Luka 17

Chinkwana chinde chia Yeso

(Mat 18:6-7,21-22; Mar 9:42)

1Yeso agateebia aborokigwa baye, “Amang’ana ’okogocha takomocha kooroka, korende obobe nobwaye omonto oria okoyarenta! 2Anga mbuya kobua ase omonto oria asungerwe orogena rogosia ase rigoti riaye, arutwe enyancha ime, kobua aragere oyomo bw’aba abake akore ebibe. 3#Mat 18:15Erende; oyomino karakore ebibe, mokanie; karaonchoke, mwabere. 4Naende karakore ebibe ase ore ara gatano na kabere ase rituko erimo, karakoiranere ara gatano na kabere na goteeba: Naonchokire, mwabere.” 5Abatomwa bakamoteebia, “Omonene, tomentere okwegena gwaito.”

6Omonene akabora, “Onye mwarenge nokwegena koreng’aine buna entetere y’omote onga buna omosabisabi, anga mwateebia omokenene oyo: Simoka, bwesimeke nyancha, noro anga nobaigwera.

7“Korende ning’o ase more oyore nomosomba okorema, gose okorisia ching’ondi, oramoteebie ekero akorwa mogondo agosoa nyomba: Inchuo bwango oikaranse, orie endagera? 8Inee! Takomoteebia: Ebeke ang’e, ondoiserie endagera goika indie inywe, na magega yaye, naye orie na konywa? 9Gose nkomoteebia are omosomba oria ng’a mbuya mono, ekiagera akora eki achikwa? 10Naboigo nainwe, komorakore onsi aya mwachiikirwe, teba: ‘Intwe nabasomba bataisaneti; twakorire aya atogwenerete gokora.’”

Yeso okogwenia abanto ikomi abarenge noborwaire bwa ukoma

11Ase enchera ekogenda Yerusalemu Yeso ngoeta arenge egati ya Samaria na Galili. 12Ekero are gosoa omochie oyomo, akaumerana nabaanto ikomi abarenge noborwaire bwa ukoma, bateneine are; 13na barabwo bagaaka eriogi bakaboora, “Yeso, Omonene, tororere amaabera!”

14 # Abal 14:1-32 Agachia kobarora, akabateebia, “Genda mweorokie ase abakuani.” Kobakogenda bagasibeka. 15Oyomo obo agachia korora ng’a osibekire, akairana okomobaaka Nyasae ase eriogi rinene, 16akagwa ase amagoro a Yeso, okomoiraneria ng’a mbuya mono, na ere n’Omosamaria orenge. 17Yeso akabora, “Tari bonsi ikomi basibeka? Baria kianda, ng’ai bare? 18Onde tanyorekanete oiranete komotogia Nyasae, otatiga omogeni oyo?” 19Akamoteebia, “Tenena, ogende; okwegena kwao gwakogwenirie.”

Ogocha kw’oborwoti

(Mat 24:26-28,37-41)

20Yeso agachia koborigwa n’Abafarisai, “Oborwoti bwa Nyasae indi borache?” Akabairaneria, “Oborwoti bwa Nyasae tibori gocha ase ebimanyererio bikororekana, 21gose tibakobora: Rora naiga bore, gose: Naaria! Rora, oborwoti bwa Nyasae nigo bore ime ase more.”

22Agateebia aborokigwa baye, “Amatuko nache morarigie korora rituko erimo ri’amatuko y’Omwana‐o‐Mwanyabaanto, korende timokorirora. 23Naende nabaabateebie: Rora aaria, gose: Rora aiga! Timogenda, gose timobatunyana. 24Naki buna okomesa gokomesa korwa igoro ensemo eyemo goika ensemo ende, nabo Omwana‐o‐Mwanyabaanto araache koba ase rituko riaye. 25Korende ritang’ani nagwenerete konyora ogochandwa okonge, na kwangwa nekegori eke. 26#Omoch 6:5-8Naende buna yabeete ase amatuko a Nuhu, naboigo eraabe nase amatuko y’Omwana‐o‐Mwanyabaanto. 27#Omoch 7:6-24Barenge koria, bakonywa, bakonyuoma, bakonyuomerigwa, goika rituko riria Nuhu asoete ase obwato; etoigo egaacha, egasiria bonsi. 28#Omoch 18:20—19:25Naboigo buna yabeete ase amatuko a Loti: Barenge koria na konywa, bakogora, koonia, bagosimeka, bakoagacha. 29Korende ase rituko riria Loti aruete Sodomu omorero na ekebiriti bigatwa korwa igoro, bigasiria bonsi. 30Naboigo erache koba ase rituko riria Omwana‐o‐Mwanyabaanto araoroke. 31#Mat 24:17,18; Mar 13:15,16Ase rituko riria oyore kerama igoro, na ebinto biaye bire nyomba ime, taika abibogorie; nere oyore mogondo naboigo tairana inka. 32#Omoch 19:26Moinyore moka Loti. 33#Mat 10:39; 16:25; Mar 8:35; Luk 9:24; Yoh 12:25Oyorarigie koegera obogima bwaye nabosirie, korende oyorasirie obogima bwaye nabonyoore. 34Nabatebirie, obotuko boria abanto babere nababe ase oborere obomo, oyomo nairwe, na oyonde natigwe. 35Abakungu babere nababe bagoseera ase orogena oromo; oyomo nairwe, na oyonde natigwe. [ 36Abanto babere inababe mogondo, oyomo nairwe, na oyonde natigwe.]”

37Bakamobooria, “Ng’ai Omonene?”

Akabairaneria, “Ase ribego rire nao chinsoti chigosangererekana.”

Currently Selected:

Luka 17: EKGE

Highlight

Copy