Yohana 4

Yeso na omokungu o Samaria

1Nabo Omonene agachia komanya ng’a Abafarisai baigure ng’a Yeso okorire aborokigwa abange kobua Yohana, na kobatisa, 2(nonya Yeso omonyene tare kobatisa, otatiga aborokigwa baye), 3akarua Boyahudi, akagenda Galili naende. 4Naende yamogwenerete goika aete Samaria. 5#Omoch 33:19; Yosh 24:32Igo agaika omochie o Samaria, okorokwa Sikari, ang’e nomogondo oria Yakobo aete Yusufu omwana oye; 6agwo yarengeo ensoko ya Yakobo. Nabo Yeso, konya orosire ase orogendo rwaye, agaikaransa iga ase ensoko. Konya chiabeire ang’e chinsa isano nemo.

7Omokungu o Samaria agacha kobuucha amaache. Yeso akamoteebia, “Ing’a amaache inywe.” 8Naki aborokigwa baye konya bachiire omochie kogora endagera.

9 # Ezra 4:1-5; Neh 4:1,2 Nabo omokungu oria bw’Abasamaria akamobooria, “Naki yaba aye Omoyahudi ogonsaba amaache, na inche nomokuungu bw’Abasamaria?” (Abayahudi tibari gosanga n’Abasamaria).

10Yeso akamoiraneria, “Onye nkwamanya ekeegwa kia Nyasae, naende nere ng’o oyo okogosaba amaache anywe, anga nkwamosaba ere, na ere anga nakoa amaache are moyo.”

11Omokungu oria akamoteebia, “Omonene, tori negento gi’okobuuchera, na ensoko yachiire inse mono; ng’ai kwanyorire amaache aya are moyo? 12Inee! Aye nomonene ore kobua sokoro yaito Yakobo, oyotoete ensoko eye, nere omonyene akanywa amaache aya, na abana baye bonsi, na etugo yaye?”

13Yeso akamoteebia, “Kera oyokonywa amaache aya naigwe erang’o naende; 14korende onde bwensi oyoranywe amaache aria ndamoe inche, takorang’a nonya ng’ake; korende amaache aria ndanyaare komoa, nabe ime yaye ensoko y’amaache agosoka na komoa obogima bwa kare na kare.”

15Omokungu oria akamoteebia, “Omonene, ing’a amaache ayio tindang’a, gose timbaisa gocha aiga kobuucha.”

16Yeso akamoteebia, “Genda, orangerie omosacha oo, oche nere aiga.” 17Omokungu oria akamoiraneria, “Tindi nomosaacha.” Yeso akamoteebia, “Gwakwanire boronge ng’a tori nomosaacha, 18ekiagera kwabeire nabasaacha batano, na ere oyore nere bono tari omosacha oo, ase ayio gwakwanire ekeene.”

19Omokungu oria akamoteebia, “Omonene, narorire ng’a nomobani ore. 20Chisokoro chiaito nigo chiarenge gosasiima ase egetunwa eke, na inwe nigo mogoteeba ng’a Yerusalemu nao aase atogwenerete togosasiimera.”

21Yeso akamoteebia, “Aye omokungu, inyegene, ensa neche, motamosasiime Tata ase egetunwa eke, nonya nase Yerusalemu. 22Inwe nigo mogosasiima eki motamanyeti; intwe nigo togosasiima eki tomanyete, ekiagera ogotooreka nigo gokorwa ase Abayahudi. 23Korende ensa neche, na bono nere, ekero abasasiimi b’ekeene barasasiime Tata ase omoika na ekeene, ekiagera Tata nigo akorigia abanto buna abwo bamosasime. 24Nyasae n’Omoika, na abwo bakomosasiima nebagwenerete komosasiima ase omoika na ekeene.”

25Omokungu oria akamoteebia, “Namanyire ng’a ngocha are Masihi (oyokorokwa Kristo); karache ere, natoorokerie onsi.”

26Yeso akamoteebia, “Inche, oyo ngokwana naye, nere.”

