Luka 18
18
Omoreng’anio bw’omoboraka na omogambi
1Yeso akabateebia omoreng’anio ng’a nebagwenerete komosaba Nyasae botambe, tibakwa emioyo, 2akabora, “Narenge omogambi ase omochie gete, otasigete Nyasae, gose taare koyiera monto. 3Na ase omochie oyio narengeo omoboraka orenge komochiera botambe, ogoteeba: Ngambera boronge ase omosiira one. 4Omogambi oria ase ekero egeke tancha; magega agateeba ase omoyo oye: Nonya inche tinsigeti Nyasae, gose tindi koyiera monto, 5korende ekiagera omoboraka oyo andosirie, nimogambere boronge, tacha kondosia ase ogonchichera botambe.” 6Omonene akabora, “Igwa aya omogambi otari omooronge agoteeba. 7Inee! Nyasae takobanyorera oboronge abachore baye, abakomoreera omobaso na obotuko? Na ere takoba omoremereria ase bare? 8Nabatebirie nabanyorere oboronge ase obwango. Korende Omwana‐o‐Mwanyabaanto kagocha, Inee, nanyore okwegena ase ense?”
Omoreng’anio bw’Omofarisai na omorusia ebango
9Akabateebia omoreng’anio oyo ase abanto baare gwekaga ng’a nabanyene oboronge, bagochaaya abande bonsi: 10“Abanto babere bagatiira gochia Hekalu gosaba; oyomo n’Omofarisai na oyonde omorusia ebango. 11Oria Omofarisai agatenena, agasaba iga ase omoyo oye: Nyasae, nakoiraneirie ng’a mbuya mono, ekiagera inche tindi buna abanto bande, abauri, abatari boronge, abatomani, gose buna oyo omorusia ebango. 12Igo nkweng’ata ara kabere ase echuma; ’ndua ensemo ya ikomi y’okonyora kwane gwonsi. 13Na oria omorusia ebango agatenena are, tarigia nonya nkoimokia amaiso aye igoro, korende ageaka‐aka egekuba kiaye, okobora: Nyasae, indorera amaabera inche omonyene ebibe! 14#Mat 23:12; Luk 14:11Nabatebirie inwe: Omonto oria nigo aigete bwoye konya obareirwe oboronge kobua oria onde, ekiagera oyokweimokereria igoro nairanigwe inse, na ere oyokweirania inse naimokererigwe igoro.”
Yeso ogosesenia abana abake
(Mat 19:13-15; Mar 10:13-16)
15Bakamorentera abana ebing’werere, erinde abakune; korende aborokigwa baye bagachia kobarora, bakabatanga. 16Korende Yeso akabarangeria bache asare, ogoteeba, “Batige abana bache ase ’nde, timobaisa kobatanga, ekiagera abare buna aba, oborwotinbwa Nyasae nobwabo. 17Ekeene nabateebirie: Onde bwensi otancheti oborwoti bwa Nyasae buna omwana omoke, takobosoa nonya ng’ake.”
Obogima bwa kare na kare, na obobe bw’obotenenku
(Mat 19:16-30; Mar 10:17-31)
18Na omogambi gete akamobooria, “Omworokia omuya, ninki ndakore inyare koba nomwando bw’obogima bwa kare na kare?”
19Yeso akamoiraneria, “Naki okondoka omuya? Onde tari omuya otatiga Nyasae bweka. 20#Okong’ 20:14; Okoir 5:18; Okong’ 20:13; Okoir 5:17; Okong’ 20:15; Okoir 5:19; Okong’ 20:16; Okoir 5:20; Okong’ 20:12; Okoir 5:16Kwamanyire amachiiko; Totomana, Toita, Toiba, Toteba oborimo, sika iso na nyoko.”
21Akabora, “Ayio onsi ninyabwatete korwa obwana bwane.”
22Ekero Yeso achia koigwa aya, akamoteebia, “Egento ekemo ngekoremete; oonie ebio ore nabio bionsi ogabere abataka, na aye nobe nenibo igoro. Erio ochiche ontunyane.”
23Korende ekero achia koigwa aya akaba nomoichano, ekiagera arenge omonda mono. 24Nabo Yeso akamorigereria, akabora, “Nabe aakong’u ase abare abanda gosoa ase oborwoti bwa Nyasae! 25Naki naororo engamia goeta ase ekebao gi’esiindani, kobua omonda gosoa ase oborwoti bwa Nyasae.”
26Na abwo abayaigwete bakaboora, “Ning’o rende oranyare gotooreka?”
27Akabora, “Aya takonyarekana ase Mwanyabaanto, nigo akonyarekana ase Nyasae.”
28Petero akabora, “Rora, intwe twatigire chinka chiaito, twagotunyanire aye.”
29Akabateebia, “Ekeene nabateebirie: Monto onde tari otigire enyomba, gose mokaye, gose abamwabo, gose abaibori, gose abana, ase engencho y’oborwoti bwa Nyasae, 30otanyore kobua ara aange bono, naende ase ense egochi‐gocha obogima bwa kare na kare.”
Obobani bwa gatato bwa Yeso igoro y’ogokwa kwaye
(Mat 20:17-19; Mar 10:32-34)
31Erio Yeso akaira baria ikomi na babere, akabateebia, “Rora, ngotiira tore kogenda Yerusalemu, naende amang’ana onsi ayariikeretwe Omwana‐o‐Mwanyabaanto nababani naikeranigwe. 32Naki nabekwe ase amaboko y’abanto b’Ebisaku, nakorerwe echeche, na gokorerwa bobe, na gotwerwa amate; 33naende inabamoake emecharichi na komoita, na ase rituko ria gatato naboke.”
34Korende tibamanya nonya nering’ana erimo ase aya. Ring’ana eri rikabiseka ase bare, na tibamanya ayateebetwe.
Yeso okogwenia omonto omouko
(Mat 20:29-34; Mar 10:46-52)
35Ekero achia goika ang’e na Yeriko omonto oyomo omouko naikaransete enchera ensemo ogosaba ebiegwa. 36Agachia koigwa omoganda ogoeta, akaboria, “Inki ekio?”
37Bakamoiraneria, “Yeso o Nazareti ogoeta.” 38Agaaka eriogi, akabora, “Yeso, omwana o Daudi, indorera amaabera!”
39Nabwo batang’aine bakamokania, bakamoteebia akire, korende ere akamenta mono goaka eriogi, “Omwana o Daudi, indorera amaabera!”
40Yeso agatenena, agachiika arentwe asare. Agachia komoika ang’e, akamobooria, 41“Ninki origetie ngokorere?”
Akamoiraneria, “Omonene, inyare korora.”
42Yeso akamoteebia, “Oegwe okorora; okwegena kwao gwakogwenirie.”
43Erio kegima akaba nkorora are, akamotunyana, okomotogia Nyasae; na abanto bonsi bagachia korora aya, bakamotogia Nyasae.
Currently Selected:
Luka 18: EKGE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2021
