Marka 4

Ta xifaniso xa muhaxi

(Matewu 13:1-9; Luka 8:4-8)

1 # Vona ni: Luk. 5:1-3. Yesu atlhela asungula kujondzisa kusuhi ni tiva. Kutani xitshungu lexikulu xihlengeletana ximutela, kukondza anghena bzatsweni, atshamisa ndzeni ka rona ativeni; loko xili xitshungu hinkwaxu, xona axitshame ridongeni ra tiva. 2Kutani avajondzisa timhaka letotala hi svifaniso. Akujondziseni ka yena avabzela lesvi:

3“Yingisani! Muhaxi ahumile aya akuhaxeni. 4Loko ali karhi ahaxa, timbewu tin'wana tiwela ndleleni, kutani tinyanyana tita, titaja hinkwatu. 5Tin'wana tiwela amaribzeni, laha akungali na misava leyotala, kutani tihantla timila, hikuva misava ayingatalanga. 6Kambe loko jambu ritlhava, svimilwa svivuna, kutani sviwoma hi kupfumala timintsu. 7Timbewu tin'wana tiwela amintweni; loko mintwa yikula, yiti kamanyeta, kutani tingaveki nchumu. 8Tin'wana kambe tiwela misaveni leyinene, timila, tikula, tiveka timbewu, yin'we yichela makume manharhu, yin'wana ntlhanu wa makume ni rin'we (60), yin'wana dzana (100).” 9Kutani aku: “Lweyi anga ni tindleve toyingisa, aayingise!”

Ta Nkongometo wa svifaniso

(Matewu 13:10-17; Luka 8:9-10)

10Kuteloko Yesu ayile tlhelweni, lava avali kusuhi na yena, svin'we ni lava va khume ni vambirhi, vamuvutisa hi ta xifaniso. 11Kutani aku ka vona: “N'wina minyikiwile kutiva svihundla sva Mfumu wa Xikwembu, kasi ka lava vanga handle, hinkwasvu svivuliwa hi svifaniso.” 12#Vona ni: Ez. 6:9-10. Svinga lesvaku,

“‘loko kuli kuvona, vavona, kambe

vangavonisisi,

hambi kulikutwa, vatwa, kambe

vangatwisisi,

lesvaku vangatshuki vahundzuka,

varivaleliwa svijoho.’”

Ta Yesu loko ahlamusela xifaniso xa muhaxi

(Matewu 13:18-23; Luka 8:11-15)

13Yesu aku ka vona: “Xana amitwisisi xifaniso lexi ke? Loko svilitano, mitatwisisisa kuyini svifaniso hinkwasvu ke? 14Lweyi ahaxaka ahaxa Rito. 15Timbewu letingawela ndleleni i vanhu lava Rito rihaxiweke ka vona; kutani loko varitwile, Sathana ahantlisa ata ka vona, avatekela Rito lerihaxiweke. 16Timbewu leti tiweleke amaribzeni i vanhu lava loko vatwa Rito, vahantlisaka kuliyamukela hi kutsaka; 17kambe vangarinyiki nkarhi woveka timintsu, vatiyisela nkarhinyana ntsena; kutani loko khombo, kumbe kuxaniseka svifika hikolaho ka Rito, vahantlisa vakhunguvanyeka. 18Timbewu letiweleke amintweni, hi lava vatwaka Rito; 19kambe kuvilela hi sva misava leyi, ni kukanganyisiwa hi rifuwo ni kunavela svilo svin'wana ni svin'wana, svinghena ka vona, svikamanyeta Rito, kutani ritsandzeka kuveka mihandzu. 20Timbewu letiweleke misaveni leyinene, hi lava vayingisaka Rito, variyamukela, vaveka mihandzu; mbewu yin'we yichela makume manharhu, yin'wana ntlhanu wa makume ni rin'we (60), yin'wana dzana (100).”

