Ogokora Kw’abatomwa 13

Ekanisa ya Antiokia

1Ase ekanisa ya Abantiokia mbarengeo ababani amo aborokia: Barnaba na Simioni, oyo ore korokwa Nigeri, na Lukio Omokurene, na Manaeni oyo orereretwe amo nomorwoti Herode, na Saulo. 2Aba iga, ekero barenge gosasiima Omonene, na kweng’ata, Omoika Omochenu agateeba: “Nchorere Barnaba na Saulo ase emeremo eria nabarangereretie bayekore.”

3Erio kobakoorire okweng’ata na ogosaba bakababeekera amaboko, bakabatiga bagende.

Barnaba na Saulo ase Kuporo

4Abwo babere bagatomwa n’Omoika Omochenu, bagatirimboka gochia Selukia, na korwa agwo bakaamboka n’emeeri gochia Kuporo. 5Bagaika Salami, bakarandia ring’ana ria Nyasae ase chisinagogi chi’Abayahudi, na barabwo nigo barenge na Yohana okobakonya. 6Ekero bakoorire goeta gati‐gati y’egesinka gionsi goika Pafo, bakanyora aroro omonto oyomo Omoyahudi omoriingoria, omobani bw’oborimo, ore korokwa Bar-Yeso. 7Omonto oyio nigo arenge amo na gabana Sergio Paulo, omonto bw’obong’aini. Ere akarangeria Barnaba na Saulo bache asare, akarigia koigwa ring’ana ria Nyasae. 8Korende Elima, oria omoringoria (okoonchorwa kw’erieta riaye nakwo oko) akaamererania nabarabwo, akarigia koonchora gabana oria atige okwegena. 9Korende Saulo, oyokorokwa naende Paulo, agaichorwa n’Omoika Omochenu, akamotogoreria amaiso, akabora, 10“Aye omwana o Saitani omobisa bw’oboronge bwonsi, oichire nobong’ainereria n’obobe bwonsi, torigeti gotiga gokora bogeka chinchera chia Nyasae Omobui chire boronge? 11Rora bono, okoboko kw’Omonene nigo kore igoro ase ore, aye nobe omouko, torora erioba ase engaki.”

Erio kegima akabwatwa norotutu na omosunte, agataba‐taba akarigia abanto bamobwate okoboko bamoraae. 12Ekero gabana achia korora ayakoreka, akeegena, agakumia ase okworokereria kw’Omonene.

Ase Antiokia ya Pisidia. Okorandia gwa Paulo ase Abayahudi

13Erio Paulo na abamwabo bakamanora n’emeeri korwa Pafo, bagaika Perga ase Pamfulia. Yohana akabatiga, akairana Yerusalemu, 14korende barabwo bakarua Perga, bakagenda Antiokia, omochie o Pisidia. Rituko ria Esabato bagasoa ase esinagogi, bagaikaransa aroro. 15Magega kabasomire amachiiko na egetabu y’ababani, abatang’ani b’esinagogi bagatoma amang’ana ase bare kobateebia: “Abaminto, onye more ne ring’ana ri’okoremia, rikwane!” 16Paulo agatenena, akarambora okoboko, agakwana: Inwe abasacha b’Abaisraeli, na inwe abamoirogete Nyasae, ntegerera. 17#Okong’ 1:7; Okong’ 12:51Nyasae bw’abaanto aba Abaisraeli agachora chisokoro chiaito, na ekero barabwo bamenyete buna abamenyi ase ense ya Misiri, akabaimokereria igoro. Ase okobua kwaye akabarusia aroro, 18#Omob 14:34; Okoir 1:31na koreng’ana engaki y’emiaka emerongo ene akaremereria nabarabwo ase erooro. 19#Okoir 7:1; Yosh 14:1Agasiria ebisaku bitano na bibere ase ense ya Kaanani, na ense yabo akabaa ebe omwando obo, 20#Abag 2:16; 1 Sam 3:20koreng’ana engaki y’emiaka amagana ane, na emerongo etano. Magega y’ayio akabaa abagaambi goika ekero ki’omobani Samweli. 21#1 Sam 8:5; 1 Sam 10:21Erio magega yaye bagasaba baegwe omorwoti. Nyasae akabaa Saulo, mosinto o Kishi, omonto bw’ororeria rwa Benjamini, oyio obagamberete engaki y’emiaka emerongo ene. 22#1 Sam 13:14; 1 Sam 16:12; Zab 89:20Ekero konya amorusirie oyo, akaimokereria Daudi igoro koba omorwoti obo. Akabateebia igoro yaye: Nanyorire Daudi, mosinto o Yese; nere omonto ongweneire ase enkoro yane, naende nere oraanyare gokora ogwancha kwane gwonsi. 23Korwa ase oroiboro rw’omonto oyio Nyasae orenteire Abaisraeli Omotooria, nere Yeso. Nabo abarierete eira. 24#Mar 1:4; Luk 3:3Ritang’ani ere ataraacha, Yohana konya obarandeirie abanto bonsi ba Israeli ebatiso y’okoonchoka. 25#Yoh 1:20; Mat 3:11; Mar 1:7; Luk 3:16; Yoh 1:27Ekero Yohana abeire ang’e gokoora orogendo rwaye akabora, Nigo mokagete ng’a ninche ng’o? Inche tari Kristo. Korende magega yane ngocha are oyomo, ere oyo inche ntaisaini gosibora chinuga ch’ebikoroto bi’amagoro aye.

