Yohana 11

Ogokwa kwa Lazaro

1 # Luk 10:38,39 Nabo omonto gete narenge omorwaire, erieta riaye Lazaro o Bethania, omonto bw’omochie o Mariamu na Martha mosubati omwabo. 2#Yoh 12:3Mariamu nere oyo oagete Omonene amaguta na komotinyia amagoro aye netukia yaye. Bono Lazaro momura omwabo nigo arenge omorwaire. 3Nabo baria basubati bamwabo bagatoma amang’ana asare, bakaboora, “Omonene, ere oyobwanchete orwarire.”

4Yeso agachia koyaigwa, akabora, “Oborwaire obwo tari obw’amakweri, korende ase okoorokia obonene bwa Nyasae, erinde Omwana o Nyasae abakwe ase obwo.”

5Na Yeso nigo anchete Martha, na mosubati omwabo, na Lazaro. 6Ekero achia koigwa ng’a nomorwaire, agateebana amatuko abere aria aase arenge. 7Erio magega ase aya agateebia aborokigwa baye, “Togende Boyahudi naende.”

8Aborokigwa bakamoteebia, “Rabii, moisonde Abayahudi nigo barenge gokorigia gokoaka amagena, na aye gokogenda aroro naende?”

9Yeso akairaneria, “Chinsa chi’omobaso tichiri ikomi na ibere? Omonto karagende mobaso takogochwa, ekiagera aroche omobaso bw’ense eye. 10Korende omonto karagende botuko, igo akogochwa, ekiagera omobaso tori ime yaye.” 11Agakwana aya; erio magega ase aya akabateebia, “Lazaro omosani oito orarire, korende nkogenda nde inyare komotura.”

12Aborokigwa baye bakamoteebia, “Omonene, onye orarire, nagwene.”

13Korende Yeso nigo akwanete amang’ana ’amakweri aye; na barabwo bagakaga ng’a nigo agokwana amang’ana y’okorara chitoro. 14Erio agwo Yeso akabateebia maiso marore, “Lazaro okuure. 15Na inche nagokire ase engencho yaino, ekiagera ntarenge aroro, erinde monyare kwegena. Korende bono togende asare.”

16Nabo Thomas, ore korokwa Barongo, agateebia aborokigwa bamwabo, “Togende naintwe, tokwe amo nere.”

17Erio Yeso agachia goika aroro akanyora Lazaro ng’a oikire koba ase embeera amatuko ane. 18Bethania nigo orenge ang’e na Yerusalemu, koreng’ana chimaeli ibere. 19Na abanto abange ase Abayahudi bagacha ase Martha na Mariamu, erinde baabaremie ase engencho y’ogokwa kw’oyomwabo. 20Nabo Martha agachia koigwa ng’a Yeso ngocha are, akagenda komoorotota, korende Mariamu nigo aikaransete nyomba ime. 21Erio Martha agateebia Yeso, “Omonene, onye naa kwarenge, momura ominto anga takwete. 22Korende nonya mbono namanyire ng’a kende gionsi orasabe Nyasae, Nyasae nakoe.”

23Yeso akamoteebia, “Momura omino naboke.”

24Martha akamoteebia, “Namanyire ng’a nache kobokigwa ase okobokigwa rituko ri’omoerio.”

25Yeso akamoteebia, “Inche ninche okobokigwa na obogima; oyonyegenire inche, naisa gokwa, nabe moyo. 26Na onde bwensi ore moyo na onyegenire, tagokwa nonya ng’ake. Inee! Kwegenire aya?”

27Akamoteebia, “Ee, Omonene; inche negenire ng’a aye naye Kristo, Omwana o Nyasae, oria ogocha ase ense.”

Okobokigwa kwa Lazaro

28Naende gakwanire aya, akagenda, akarangeria Mariamu mosubati omwabo, agakwana ng’ora igo, “Omworokia ochire, ngokorangeria are.”

29Mariamu agachia koigwa, akaimoka bwango, akamochiera. 30Na Yeso konya taraika omochie ime, korende nigo arenge aase aria arototeretwe na Martha. 31Erio Abayahudi baria barenge amo nere nyomba ime bakomoremia, bagachia korora Mariamu buna aimoka bwango na gosoka, bakamotunyana, bakagete ng’a nigo akogenda embeera erinde arere aroro. 32Erio Mariamu agachia goika aase aria Yeso arenge, akamorora, akagwa ase amagoro aye, akamoteebia, “Omonene, onye naa kwarenge, momura ominto anga takwete.”