27Erio kegima aborokigwa baye bagaacha. Bagakumia ekiagera arenge gokwana nomokuungu; korende onde tamoboretie, “Inki okorigia?” Gose, “Naki ogokwana nere?” 28Nabo omokungu oria agatiga enyongo yaye, akagenda omochie, agateebia abanto, 29“Inchuo, morore omonto ontebirie amang’ana onsi aya nakorire! Inee! Oyio tari ere Kristo?” 30Bakaimoka korwa omochie, bakamochiera.

31Agwo ekero bataracha, aborokigwa bakamosorora bakaboora, “Rabii, ragera?” 32Akabateebia, “Inche ninde nendagera nkoria, eye motamanyeti inwe.”

33Aborokigwa baye bakaboorania, “Inee! Nomonto omorentera endagera?” 34Yeso akabateebia, “Endagera yaane neye: ogokora ogwancha kwaye oyontomete na goikerania emeremo yaye. 35Inwe timori goteeba: Yatigaire emetienyi ene, erio rigesa riiche? Rora nabateebirie: Imokia amaiso aino, morigererie emegondo, ng’a yaikire koba emerabu ang’e ase rigesa. 36Oyo okogesa nkonyora are eng’eria na gosangereria amatunda ase obogima bwa kare na kare, erinde oyo okobusura na ere oyokogesa bagoke amo. 37Naki ring’ana riria: Oyomo obusura, na oyonde okogesa, nigo rire ekeene. 38Inche nabatomete mogese aya motakorerete emeremo; abande bakorire emeremo, na inwe mwasoire ase emeremo yabo.”

39Naende ase omochie oria Abasamaria abange bakamwegena ase engencho y’oborori bw’omokuungu oria ekero abateebetie ng’a, “Onteebirie amang’ana onsi aya nakorire.” 40Nabo ekero Abasamaria baria bachia komochiera, bakamosorora aikaranse amo nabarabwo; akabeera aroro amatuko abere. 41Abanto abange kobua bakeegena ase engencho ye ring’ana riaye; 42bagateebia omokungu oria, “Bono twegenire, tari ase engencho y’amang’ana ao, korende ekiagera tweigwereire intwe abanyene, naende twamanyire ekeene ng’a oyo n’Omotooria bw’ense.”

Yeso okogwenia omwana omomura bw’omosomba bw’omorwoti

43Magega y’amatuko abere akaimoka akagenda Galili. 44#Mat 13:57; Mar 6:4; Luk 4:24Naki Yeso omonyene aorogetie ng’a omobani tari gosikwa ase ense yaye omonyene. 45#Yoh 2:23Nabo ekero achia goika Galili, Abagalili bakamoroisia, ekiagera baroche amang’ana onsi ayakorete Yerusalemu ekero kie rituko rinene; naki nabarabwo boigo mbagendete ase rituko rinene.

46 # Yoh 2:1-11 Agaika naende Kana ya Galili, agwo ase aonchorete amaache koba edivai. Narengeo omonto omosike ase Kapernaumu, oyorenge n’omwana omorwaire. 47Oyio agachia koigwa ng’a Yeso ochire korwa Boyahudi goika Galili, akamochiera, akamosorora achiche agwenie omwana oye, ekiagera konya oisire gokwa. 48Nabo Yeso akamoteebia, “Motarochi ebikone na amakumia, timori kwegena nonya ng’ake.”

49Omosike oria akamoteebia, “Omonene, tirimboka ritang’ani omwana one atarakwa.”

50Yeso akamoteebia, “Genda, omwana oo nabe moyo.”

Omonto oria akegena ring’ana riria ateebetigwe na Yeso, akabwatia enchera yaye. 51Ekero arenge gotirimboka abasomba baaye bagaacha komorootota, bakamoteebia, “Omwana oo moyo are.” 52Erio akababoria amang’ana ensa achaagete koba buya. Bakamoteebia, “Niigoro, chinsa isano na ibere esosera yamotigete.” 53Erio ise akamanya ng’a nensa eria eria ateebetigwe na Yeso, “Omwana oo nabe moyo!” Akeegena ere, na enyomba yaye yonsi. 54Eke nakio egekone gia kabere Yeso akorete korwa ekero arwete Boyahudi kogenda Galili.

Currently Selected:

Yohana 4: EKGE

Highlight

Copy