Marka 1

Ta kujondzisa ka Yohani Mukhuvuli

(Matewu 3:1-12; Luka 3:1-9; Yohani 1:19-28)

1 # Vona ni: Mal. 3:1. Lawa hi wona masungulu ya Evhangeli ya Yesu Kriste, N'wana wa Xikwembu. 2Tani hilaha kutsaliweke hakona bukwini ya muprofeta Ezaya, loko aku:

“Vona, murhumiwa wa mina wata mahlweni ka wena,

lweyi angatalungisa ndlela ya wena.

3 # Vona ni: Ez. 40:3; Luk. 3:3. Rito ra munhu lweyi ahuwelelaka mananga rili: ‘Lulamisani ndlela ya Hosi,

milulamisa ni svindlelana sva yona.’”

4Yohani Mukhuvuli ahumelelise xisvosvo mananga na ali karhi ahuwelela, abzela vanhu kuhundzuka akuva vatakhuvuliwa, ni lesvaku vatarivaleliwa svijoho sva vona. 5Kutani vanhu hinkwavu va tiko ra Yudeya ni vayaki hinkwavu va Yerusalema, avaya vayakhuvuliwa hi yena nambzeni wa Yordani, na vali karhi vativula svijoho sva vona.

6 # Vona ni: II Tih. 1:8. Yohani aayambala sviyambalu svolukiwa hi voya bza kamela, atikhama hi bandi ra xikhumba, aja tintete ni vulombe bza nhova. 7Aapaluxa mahungu lawa mange: “Wata mun'wana ndzhaku ka mina, lweyi anitlulaka hi matimba, lweyi svinganifaneliki kukorhama ni tlhantlha tingoti ta masandhazi ya yena. 8Mina ha noxe ni mikhuvulile hi mati, kambe yena atamikhuvula hi Moya Lowokwetsima.”

Ta kukhuvuliwa ka Yesu

(Matewu 3:13-17; Luka 3:21-22)

9Hi masiku wolawo, Yesu ahuma Nazareta, anga doropa ra Galileya, ayakhuvuliwa hi Yohani nambzeni wa Yordani. 10Kutani loko ali karhi ahuma matini, avona matilo mapfuleka, ni Moya na wulikarhi wuxika henhla ka yena wufana ni xituvana; 11#Vona ni: Gen. 22:2; Psal. 2:7; Ez. 42:1; Mat. 3:17; 12:18; Mar. 9:7; Luk. 3:22. kutani rito lerihumaka matilweni riku: “Wena u N'wananga lweyi arhandzekaka, lweyi nimutsakelaka.”

Ta kuringiwa ka Yesu

(Matewu 4:1-11; Luka 4:1-13)

12Hi nomo-lo Moya wumuyisa mananga; 13kutani atshama kona masiku ya mune wa makume, na ali karhi aringiwa hi Sathana. Aahanya ni sviharhi sva nhova, kambe tintsumi na tona atimutirhela.

Ta Yesu loko asungula ntirho wa yena Galileya

(Matewu 4:12-17; Luka 4:14-15)

14Ndzhaku ka loko Yohani anghenisiwile jele, Yesu aya Galileya, apaluxa Evhangeli ya Xikwembu, aku: 15#Vona ni: Mat. 3:2. “Minkarhi yihetisekile, Mfumu wa Xikwembu watshinela kusuhi; hundzukani, mipfumela ka Evhangeli.”

Ta Yesu loko avitana vajondzisiwa va mune

(Matewu 4:18-22)

16Loko ali karhi alulama ni tiva ra Galileya, avona Simoni ni makwavu Andreya, na vali karhi vahoxa tinkoka ta vona ativeni, hikuva avali vaphasi vatihlampfi. 17Yesu aku ka vona: “Nilandzeni, nitamiyendla vaphasi va vanhu.” 18Hi loko vatshika tinkoka ta vona, vamulandza. 19Loko ahundzanyana aya mahlweni, avona vamakwavu ha vambirhi, Yakobe na Yohani vana va Zebedewu na vali bzatsweni, varhunga tinkoka. 20Kuteloko avavitanile, vasiya tatana wa vona Zebedewu bzatsweni svin'we ni vatirhi, kutani vamulandza.

Ta munhu lweyi angheniweke hi moya wa chaka

(Luka 4:31-37)

21Hikolaho Yesu ni vajondzisiwa va yena vafika Kapernawume; kutani hi siku ra Savata Yesu anghena sinagogeni, ajondzisa. 22#Vona ni: Mat. 7:28-29. Avahlamala jondzo ya yena, hikuva aavajondzisa kufana ni lweyi anga ni matimba, kungali kufana ni Vatsali.

