Yohani 12

Ta Yesu loko atotiwa mafurha le Betaniya

(Matewu 26:6-13; Marka 14:3-9)

1Loko kahasele masiku ya ntlhanu ni rin'we nkhuvu wa Paska wungasivakona, Yesu aya Betaniya. Kona akutshama Lazaru lweyi Yesu aamupfuxile kufeni. 2Vamulungisela svakuja kona. Marta aaphamela, kutani Lazaru aali mun'wana wa lavatshameke svakujeni na Yesu. 3#Vona ni: Luk. 7:37-38. Hi loko Mariya ateka xikutsu xa mafurha lawa yonun'hwela yodura ngopfu lamayendliweke hi nsinya wa narda leyinene, atota milenge ya Yesu, kutani amusula milenge hi misisi ya yena, yindlo hinkwayu yitala hi kunun'hwela ka mafurha yakona.

4Yudasi Iskariyota, mun'wana wa vajondzisiwa va Yesu, lweyi aatamuxenga, avilela aku: 5“Hikolaho ka yini mafurha lawa mangaxavisiwanga hi tidenari ta madzana manharhu (300), male yinyikiwa svisiwana, xana?” 6Aavulisa svosvo, kungali hi lesvi aali ni mhaka ni svisiwana, kambe hi lesvi aali muyivi. Aali mutameli wa nkwama wa male, kutani aatolovele kupambula lesvicheliweke kona. 7Hi loko Yesu aku: “Mutshikeni ahlayisa mafurha lawa, amahlayisela siku ra kulahliwa ka mina.#12:7 Kumbe: Mutshikene! Atatsundzuka mhaka leyi siku nilahliwaka. 8#Vona ni: Dew. 15:11. Hikuva svisiwana, mina svona masiku hinkwawu; kambe mina, amingavi na mina masiku hinkwawu.”

Ta makungu ya kudlaya Lazaru

9Xitshungu lexikulu xa Vayuda xitwa lesvaku Yesu akona kolaho, kutani vata, kungali kutavona Yesu ntsena, kambe kuvona na yena Lazaru, lweyi Yesu amupfuxeke kufeni. 10Hi loko Vaprista lavakulu vaboha makungu ya kudlaya na yena Lazaru; 11hikuva, hikolaho ka yena, Vayuda lavotala avafularhela vaprista, vapfumela ka Yesu.

Ta Yesu loko anghena Yerusalema

(Matewu 21:1-11; Marka 11:1-11; Luka 19:28-40)

12Siku leritlhantamaka, xitshungu lexikulu xa vanhu lava avatile nkhubzini, xitwa lesvaku Yesu wata Yerusalema; 13#Vona ni: Psal. 118:25,26. kutani vateka mahanga ya mincindzu, vahuma vayamutlhangaveta na vali karhi vahuwelela, vaku:

“Hozana!

Akudzunisiwe lweyi ataka hi vito ra Hosi!

Akudzunisiwe yena Mufumi wa Israyele!”

14Yesu akuma mbongolo, kutani ayigada, hilaha Matsalwa mavuleke hakona, loko mate:

15“Mingachaveni n'wina va le Siyoni! Mufumi wa n'wina hi lweyi, wata, agadile n'wana wa mbongolo.”

16Vajondzisiwa va yena avatwisisanga mhaka leyi kusunguleni; kambe loko Yesu atlakuliwile, hi kona vangatsundzuka lesvaku mhaka ayitsaliwile mayelanu na yena, ni lesvaku vanhu avayendla svosvo vayendlela yena. 17Xitshungu lexi axili na Yesu, loko abzela Lazaru kuhuma sirheni amupfuxa kufeni, axiveka vumboni bza timhaka leti. 18Nasvona vanhu lavotala avayile vayatlhangana na Yesu, hikuva avatwile lesvaku ayendlile mahlori wolawo. 19Kutani Vafarisi vabzelana vaku: “Masvivona lesvaku amahapfuni nchumu; vonani, vanhu hinkwavu valandza yena.”

Ta Vagirika lavalavaka kuvona Yesu

20Xikarhi ka lava vatlhantukele nkhubzini kuyagandzela, akuli ni Vagirika vangali vangani. 21Vata ka Filipi, lweyi wa le Betisayida tikweni ra Galileya, vataku: “Nkulukumba, hilava kuvona Yesu.” 22Filipi ayabzela Andreya, kutani Andreya na Filipi vayabzela Yesu. 23Yesu avahlamula, aku: “Nkarhi wufikile lowu N'wana-wa-Munhu angatatlakuliwa ha wona. 24Nitiyisisile nili ka n'wina: Loko ndzhoho ya vele yingaweli misaveni yifa, yitotshama yiritano; kambe loko yifa, yitachela ngopfu. 25#Vona ni: Mat. 10:39; 16:25; Mar. 8:35; Luk. 9:24; 17:33. Lweyi arhandzaka vutomi bza yena kutlula mina, atalahlekeliwa ha bzona, kambe lweyi abzinyiketaka misaveni leyi, atatihlayisela vutomi lebzingaheliki. 26Loko munhu anitirhela, aanilandze, kutani laha ninga kona, na yena nandza wa mina atava kona. Loko munhu anitirhela, Tatana atamukomba malwandla.

