Luka 8

Abakungu abatunyanete Yeso

1Magega ase aya, akaba ngoetanana are ase emechie na ebichie, okorandia na kobateebia amang’ana amaya ay’oborwoti bwa Nyasae. Na baria ikomi na babere nigo barenge amo nere, 2#Mat 27:55,56; Mar 15:40,41; Luk 23:49na abakungu bande ababwatire n’emeika emebe bakagwenigwa nere: Mariamu ore korokwa Magidalena, oria orusetigwe ebirecha bitano na bibere, 3na Yoana moka Kusa, omorendi bwe Herode, na Susana, na abande abange. Abwo nigo barenge kobakorera ne chinibo chiabo.

Omoreng’anio bw’omobusuri

(Mat 13:1-9; Mar 4:1-9)

4Ekero omoganda omonene osangererekanete, na abanto ba kera omochie bakamochiera, agakwana ase omoreng’anio: 5“Omobusuri akamanora kogenda kobusura embusuro yaye: Ekero akobusura, echinde chikagwa enchera ensemo, chigatiringwa namagoro, chinyoni chia igoro chigachiria. 6Na echinde chikagwa ase egetare, chikamera, chikooma ase okomocha amaache. 7Na echinde chikagwa ase amagwa ime, na amagwa aria agakina amo na chirochio, agachimiga. 8Na echinde chikagwa ase amaroba amaya, chikamera, chikama rigana.” Ekero are kobateebia aya, agaaka eriogi, akabora, “Oyore namato akoigwera, tiga aigwe.”

Ogotebereria kw’omoreng’anio oria

(Mat 13:10-23; Mar 4:10-20)

9Aborokigwa baye bakamobooria, “Omoreng’anio oyio ninki ogoteeba?” 10#Isaya 6:9Agateeba, “Inwe mwaeirwe komanya obobisi bw’oborwoti bwa Nyasae; korende abande nabateebigwe ase emereng’anio, erinde okong’ereria bariingererie, korende tibarora, naende ogotegerera bategerere, korende tibaigwa. 11Omoreng’anio noro oyo: Embusuro nering’ana ria Nyasae. 12Baria b’enchera ensemo, nabwo baikire koriigwa; erio Saitani ochicha, na korusia ring’ana riria ase chinkoro chiabo, erinde tibacha kwegena batooreke. 13Na baria bare ase egetare nabwo baria bakoigwa ring’ana, baribwata nomogooko, korende barabwo tibari nemeri, begena ase ekero egeke, na ekero ki’ogoteemwa beatanana. 14Na echio chiagwete ase amagwa, aba nabwo bakoriigwa, na barabwo kobakogenderera bamigwa nokorengereria kw’enibo, na omogooko bw’ense eye, tibakwama ase ogoikerania. 15Na echinde chire ase amaroba amaya; aba nabwo bare ne chinkoro chingiya naende echi’ekeene, bakoigwa ring’ana, baribwata, bama okwama noboremereria.

Okworokereria korwa ase etaya

(Mat 4:21-25)

16 # Mat 5:15; Luk 11:33 “Omonto onde tari ogotongia etaya na koyemumeka negento, gose koyebeeka nyaro y’oborere; korende nigo akoyebeeka igoro ase ekebekerero kiaye, erinde abagosoa barore oborabu. 17#Mat 10:26; Luk 12:2Ekiagera ring’ana tiriri ribisegete, ritache koorokigwa, gose eria bobisi ritache komanyekana maiso marore. 18#Mat 25:29; Luk 19:26Mwerende gaki inwe buna mokoigwa, ekiagera ere oyobwate naegwe, korende oyotabwati, naurwe nonya nkeria arengereretie abwate.”

Obomwabo bw’ekeene

(Mat 12:46-50; Mar 3:31-35)

19Ng’ina na bamura bamwabo bakamochiera, korende tibanyara komoika ang’e ase engencho y’omoganda. 20Akairerwa amang’ana agateebigwa, “Nyoko na bamura bamino mbateneine isiko, baganetie kororana naye.”

21Korende akabateebia, “Baba na bamura baminto nabwo aba abakoigwa ring’ana ria Nyasae na korikora.”

Yeso ogotoereria omwaga

(Mat 8:23-27; Mar 4:35-41)

22Rituko erimo akariina obwato, ere na aborokigwa baye, akabateebia, “Twamboke gochia ng’umbu y’enyancha.” Bakamanora. 23Kobachia kogenda, akarara chitoro; omwaga ogaacha, na emerindo ase enyancha, obwato bogaachaka goichorwa namaache, bakaba ase emechando. 24Bakamochiera, bakamotura, bakaboora, “Omonene Nyasae, ngosira tore!”

Erio ere akaboka, agatogonyera omwaga na emerindo y’amaache, na birobio bigakira, gokaba ogotoerera. 25Akabateebia, “Okwegena kwaino, ng’ai kore?”

Bakairoka, bagakumia bagateebania, “Oyo nere ng’o, ogochika nonya nomwaga na enyancha, bikomoigwera?”

