Yohana 12

Yeso ogoakwa amaguta na Mariamu agwo Bethania

(Mat 26:6-13; Mar 14:3-9)

1Nabo amatuko atano na rimo ritang’ani ri’Epasaka Yeso agaika Bethania, agwo aase Lazaro arenge, oria okwete, akabokigwa na Yeso. 2Bakamoroiseria endagera aria. Martha ere agakora emeremo eyio, korende Lazaro nigo arenge oyomo bwa baria baikaransete ase endagera amo nere. 3#Luk 7:37,38Erio Mariamu akabogoria ekerengo ki’eratili eyemo y’amanukato e rigori rinene, agaaka Yeso amagoro, akayatinyia netukia yaye; enyomba egaichora rimisu ri’amaguta aria. 4Korende Yudasi Iskariota mosinto o Simioni, oyomo bw’aborokigwa ba Yeso oyoramorue, akabora, 5“Nase ki amaguta aya ataoonigwa chidinari amagana atato, na echio chiegwe abataka?” 6Aya igo akwanete, tari ng’a arorerete abataka amaabera, korende nekiagera arenge omoibi, naende abwate esanduki ye chibesa, na igo anarete korusia echiabekire aroro.

7Erio Yeso agateeba, “Motige, agache aya goika rituko ri’ogotindekwa kwane. 8#Okoir 15:11Naki igo more nabataka amo nainwe amatuko onsi, korende timori nainche amatuko onsi.”

9Nabo omoganda omonene bw’Abayahudi bakamanya ng’a ere nao are aria; bagacha, tari ase engencho ya Yeso yoka, korende barore Lazaro, oyio Yeso abogetie korwa ase abakuure. 10Abakuani abanene bagakora ekiina baite Lazaro boigo, 11ekiagera ase engencho yaye abange b’Abayahudi bakagenda bakamwegena Yeso.

Yeso ogochengerwa kagosoa Yerusalemu

(Mat 21:1-11; Mar 11:1-11; Luk 19:28-40)

12Rituko rikobwatia abanto abange abachete ase Rituko Rinene, kobachia koigwa ng’a Yeso ngocha are Yerusalemu, 13#Zab 118:25,26bakabogoria chinsagia chi’emekendo, bagasoka isiko kogenda komoorotota, bagaaka eriogi, bagateeba, “Hosana! Nasesenirie oyogocha ase erieta ri’Omonene, Omorwoti bw’Abaisraeli.”

14Yeso akanyora emori y’etigere, akayeriina, buna yarigetwe,

15 # Zak 9:9 “Inwe abanto ba Sayoni, timoiroka!

Rigereria, Omorwoti oino ngocha are,

igo ariinete emori y’etigere.”

16Amang’ana aya aborokigwa baye tibayamanyete agwo ritang’ani, korende magega Yeso gatogigwe, erio bakainyora ng’a narikeire aya, naende ng’a mbamokorere aya. 17Nabo omoganda bw’abaanto abwo barenge amo nere ekero arangeretie Lazaro korwa ase embeera ime, na komobokia, bakaba bakomoorokia. 18Ekio nakio kiagerete omoganda okagenda komoorotota, ekiagera baigwete ng’a okorire egekone eke. 19Erio Abafarisai bagateebania barabwo ase barabwo, “Mwarorire ng’a timokonyara gokora gento; ense yagendire komotunyana.”

Okorigia kw’Abagiriki

20Naende mbarenge Abagiriki bande ase abanto abwo batiirete kogenda gosasiima ase ekero kie Rituko Rinene. 21Barabwo bagachiera Filipo o Bethisaida bw’ensemo ya Galili, bakamosaba, bakobora, “Omosike, ntorigetie korora Yeso.”

22Filipo akagenda, agateebia Anderea; erio Anderea na Filipo bagateebia Yeso. 23Yeso akabairaneria, akabora, “Ensa yaikire, Omwana‐o‐Mwanyabaanto abakwe. 24Ekeene, ekeene, nabateebirie; Enyeke y’engano etagweti esoe inse ase riroba ekwe, nigo ekobao yoka; korende kerakwe, nigo ekwama okwama okonge. 25#Mat 10:39; 16:25; Mar 8:35; Luk 9:24; 17:33Oyoranche obogima bwaye, nabosirie; oyorageche obogima bwaye ase ense eye, nabogache goika obogima bwa kare na kare. 26Omonto karankorere, antunyane; na aase inde inche, nomosomba one nao arabe; naende omonto karankorere, Tata namosike.