Yesu avulavula hi ta rifu ra yena

27“Svosvi moya wa mina wakarhateka; xana ningavula yini? Xana ningaku, Tatana, niponise ka nkarhi lowu, ke? E-e, kambe lesvi, hi svolesvi ningatela svona, ka nkarhi lowu. 28Tatana, dzunisa vito ra wena!” Kutani kutwakala rito, rihuma tilweni riku: “Niridzunisile, nitoyengeta niridzunisa.”

29Xitshungu lexi axiyimile kolaho, xisvitwile, kutani xiku: “Rindzindzile!” Van'wana vaku: “Ntsumi yivulavulile na yena.” 30Yesu atlhela, aku: “Rito leri aringayendleli mina loko ritwala, kambe riyendlela n'wina. 31Misava leyi svosvi yikarhi yiyavanyisiwa, kutani hosana ya misava leyi atahlongoliwa svosvi. 32Kambe mina, loko nitava nitlakuliwile nisuka misaveni, nitakokela vanhu hinkwavu ka mina.” 33Aavulisa svosvo hi kuringanisa rifu leri aangatofa ha rona.

34 # Vona ni: Psal. 110:4; Ez. 9:7; Ezek. 37:25; Dan. 7:14. Xitshungu ximuhlamula, xiku: “Hitwile Nawini lesvaku Mesiya atahanya hilaha kungaheliki; uvulisa kuyini wena, lesvi unge: ‘N'wana-wa-Munhu afanele kutlakuliwa’ xana? I mani N'wana-wa-Munhu lweyi ke?” 35Yesu aku ka vona: “Kuvonakala kahatava kona nkarhinyana na n'wina; fambani loko mahali ni kuvonakala, lesvaku munyama wutakala wungamikumi; kasi lweyi afambaka munyameni angativi laha ayaka kona. 36Loko mahali ni kuvonakala, pfumelani ka kuvonakala, lesvaku muhundzuka vana vakuvonakala.”

Ta Vayuda loko vatinonon'hwisa

Loko Yesu avulile svosvo, asuka ayatumbela kule na vona. 37Hambilesvi ayendleke mahlori layotala ngopfu mahlweni ka vona, avapfumelanga ka yena, 38svili lesvaku rito leri muprofeta Ezaya atshamaka arivula rihetiseka, leringe:

“We Hosi, i mani lweyi akholweke

lesvi hibzeliweke svona xana?

Xana akona lweyi avoneke matimba ya Hosi mhakeni leyi, ke?”

39Avakotanga kupfumela, hi kolaho Ezaya atlhela aku:

40“Aphumisile mahlo ya vona,

ni kutlanyata miyehleketo ya vona,

lesvaku vangahavoni,

ni kutwisisa vangahatwisisi,

ni lesvaku vangahundzuki,

na mina ningavahanyisi.”

41Ezaya avulile lesvi, hikuva avonile kudzuneka ka Yesu, na svona, aavulavula hi ta yena.

42hambi svilitano, lavotala ni le xikarhi ka tindhuna avapfumela ka yena; kambe, hikolaho ka Vafarisi, avangasvivuli rivaleni hi kuchava kuhlongoliwa sinagogeni. 43Hakunene varhandzile kudzunisiwa hi vanhu kutlula kudzunisiwa hi Xikwembu.

Rito ra Yesu rayavanyisa

44Kutani Yesu atlakusa rito, aku: “Lweyi apfumelaka ka mina, angapfumeli ka mina ntsena kambe apfumela ni le ka lweyi anirhumeke; 45nasvona lweyi anivonaka, avona lweyi anirhumeke. 46Mina ni kuvonakala, kutani nitile misaveni lesvaku mani na mani lweyi apfumelaka ka mina, angatshami munyameni. 47Mun'wana ni mun'wana lweyi atwaka marito ya mina, kambe angamahlayisi, animuyavanyisi, hikuva anitelanga kutayavanyisa misava, kambe kutaponisa misava. 48Lweyi anifularhelaka, kutani angayamukeli marito ya mina, a ni lweyi amuyavanyisaka; i marito lawa nimavulaka lawa mangatamiyavanyisa hi siku ra makumu. 49Hikuva anivulavulanga svohuma ka mina, kambe Lweyi anirhumeke, yena Tatana hi xiviri xa yena, anileletile lesvi nifaneleke kusvitivisa ni kusvivula. 50Nitiva lesvaku kulerisa ka yena i vutomi leringaheliki kutani lesvi nisvivulaka, nisvivula hilaha Tatana anibzeleke hakona.”

Currently Selected:

Yohani 12: NTC2014

Highlight

Copy