Ta xifaniso xa rivoni

(Luka 8:16-18)

21 # Vona ni: Mat. 5:15; Luk. 11:33. Avabzela kambe aku: “Xana rivoni ritisiwa lesvaku ritambhonyiwa hi xirhundzu, kumbe kuvekiwa hansi ka mubedo ke? Xana aritisiwi kutavekiwa henhla ke? 22Aku na xilo lexinga xihundleni, lexingatakala xingapaluxiwi; nakona aku na xilo lexifihliweke lexingatakala xingahumeli rivaleni. 23Loko munhu ali nitindleve ta kuyingisa, aayingise.”

Ta kuyavanyisa van'wana

(Matewu 7:2; 13:2; Luka 6:38)

24 # Vona ni: Mat. 7:2; Luk. 6:38. Yesu atlhela avabzela lesvi: “Yingisani svinene lesvi misvitwaka. Mpimo lowu mipimelaka van'wana ha wona, na n'wina, mitapimeliwa ha wona, ni kutlula kolaho. 25#Vona ni: Mat. 13:12; 25:29; Luk. 19:26. Lweyi anga ni xanchumu, atanyikiwa ni svin'wana, kasi lweyi angaliki na nchumu, atatekeliwa ni lexi anga na xona.”

Ta xifaniso xa mbewu leyimilaka yikula

26Yesu atlhela aku: “Mfumu wa Xikwembu wufana ni munhu lweyi ahaxeke mbewu misaveni; 27hambi ayetlele, hambi apfukile, vusiku ni nhlekanhi mbewu yitlhava, yikula, yena angativi lesvi yikulisaka xisvona. 28Misava hi yoxe yimilisa mbewu, yirhanga yivakhava, yihumesa nchocho, ndzhaku kuhuma tindzhoho totala anchochweni; 29#Vona ni: Yow. 3:13. kutani loko tindzhoho tiwupfile, vahantla vanghenisa sikelo, hikuva kutshovela kufikile.”

Ta xifaniso xa mbewu ya nsinapi

(Matewu 13:31-32; Luka 13:18-19)

30Atlhela aku: “Mfumu wa Xikwembu wutafanisiwa nayini? Hi xihi xifaniso lexi hingawufanisaka na xona ke? 31Wufana ni mbewu ya nsinapi leyi yinga yona leyitsongo ka timbewu hinkwatu ta misava loko yibzaliwa. 32Kambe loko yibzaliwile, yimila, yikula, yitlula minsinya hinkwayu hi kukula, yiva ni marhavi lamakulu, tinyanyana ta tilo tikondza titayaka andzhutini wa wona.”

Ta kutirhisa svifaniso

(Matewu 13:34-35)

33Kutani hi svifaniso lesvotala, Yesu aavula Rito ka vona, hilaha avakota kutwisisa hakona. 34Angavabzelanga nchumu, loko kungali hi kutirhisa svifaniso; kambe loko vali voxe, ahlamusela hinkwasvu ka vajondzisiwa va yena.

Ta Yesu loko amiyeta xidzedze

(Matewu 8:18,23-27; Luka 8:22-25)

35Hi siku lero, hi nkarhi wa majambu, Yesu aku ka vona: “Ahipeleleni ka tlhelo rin'wana ra tiva.” 36Kuteloko vasiyile xitshungu, vafamba na yena hi bzatsu leri aali ka rona, kutani mabzatso man'wana na wona amamupangalata. 37Kutani kupfuka xidzedze lexikulu; magandlati amanghena bzatsweni, kukondza rilava kutala hi mati. 38Yena aali nyalwini ayetlele ava aqamela. Vayamupfuxa, vaku ka yena: “Mujondzisi, xana ahi nchumu ka wena loko hilova ke?” 39Hi loko apfuka, amiyeta mheho, aku ka tiva: “Miyela, uku ntse!” Mheho yiva yimiyela, kuva ni kurhula lokukulu. 40Kutani aku ka vona: “Hikolaho ka yini mili ni vutoya ke? Amisiva ni kupfumela xana?” 41Kutani vachava hi kuchava lokukulu, vabzelana vaku: “Xana munhu lweyi i munhu muni ke, lesvi mheho ni tiva svimuyingisaka?”

Currently Selected:

Marka 4: NTC2014

Highlight

Copy