Yohana 18

Okobwatwa kwa Yeso

(Mat 26:47-56; Mar 14:43-50; Luk 22:47-53)

1Yeso gakwanire amang’ana aya, akaimoka amo naborokigwa baye kogenda ng’umbu y’akarooche Kedron, aase omogondo orenge. Ere na aborokigwa baye bagasoa aroro. 2Na Yudasi, oria omoruete naamanyete aase aria, ekiagera Yeso are kogenda aroro ekero ase ekero amo naborokigwa baye. 3Nabo Yudasi gaikire konyora omoganda bw’abarwani, na abarendi baruete ase abakuani abanene na Abafarisai, akagenda aroro ne chitaaya na ebieri, na ebinto bi’esegi. 4Nabo Yeso, kamanyete onsi ayagochia komonyoora, akaoroka, akababoria, “Ning’o mokorigia?” 5Bakamoiraneria, “Yeso Omonazareti.”

Yeso akabateebia, “Ninche ere.”

Yudasi nere oyomoruete nigo ateneine amo nabarabwo. 6Nabo ekero Yeso achia kobateebia, “Ninche ere,” bakairana magega, bagaaka inse. 7Akababoria eria kabere, “Ning’o mokorigia?”

Bakaboora, “Yeso Omonazareti.”

8Yeso akairaneria, “Naikire kobateebia ng’a ninche ere; nabo onye mokondigia inche, batige aba bagende.” 9Erio riikeranigwe ring’ana riria akwanete, “Aba kwang’ete tinsireti nonya noyomo obo.”

10Nabo Simioni Petero narenge nomoyio o birende, akayong’usa, agaaka omosomba bw’Omokuani omonene, akamobutora ogoto kwaye gw’okorio. Na omosomba oria erieta riaye nigo are korokwa Maliko. 11#Mat 26:39; Mar 14:36; Luk 22:42Erio Yeso agateebia Petero, “Irania omoyio oo ase ekeraano kiaye. Inee! Egekombe eke Tata ang’eire, tinkenywera?”

12Abarwani b’esegi amo nomotang’ani obo, na abarendi baria b’Abayahudi bakabwata Yeso, bakamosiba. 13Erio bakamoira ritang’ani ase Anasi oyorenge ise biara Kayafa, oria orenge Omokuani omonene omwaka oria. 14#Yoh 11:49,50Na Kayafa nere oete Abayahudi amang’ana ng’a negwenerete omonto oyomo akwe ase engencho y’abanto.

Petero ogokana Yeso, na Omokuani omonene okomoboria

(Mat 26:59-75; Mar 14:54-72; Luk 22:55-71)

15Simioni Petero na omworokigwa onde bagatunyana Yeso. Omworokigwa oria onde nigo amanyekanete n’Omokuani omonene, agasoa amo na Yeso ase egoora y’Omokuani omonene, 16korende Petero agatenena gesieri isiko. Nabo omworokigwa oria onde, oyomanyekanete n’Omokuani omonene agasoka agakwana nomoiseke orenge korenda gesieri, akarenta Petero ime. 17Erio omoiseke oria orenge korenda gesieri akaboria Petero, “Aye tori oyomo bw’aborokigwa baye omonto oyo?”

Ere agakana, “Tari inche.”

18Abasomba baria na abarwani nigo barenge bateneine, bautete omorero bw’amakara, ekiagera obokendu mbwarenge, bakaba ngwota bare omorero. Petero nere nigo arenge amo nabarabwo, ogwota omorero.

19Erio Omokuani omonene akaboria Yeso amang’ana igoro yaborokigwa baye, na amang’ana ’okworokereria kwaye. 20Yeso akamoiraneria, “Inche nakwanire nense maiso marore. Amatuko onsi nigo narenge kworokereria ase chisinagogi na ase Hekalu, aase Abayahudi bonsi baare gosangererekana, gose tintebeti ing’ana bobisi. 21Nase ki okomboria? Boria baria baigwete aya nakwanete nabarabwo; barabwo mbamanyete aya nabateebeetie.”

22Gachia gokwana amang’ana aya, oyomo bw’abarendi baria oteneine ang’e, agaaka Yeso oroe, akabora, “Naboigo okoiraneria Omokuani omonene?”

23Yeso akamoiraneria, “Onye nakwana bobe, orokia obobe boria, korende onye nakwana buya, ninki okong’akera?”

24Nabo Anasi akamoira osibire ase Kayafa, Omokuani omonene.

25Na Simioni Petero nigo arenge oteneine ogwota omorero. Bakamoteebia, “Aye boigo tori oyomo bw’aborokigwa baye?”

Ere agakana, akabora, “Tari inche.”

26Oyomo bw’abasomba b’Omokuani Omonene, omoamate bw’oria onachetwe ogoto na Petero, akabora, “Inche tinakorooche ime ase omogondo amo nere?”

27Petero agakana naende. Erio kegima etuoni ekabuga.

Yeso ase obosio bwa Pilato gabana o Rumi

(Mat 27:1-2; 11—14; Mar 15:1-5; Luk 23:1-5)

28Erio bakaira Yeso korwa ase Kayafa goika enyomba enene y’ekegambero. Bokaba bogokiamoka, na barabwo abanyene tibasoa ime ase ekegambero, tibaabaisa gocha kobekwa ogotacheneka korende bararia Epasaka. 29Erio Pilato akabachiera isiko, akababoria, “Ngosoera ki mobwate ase omonto oyo?”

30Bakairaneria, “Onye oyo atarenge omokori amabe, anga titwamorenta ase ore.”

31Erio Pilato akabateebia, “Moire inwe, momogambie ase ogochika kwaino.”

Abayahudi bakamoteebia, “Intwe titori ne ribaga goita omonto.” 32#Yoh 3:14; 12:32Erio ring’ana ria Yeso riikeranigwe, eri akwanete ase okoorokia imakweri ki aranyare gokwa.

33Erio Pilato agasoa ekegambero naende, akarangeria Yeso, akamobooria, “Inee! Naye omorwoti bw’Abayahudi?”

34Yeso akairaneria, “Naye gwateebire ayio aye omonyene, gose nabaanto bande bagotebirie amang’ana aya igoro yane?”

35Pilato akairaneria, “Inee! Inche n’Omoyahudi nde? Abanto b’egesaku kiao na abakuani abanene bakorentire ase ’nde. Inki gwakorete?”

36Yeso akairaneria, “Oborwoti bwane tibori obw’ense eye. Onye oborwoti bwane mbwarenge obw’ense eye, abasomba baane anga mbandwanerera, tinyara kobekwa ase amaboko ’Abayahudi, korende bono oborwoti bwane tibori obw’aa.”

37Erio Pilato akamobooria, “Aye nomorwoti rende?”

Yeso akairaneria, “Aye gwateebete ng’a inche nomorwoti. Inche nigo naiboretwe ase engencho y’aya, na ase engencho y’aya, ngacha ase ense, erinde imbe kirori ase ekeene. Kera oyore oyo bw’ekeene nigo akoigwa eriogi riane.”

38Pilato akamobooria, “Ekeene ngento ki?”

Gakwanire ring’ana eri agachiera Abayahudi isiko eria kabere, akabateebia, “Inche tindochi bobe bonde asare. 39Korende inwe more nengencho ng’a nabasiborera omonto oyomo ase ekero ki’Epasaka; nabo morigetie mbasiborere Omorwoti bw’Abayahudi?”

40Erio bagaaka eriogi naende, bakaboora, “Tari oyo, korende Baraba!” Baraba ere nigo arenge omouri.

Currently Selected:

Yohana 18: EKGE

Highlight

Copy