23Asinagogeni ra vona akuli ni munhu lweyi angheniweke hi moya wa chaka; wona wuhuwelela, 24wuku: “Mhaka ya hina na wena hi yihi, wena Yesu wa Nazareta? Xana utele kutahilovisa ke? Nakutiva lesvaku u mani: U Lweyi Wohlawuleka wa Xikwembu.” 25Yesu awukahla, aku: “Miyela! Huma ka munhu yelweyi!” 26Kutani moya wa chaka wumurhurhumelisa hi matimba, wuhuwelela hi rito lerikulu, wuhuma ka yena. 27Kutani hinkwavu vahlamala ngopfu, lakakuva vavutisana vaku: “Hi lesvoyini lesvi? I jondzo leyimpsha! Hikuva alerisa hi matimba mimoya ya chaka, kutani na yona yimuyingisa!” 28Hi loko ndhuma ya yena yihantla yihangalaka matlhelweni hinkwawu ya Galileya.

Ta Yesu loko ahanyisa mamana wa nsati wa Simoni

(Matewu 8:14-15; Luka 4:38-39)

29Loko vahuma sinagogeni, vaye kaya ka Simoni na Andreya na vali na Yakobe na Yohani. 30Mamana wa nsati wa Simoni, aayetlele ali karhi avabza, miri wa yena awuhiseta; kutani vabzela Yesu. 31Hi loko atshinela, amukhoma hi voko, amupfuxa; hi nomo-lo, kuhiseta ka miri kuhangalaka, kutani avatirhela.

Ta Yesu loko ahanyisa lavotala nimajambu

(Matewu 8:16-17; Luka 4:40-41)

32Nimajambu, loko ripela, vamutisela hinkwavu lava avali ni mavabzi ni lava avali ni madimoni. 33Vayaki hinkwavu va doropa avahlengeletanile nyangweni. 34Kutani ahanyisa vanhu lavotala, lava avavabza hi mavabzi ya tinxakaxaka, ahlongola ni madimoni layotala. Ntsena yena aangapfumeleli madimoni lawa lesvaku mavulavula, hikuva amamutiva.

Ta Yesu loko ahuma ayajondzisa

(Luka 4:42-44)

35Yesu apfukisa svinene ahuma doropeni, ayamananga ayakhongela kona. 36Kambe Simoni ni lava avali na yena vafamba vamulava. 37Kuteloko vamukumile, vaku ka yena: “Hinkwavu vakulava.” 38Yena aku ka vona: “Ahiyeni asvidoropanini svin'wana, lesvi svingakusuhi, lesvaku nakona niyapaluxa Evhangeli, hikuva hi lesvi ningatela svona.” 39#Vona ni: Mat. 4:23; 9:35. Kutani afamba, apaluxa Evhangeli masinagogeni ya vona, tikweni hinkwaru ra Galileya, na ali karhi ahlongola madimoni.

Ta Yesu loko abasisa munhu wa nhlokonho

(Matewu 8:1-14; Luka 5:12-16)

40Kutani munhu mun'we wa nhlokonho ata ka yena, akhinsama mahlweni ka yena, amukhongela aku: “Loko usvirhandza, unganibasisa.” 41Yesu amutwela vusiwana, atshabuluta voko, amukhumba, aku ka yena: “Nasvirhandza, nakubasisa!” 42Kutani hi loko nhlokonho yinyamalala, abasa. 43Yesu amutlhelisa hi kuhantlisa, amulaya hi matimba akuva ativonela: 44#Vona ni: Levh. 14:1-32. “Vona, ungatshuki ubzela munhu svilo lesvi, kambe famba, uyatikombisa ka Muprista, uhumesa sva kubasisiwa ka wena lesvilerisiweke hi Moxe, svitava vumboni ka vona.” 45Kambe loko munhu lwiya asukile kolaho, afambe apaluxa ni kuhangalasa mahungu wolawo, kukondza Yesu ativiwa madoropeni hinkwawu lawa aanghena ka wona; lesvi svingayendla lesvaku angahangheni na atshunxekile ka wona; hi loko ayatitshamela mananga; kutani vanhu vata ka yena, na vahuma matlhelweni hinkwawu.

Currently Selected:

Marka 1: NTC2014

Highlight

Copy