Ogokora Kw’abatomwa 2

Ekeegwa ki’Omoika Omochenu

1 # Abal 23:15-21; Okoir 16:9-11 Ekero rituko ria Pentekosti riaigete, aborokigwa ba Yeso bonsi nigo barenge aase aamo. 2Mobosokano okogusa kogaacha korwa igoro, okogusa buna ogw’ekerambauti gekogusa ne chinguru, kogaichora enyomba yonsi aase baikaransete. 3Chimeme buna echi’omorero chikabaorokera, chikabaatananekera, naende chikabaikaransera kera oyomo obo. 4Bonsi bagaichorwa n’Omoika Omochenu, bagachaaka gokwana ase emenwa emeao, buna Omoika obaete gwatora.

5Mbamenyete Yerusalemu Abayahudi abasigete Nyasae, abanto korwa ase kera egesaku inse y’erioba. 6Ekero eriogi eri riaigwetwe, omoganda ogasangererekana amo, okaba nogokumia, ekiagera kera oyomo abaigwete bagokwana ase omonwa oye omonyene. 7Bagakumia bonsi na goichana, bagateebania: “Inee! Aba bonsi bagokwana, tibari Abagalili? 8Naki yaba iga, intwe toigwete kera egento bagokwana kera oyomo ase omonwa oye aiboretwe noro? 9Abapariti, Abamedi na Abaelamiti, na abwo bamenyete Mesopotamia, Boyahudi na Kapadokia, Ponto na Asia, 10Furugia na Pamfulia, Misiri ne chinsemo chia Libia ya Kurene, amo nabageni korwa Rumi, 11Abayahudi na abanto b’ebisaku binde abaonchogete, Abakirete na Abaarabu, intwe twensi twaigure aba iga bagokwana ase emenwa yaito igoro y’ogokora gwe chinguru kwa Nyasae.” 12Bagakumia bonsi, bagaichana na koborania: “Amang’ana aya, engencho yaye ninki?” 13Abande bagasekereria, bagoteeba: “Nigo batindire nedivai enyia.”

Ogokwana gwa Petero ekero gia Pentekosti

14Korende Petero agatenena amo na baria ikomi nomo, agaaka eriogi riaye, akabateebia: “Inwe abasacha ba Boyahudi, na inwe mwensi abamomenyete Yerusalemu, tiga ring’ana eri rimanyekane ase more, tegerera amang’ana aane. 15Taibo buna mokagete; abanto aba tibatindeti, ekiagera bono nechinsa isato chioka chia mobaso, 16korende ring’ana eri ndiria riakwanetwe nomobani Yoel:

17 # Yoel 2:28-32 “Nebe ase amatuko ’omoerio, Omonene oteebire,

nimbaiterere abanto bonsi Omoika one,

na abana baino, abamura na abaiseke, inababane.

Abamura baino nabarore amaroro,

na abagaaka baino nabarote chindoto.

18Naboigo, ase amatuko ayio nimbaiterere abasomba baane,

abasacha na abakungu, Omoika one, na barabwo inababane.

19Ning’orokie amakumia ase igoro,

na ebikone ase ense inse,

amanyinga na omorero, ne rikundesi ri’erioki.

20Erioba narionchoke ribe omosunte,

na omotienyi nobe amanyinga,

ekero rituko riria ri’Omonene ritaracha,

rituko erire rinene, na erire maiso marore.

21Naende nebe ng’a kera oyorarangerie erieta ri’Omonene natoorigwe”.

22Inwe abasacha ba Israeli, igwa amang’ana aya, Yeso o Nazareti, omonto o orogetigwe ase more na Nyasae ase ogokora gwe chinguru, na amakumia, na ebikone ebi Nyasae akorete nere egati yaino, buna inwe abanyene momanyete, 23#Mat 27:35; Mar 15:24; Luk 23:33; Yoh 19:18Yeso oyio nigo aruetwe ase amang’ana aroberetigwe na Nyasae, oyo oyamanyete korwa kare, na inwe mokamobamba na komoita ase amaboko ’abaanto batari namachiiko. 24#Mat 28:5,6; Mar 16:6; Luk 24:5Korende Omonene akamobokia ekero ororobirie obororo bw’amakweri, ekiagera tare konyarekana abwatwe naro. 25#Zab 16:8-11Naki igo Daudi agokwana igoro yaye:

Naroche Omonene ase obosio bwane botambe,

ekiagera nigo are ensemo y’okoboko kwane gw’okorio,

erinde tinyoboa.