33Erio Yeso agachia komoorora okorera, na Abayahudi baria bachete amo nere bakorera; agasogwa nobororo ase omoyo oye, agaichana. 34Akababoria, “Ng’ai mwamobeka?” Bakamoteebia, “Omonene, inchwo orore!”

35Yeso akaiyeria amariga. 36Erio Abayahudi bakaboora, “Rora buna amwanchete.” 37Korende abande bakaboora, “Inee! Oyo oramogetie amaiso ’omouko oria, tare konyara kogwenia oyo takwa?”

38Nabo Yeso oichanete naende ase omoyo oye, agaika ase embeera. Ero nigo yarenge rikuruma, naende rigena ndiabegetwe igoro yaye. 39Yeso akabora, “Tigeria rigena.”

Martha, mosubati omwabo bw’oria okwete, akamoteebia, “Omonene, otiokire bono, ekiagera obeire egetondo ase amatuko ane.”

40Yeso akamoteebia, “Tinagoteebia ng’a koregene norore obonene bwa Nyasae?”

41Nabo bakarusia rigena riria. Yeso akaimokia amaiso aye igoro, akabora, “Tata, nakoiraneria ng’a mbuya mono, ekiagera okonyigwa. 42Na inche nimanyete ng’a nigo okonyigwa amatuko onsi; korende ase engencho y’omoganda oyo ong’etanaine konya nakwanire aya, banyare gwancha ng’a naye gwantomete.” 43Ekero akwanire igo, agaaka eriogi rinene, “Lazaro, soka isiko!”

44Oria okwete agasoka, oboyirie egetambaa amagoro na amaboko; obosio bwaye boboyirie egetambaa. Yeso akabateebia, “Mosansore, momotige agende.”

Abakuani abanene bakomoboera Yeso bamoite

(Mat 26:1-5; Mar 14:1-2; Luk 22:1-2)

45Nabo abange ase Abayahudi abachete amo na Mariamu na korora aya Yeso akorete, bakamwegena. 46Korende abande babo bakagenda ase Abafarisai, bakabateebia aya Yeso akorete.

47Abakuani abanene na Abafarisai bagasangererekana ase ekegambero, bakaboora, “Ninki togokora? Ekiagera omonto oyo nigo agokora ebikone ebinge. 48Toise komotiga iga, abanto bonsi mbamwegene; na Abarumi mbache, batoure Aase aito Aachenu na egesaku giaito.” 49Omonto oyomo ase bare, Kayafa, oyorenge Omokuani omonene ase omwaka oria, akabateebia, “Inwe timomanyeti kende gionsi. 50Gose timorengerereti ng’a mbuya omonto oyomo akwe ase engencho y’abanto, erinde egesaku ekegima tigesira.”

51Naende eri takwanete ase omoyo oye omonyene, korende ekiagera arenge Omokuani omonene ase omwaka oria, akabana ng’a Yeso nakwe ase engencho y’egesaku keria; 52gose tari ase engencho y’egesaku keria gioka, korende amo naya asangererie abana ba Nyasae baria baatananekire, babe abamo. 53Nabo korwa rituko riria bakarengereria buna baranyare komoita.

54Yeso tataarete naende maiso marore ase egati y’Abayahudi, korende akarua aria akagenda aase ang’e nerooro, goika omochie okorokwa Efraimu; akamenya aroro amo naborokigwa baye.

55Naende Epasaka y’Abayahudi nigo yarenge ang’e; abange bagatiira korwa chinka chiabo kogenda Yerusalemu gotang’anera Epasaka, erinde besibie. 56Nabo bakarigia Yeso, bagateebania barabwo ase barabwo, bagotenena ase Hekalu, “Naki morooche? Tagocha‐gocha ase rituko rinene nonya ng’ake?” 57Bono abakuani abanene na Abafarisai bakarua ogochika ng’a onye monto onde omanyete aase are, arente amang’ana, banyare komobwata.

Currently Selected:

Yohana 11: EKGE

Highlight

Copy