Ing’a omotwe o Yohana Omobatisi aiga ase esani.” 9Omorwoti agaichana, korende ase engencho ye chiira chiaye na abageni baye ase omoyega, agachiika ayoegwe. 10Agatoma omonto ase echela ime anache Yohana omotwe. 11Omotwe oye okarentwa ase esani, okaegwa omoiseke oria, na ere akayoira ase ng’ina. 12Aborokigwa baye bagachia bakabogoria omobere, bakayotindeka, bakagenda, bagateebia Yeso amang’ana ayio.

Okoragerigwa kw’ abanto chilifu isano

(Mar 6:30-44; Luk 9:10-17; Yoh 6:1-13)

13Bono ekero Yeso achia koigwa aya, akarua agwo nobwato, akagenda ere bweka aase abanto batari. Korende ekero emeganda yachia koigwa aya, bakamotunyana namagoro korwa ase emechie. 14Ekero Yeso aikire engegu, akarora omoganda omonene, akabarorera amaabera, akagwenia abarwaire babo. 15Ekero riachia koba mogoroba, aborokigwa baye bakamochiera, bakaboora, “Aase aa negesomo, ngochia koira bore, batige abanto bagende ebinyoro begorere endagera.” 16Yeso akabora, “Tibagwenereti kogenda; inwe bae endagera barie.” 17Barabwo bakamoteebia, “Titobwati gento aiga, otatiga emegati etano ne chinswe ibere.” 18Akabora, “Bindetere aiga.” 19Agachiika emeganda eikaranse inse ase obonyansi; akabogoria emegati eria etano ne chinswe chiria ibere, akarigereria igoro, akabisesenia, agasamunyora emegati, akaa aborokigwa emegati eria, na aborokigwa bakayea emeganda. 20Bakaria bonsi, bakaigota. Bagasangereria ebisamunye bi’emegati ebiatigarete, ebitonga ikomi na bibere biichire. 21Na abwo bariete nigo barenge abasacha ange chilifu isano (5,000), otatiga abakungu na abana.

Yeso ogotaara enyancha igoro

(Mar 6:45-52; Yoh 6:16-21)

22Erio agachiika aborokigwa baye bariine obwato, bamotang’anere kogenda ng’umbu ende, goika akaa emeganda ribaga egende. 23Na nyuma kaeire emeganda ribaga kogenda, akariina ebitunwa igoro ere bweka gochia gosaba. Riachia koba mogoroba akaba agwo bweka. 24Korende obwato konya bwaikire enyancha gati bokorunda‐rundigwa nemerindo, ekiagera omwaga nigo obatangete. 25Na ekero kiabotuko ange gokiamoka, Yeso agacha ase bare, ogotaara ase enyancha igoro. 26Korende ekero aborokigwa bachia komorora ogotaara ase enyancha igoro, bakaondoka, bakaboora, “Eri nerirengari!” Bagaaka eriogi ase okoiroka. 27Erio kegima Yeso agakwana nabarabwo, akabora, “Remia chinkoro! Ninche. Timoiroka!”

28Petero akamoiraneria, “Omonene, onye naye, ’nchiike nchiche agwo ase ore igoro ase amaache.” 29Akamoteebia, “Inchuo!” Petero agaika korwa ase obwato, agataara igoro ase amaache, gochia ase Yeso. 30Korende ekero achia korora omwaga bw’echinguru, akairoka, agachaaka korimera amaache ime, agaaka eriogi, agateeba, “Omonene ntooria!” 31Erio kegima Yeso akarambora okoboko kwaye, akamobwata akamoteebia, “Aye omonto bw’okwegena ogoke, nase ki okwoboa?” 32Ekero bachia koriina obwato ime, omwaga ogakira. 33N’abwo abarenge ase obwato ime bakamosasiima, bagateeba, “Ekeene, aye n’Omwana o Nyasae.”

Abanto ba Genesareti bakogwenigwa

(Mar 6:53-56)

34Ekero bambokire, bagaika ense ya Genesareti. 35Ekero abanto b’orogongo roria bachia komomanya, bagatoma amang’ana ase chinsemo chionsi, bamorentere bonsi abarenge abarwaire; 36bakamosorora ng’a abae ribaga bakune nonya nomokoba bw’eyanga yaye#9:20; na bonsi abayokunete bakagwenigwa.

Currently Selected:

Matayo 14: EKGE

Highlight

Copy