26Ase ayio enkoro yane nigo ere nomosasooko, oromeme rwane narogooke;

na kobua, omobere one noro notimoke ase ogosemeria,

27ekiagera aye togotiga omoyo one agwo aase abakuure,

gose togotiga Omochenu oo arore ogosareka.

28Kwanyorokereirie chinchera chi’obogima;

nong’ichorie omogooko ase obosio bwao.

29Abaminto, ninyare gokwana nainwe maiso marore igoro y’omogaka oito o kare, Daudi, ng’a nigo akwete, naende agatindekwa, na embeera yaye nao ere aiga goika reero. 30#Zab 132:11; 2 Sam 7:12,13Ekiagera Daudi arenge omobani, naende amanyete ng’a Nyasae namotianetie ase emuma ng’a ase oroiboro rwaye nabeeke oyomo ase ekerogo kiaye ki’obonene, 31agatang’ana korora aya, agakwana igoro y’okoboka kwaye Kristo, ng’a tagotigwa agwo aase abakuure, nonya nomobere oye tokorora ogosareka. 32Oyo Yeso Nyasae akamobokia na ase aya intwe twensi nigo tore kirori. 33Ase ayio, kaimokererigwe igoro ase ensemo y’okoboko gw’okorio kwa Nyasae, naende kanyorire korwa ase Tata Omoika Omochenu oria arieretwe eira oiteire ayamwarorire na koyaigwa. 34#Zab 110:1Ekiagera Daudi tagendete igoro, korende ere omonyenye nigo agoteeba:

“Omonene agateebia Omonene one,

Ikaransa ensemo y’okoboko kwane gw’okorio,

35goika mbeke ababisa bao babe inse y’amagoro ao”.

36Naboigo, tiga enyomba yonsi ya Israeli emanye ekeene ng’a Nyasae obekire Yeso, oyio mwabambete, obeire Omonene naende Kristo.

37Ekero bachia koigwa aya, bagasambwa ase chinkoro chiabo, bakabooria Petero na abatomwa bande: “Abaminto, inki torakore?”

38Petero akabairaneria: “Onchoka, mobatiswe kera oyomo ase erieta ria Yeso Kristo, monyore okwaberwa kw’ebibe biaino, na inwe inamoegwe ekeegwa ki’Omoika Omochenu. 39Naki eira eye nigo ere ase more na ase abana baino, na ase abanto bonsi abare aare, na bonsi abarangerigwe n’Omonene nyasae oito.” 40Petero akabaorokeria ase amang’ana ande amange na kobakuurera, ogoteeba: “Etoorie korwa ase ekegori eke getari ekeronge.” 41Na barabwo abanchete ring’ana riaye bakabatiswa, ne rituko riria bakamentekana abanto koreng’ana chilifu isato.

42Barabwo bakagenderera ase okworokereria kw’abatomwa na ase obomo, ase ogosamunyora omogati na ase ogosaba.

Obogima bw’ekeombe ki’Abakristo

43Kera omonto agasogwa nomoondoko, na amakumia amange na ebikone bigakorwa nabatomwa. 44#Ogok 4:32-35Na bonsi abeegenete nigo barenge aase aamo, naende bakaba n’ebinto bionsi ase obomo; 45bakaoonia chinibo chiabo na ebinto ebibarenge nabio, na kobigabera abanto bonsi koreng’ana buna kera oyomo aremeire. 46Kera rituko bakagenderera gosangererekana amo ase Hekalu ime, bagosamunyora emegati enyomba ase enyomba na koragerera amo ase omogooko na ase chinkoro chi’oboitongo, 47bakomotogia Nyasae na kogwenera abanto bonsi. Omonene akabamentera kera rituko ase okorenta baria barenge gotoorigwa.

Currently Selected:

Ogokora Kw’abatomwa 2: EKGE

Highlight

Copy