26Abaminto, abanto b’ororeria rwa Aburaamu, amo nabande ase more inwe abamoirogete Nyasae, ring’ana ri’ogotooreka riatomirwe ase tore. 27Naki abamenyete Yerusalemu, na abanene babo tibamomanyete, ekiagera tibamanyete nonya namang’ana y’ababani. Ase okomogambia baikeranirie ayare gosomwa ase chibuku chi’ababani kera Esabato. 28#Mat 27:22,23; Mar 15:13,14; Luk 23:21-23; Yoh 19:15Nonya tibanyorete engencho y’okomoita, bagasaba Pilato aitwe. 29#Mat 27:57-61; Mar 15:42-47; Luk 23:50-56; Yoh 19:38-42Ekero bachia goikerania onsi ayariikire igoro yaye, bakamoikia korwa ase omote, bakamobeka ase oboina. 30Korende Nyasae akamobokia korwa ase abakuure. 31#Ogok 1:3Ase amatuko amange akarorekana ase abwo barenge gotiira komo korwa Galili goika Yerusalemu. Bono barabwo kirori baye bare ase abanto. 32#Zab 2:7Na intwe twabarenteire amang’ana amaya aria Nyasae arierete chisokoro chiaito eira. 33Aya Nyasae atoikeraneirie intwe abana babo ase okobokia Yeso. Naende buna ariikire ase Zaburi ibere:

Aye naye Omwana one, reero nakoiboire.

34 # Isaya 55:3 Naende ng’a nigo amobogetie korwa ase abakuure, erinde tanyara koirana naende ase ogosareka, okwanire iga,

Nimbae ogosesenigwa ogochenu na ogw’ekeene,

koria narierete Daudi eira.

35 # Zab 16:10 Ase ayio okwanire naende ase Zaburi ende,

Togotiga Omochenu oo arore ogosareka.

36Naki Daudi, ekero akoorire gokorera ogwancha kwa Nyasae ase ekegori kiaye, agakwa, agatindekwa ase chisokoro chiaye chiatindegetwe, akarora ogosareka. 37Korende oyo obogetigwe na Nyasae taroche ogosareka. 38Ase ayio baminto, tiga amanyekane ase more ng’a goetera ase oyio nigo mokoranderigwa okwaberwa kw’ebibe, 39na asere kera oyomwegenire nigo akobarerwa oboronge ase amang’ana aria atakonyarekana kobarerwa oboronge ase amachiiko a Musa. 40Gaki, erende, tabaisa kobaikera amang’ana aria akwanetwe nababani:

41 # Habk 1:5 Rigereria, inwe abachaayi, mokumie na mosire,

ekiagera ngochia gokora ’nde ring’ana ase amatuko aino,

eri motegene nonya ’monto onde bwensi naisa kobateebia.

42Kabasokire, abanto bakabasorora bache kobateebia amang’ana aya Esabato ya kabere. 43Ekero omosangererekano bw’esinagogi oera, Abayahudi abange na abegeni b’ebisaku binde abaonchogete bakabwatana na Paulo na Barnaba, abakwanete nabarabwo, na kobaremia bagenderere ase obuya bwa Nyasae.

Abatomwa bakogenda ase abanto b’Ebisaku

44Ase Esabato ya kabere abanto abange, ang’e omochie bwonsi, bagasangererekana baigwe ring’ana ria Nyasae. 45Korende ekero Abayahudi bachia korora emeganda, bagaichorwa ne ribero, bagakaana amang’ana ayare gokwanwa na Paulo, bakamorama. 46Paulo na Barnaba bagakwana noboremu, bagateeba: Igo yagwenerete ng’a ring’ana ria Nyasae rikwanwe ase more ritang’ani. Korende ekiagera mwarisukeirie are mwenacheire inwe abanyene ng’a timogwenereti obogima bwa kare na kare, tweonchoreire abanto b’Ebisaku. 47#Isaya 42:6; 49:6Nabo twachigetwe n’Omonene,

Nakobekire obe omobaso ase abanto b’Ebisaku,

erinde ogotooreka kwane kogende,

goike ase chinsinyo chi’ense.

48Ekero abanto b’Ebisaku bachia koigwa ayio bakagoka, bagatogia ring’ana ri’Omonene, na abwo bachiikeretwe konyora obogima bwa kare na kare bakeegena. 49Ring’ana ri’Omonene rikaranda ase ense eria yonsi. 50Abayahudi bakaburukania abakungu abamoirogete Nyasae, abasikire n’abanto, na abanene b’omochie, bakagenka abanto bachande Paulo na Barnaba, na kobaseria korwa ensemo yabo. 51#Mat 10:14; Mar 6:11; Luk 9:5; 10:11Korende Paulo na Barnaba bakabakong’ontera orotu rw’amagoro abo, bakagenda Ikonio. 52Na aborokigwa bagaichorwa nomogooko na Omoika Omochenu.

Currently Selected:

Ogokora Kw’abatomwa 13: EKGE

Highlight

Copy