Yeso okogwenia Omogeraseni obwatire nebirecha

(Mat 8:28-34; Mar 5:1-20)

26Bagaika engegu y’ense y’Abageraseni, erigereretie Galili. 27Agachia goika engegu, akaumerana nomonto oyomo bw’omochie oria, obwatire nebirecha; na ase amatuko amange tarenge kweboyia chianga, tarenge komenya nyomba, otatiga ase chimbeera. 28Agachia korora Yeso, agaaka egeturi, akagwa ase obosio bwaye, agakwana neriogi rinene, okobora, “Inaki inde naye, Yeso, Omwana o Nyasae Ore Igoro Mono? Nagosabire, tonchanda.” 29Naki konya ochikiire ekerecha keria ki’eubi gesoke korwa ase omonto oria. (Ekiagera ebiro ebinge nigo kiare komobwata; nonya orenge gosibwa nebinyuri ne chingataare na korendwa, nigo arenge kobutora ebisibo biria oirwa nekerecha keria goika ase erooro.)

30Yeso akamobooria, “Naki okorokwa?”

Akairaneria, “Elegioni”, ekiagera ebirecha ebinge biamosoete. 31Bikamosorora tabichika bigende goika ase eora entambe. 32Ndiarengeo riicho rinene rie chimbeche, chiare korisia ase egetunwa, bikamosorora abie ribaga bichisoe. Akabia ribaga. 33Ebirecha biria bigasoka korwa ase omonto oria, bigasoa chimbeche. Riicho riria rigatirimboka bwango gochia ase egeturunkano goika chikagwa enyancha ime, chikarimera.

34Abarisia bagachia korora ayio, bagatama, bakararia amang’ana ase omochie na ebichie. 35Abanto bagasoka barore amang’ana aorokire; bagachiera Yeso, bakarora omonto oria orusetigwe ebirecha biria oikaransete ase amagoro a Yeso obegete chianga, ore nebirengererio ebironge, bakairoka. 36Na baria bayaroche bakabateebia buna oria obwatire nebirecha agwenetigwe. 37Naboigo abanto bonsi b’ense y’Abageraseni bakamobooria arue ase bare, ekiagera basoetwe nokoiroka okonene. Erio akariina obwato, akairana. 38Na omonto oria orusetigwe ebirecha akamosorora abe amo nere, korende Yeso akamokania, akabora, 39“Irana nka bwoo orarie amang’ana amanene aya Nyasae agokoreire.” Akagenda bwoye, akararia ase omochie omogima amang’ana amanene aya Yeso amokoreire.

Omoiseke o Yairo okobokigwa, na omokungu oyorenge noborwaire bw’okorua amanyinga okogwenigwa

(Mat 9:18-26; Mar 5:21-43)

40Yeso agachia koirana, omosangererekano okamogokera, ekiagera abanto bonsi bamoganyete. 41Omonto oyomo, erieta riaye Yairo, omotang’ani bw’esinagogi, agacha, akagwa ase amagoro a Yeso, akamosorora asoe nyomba mwaye, 42ekiagera narenge nomoiseke, omwana omomoima, konya okoorire emiaka ikomi na ebere, na ere nigo arenge ang’e ogokwa.

Ekero Yeso arenge kogenda abanto bakaba bakomomiga‐miga. 43Naende omokungu oyomo oyorenge noborwaire bw’okorua amanyinga ase engaki y’emiaka ikomi na ebere, konya oonirie ebinto bionsi ebiarenge nabio ase abarwaria, tanyara kogwenigwa nonde. 44Ere agatunyana Yeso korwa magega, agakuna omokoba bw’eanga yaye; erio kegima amanyinga aye agakama. 45Yeso akabooria, “Ning’o onkuna?” Ekero abanto bonsi bagakana, Petero na baria barenge amo nere bakamoteebia, “Omonene, omoganda nigo ogoetanaine na gokomiga.” 46Yeso agateeba, “Omonto onkunire, ekiagera naigure ng’a chinguru chiandure.” 47Omokungu oria ekero achia korora ng’a tabisekaneti, agacha okoiguswa, akamogwera, na ase amasio ’abaanto bonsi akamworokia engencho yagera omokuna, naende buna agwenetigwe ara rimo. 48Akamoteebia, “Omoiseke one, okwegena kwao gwakogwenirie; genda nomorembe.”

49Erio kagokwana, omonto agacha korwa ase enyomba y’oria omotang’ani bw’esinagogi, akamoteebia, “Enyaroka yao yakuure, torosia omworokia naende.”

50Yeso agachia koigwa aya, erio akamoiraneria, “Toiroka; egene rioka, ere nagwenigwe.”

51Agachia goika nyomba, tancha monto onde asoe amo nere otatiga Petero, na Yohana, na Yakobo, na ise na ng’ina b’omwana oria. 52Na abanto bonsi nigo barenge komoreera, bakweng’ereria, korende Yeso akabora, “Timorera, ekiagera takweti, korende nigo araire.”

53Bakamosekerera, bamanyete ng’a okuure. 54Korende ere akamobwata okoboko kwaye, agateeba, “Omwana, imoka!” 55Omoika oye okairana, agatenena erio kegima Yeso akabachiika bamoe endagera arie. 56Abaibori baye bagakumia, mono, korende akabachiika tibateebia monto ayakoreka.

Currently Selected:

Luka 8: EKGE

Highlight

Copy