27“Bono omoyo one oichanire; ninki ngokwana? Tata, ontoorie korwa ase ense eye! Yaya, korende ase engencho y’ayio naikeire ensa eye. 28Tata, obake erieta riao!”

Erio eriogi rigacha korwa igoro, rigateba, “Naribakire, na inche nindibake naende.”

29Nabo abanto abateneine ang’e bakaigwa, bakaboora ng’a kwabeire okogukura; abande bakaboora, “Nomomalaika ogokwana nere.” 30Yeso akairaneria, akabora, “Eriogi eri tiricheti ase engencho yane, korende nase engencho yaino. 31Bono ekiina gi’ense eye nkere; bono omogambi bw’ense eye natugutwe isiko. 32Na inche kondaimokererigwe igoro korwa ase ense, nimbang’use bonsi ase ’nde.” 33Agakwana aya, erinde aorokie imakweri ki aranyare gokwa.

34 # Zab 110:4; Isaya 9:7; Ezek 37:25; Dan 7:14 Erio omoganda okamoiraneria, “Nigo tokoigwa ase amachiiko ng’a Kristo nigo arabeo goika kare na kare, na aye naki okobora ng’a nemogwenerete Omwana‐o‐Mwanyabaanto aimokererigwe igoro? Oyo Omwana‐o‐Mwanyabaanto nere ng’o?”

35Yeso akabateebia, “Omobaso nigo ore amo nainwe egeka egeke bosio. Genda ekero more nomobaso oria, omosunte tocha kobabua; ere oyokogenda ase omosunte ime tamanyeti aase akogenda. 36Ekero more nomobaso yuegene, erinde monyare koba abana b’omobaso.”

Ekero Yeso akwanete ayio akagenda akebisa korwa ase bare.

Ogotegena kw’abaanto ba Boyahudi, korende mbareo aborokigwa ba bobisi

37Nonya okorete ebikone ebinge ase amasio abo, tibamwegenete, 38#Isaya 53:1erinde riikeranigwe ring’ana riria omobani Isaya ateebete,

“Omonene, ning’o bwegenire amang’ana aito?

Naende ning’o okoboko kw’Omonene kwamaanoreirwe?”

39Nakio kiagerete tibanyara kwegena. Naki Isaya nigo ateebete naende,

40 # Isaya 6:10 “Obaukoirie amaiso,

okorire chinkoro chiabo chiakong’ire,

tibacha korora namaiso abo,

na komanya ne chinkoro chiabo,

baonchoke na inche mbagwenie.”

41Amang’ana ayio Isaya nigo ayakwanete, ekiagera aroche obonene bwaye; agaatora amang’ana aye. 42Korende abange nonya nabanene bakamwegena, korende ase engencho y’Abafarisai tibamoorogetie, tibacha korusigwa ase esinagogi, 43ekiagera mbanchete ogotogia kw’abaanto kobua ogotogia kwa Nyasae.

Okworokereria kwa Yeso maiso marore

44Yeso agaaka eriogi akabora, “Oyonyegenire inche, tanyegeneti inche omonyene, korende ere oyontomete. 45Na ere oyondoche inche nigo aroche ere oyontomete. 46Inche nachire imbe omobaso ase ense, erinde kera oyonyegenire, tamenya ase omosunte ime. 47Naende omonto karaigwe amang’ana aane, ko tayabwata, inche tinkomogambia, ekiagera tincheti kogambia ense, korende nyetoorie. 48Oyo oranyange na otancheti amang’ana aane, nare noyo oramogambie. Ring’ana riria nakwanete, nario riranyare komogambia ase rituko ri’omoerio. 49Naki tinakwanete ase okobua kwane omonyene, korende Tata oyontomete onchikiire aya ngokwana. 50Na inche namanyire ng’a ogochika kwaye nobogima bwa kare na kare. Ase ayio nigo ngokwana buna Tata antebetie.”

Currently Selected:

Yohana 12: EKGE

Highlight

Copy