Mariko 16
16
Ajarun ka Yesu
(Mat 28:1-8; Luk 24:1-12; Yoa 20:1-10)
1Kedaun Esabato, kogwelunete Maria Magdalena, ka Maria toto keng' ka Yakobo, ka Salome akinyete na ekukuny kanuka akinyonyoikin akwaan ka Yesu. 2Taparucu cut naka esabiti, kolosete kesi ates elomuni akolong'. 3Eng'itanakinosi kesi ebalasi, “Ing'ai ing'arakini oni akikokoroor amoru ko okek kates?” 4Konye eng'oliarete kesi, koanyunete ebe kedaun akikokoroor amoru awai. (Kepolo amoru noi.) 5Kelomata kesi toma ates, koanyunete kesi esapata iboe koteten, enapit enaga lokakwang'an, koumokinete kesi.
6Kolimokini kesi, “Mam ariang'uni. Ikotosi osi Yesu loko Nasareti lo apon kibubukine omusalaba. Ajaru, mam kejii ne. Koanyutu nama anukakiite nesi. 7Konye kolototo, kolimokisi ikiyakia keng' nenipe ka Petero ebe egei nesi kama kus Galilaya. Anyunete osi nesi kang'ina, kwape kelimokitere nesi osi.”
8Kosodete alomar king'a ka amotar kates. Akuriaka bobo abu koumok kesi. Mam kesi alimun ibore ipede ka itwan ipede, naarai apotu kesi kokuriakarosi noi.
Atakaniki Yesu Mariam Magdalena
(Mat 28:9-10; Yoa 20:11-18)
9Kedau Yesu ajaruni kama kalu katwaka taparacu naka esabiti, kogei nesi atakanuni kamaka Maria Magdalena, nakireng'iarit nesi iparaa ikanykaare kama keng'. 10Kolomari nesi king'a ka alimokin ng'ulu lu aupasi ka nesi, ituriete ka akimonyo. 11Konye na eirarata kesi ebe kejari Yesu, bobo kanyuti nesi Yesu, mam kesi amunokin nesi.
Atakaniki Yesu Ikiyakia iare
(Luk 24:13-35)
12Ketuborosi nu, kosodi Yesu atakanuun kamaka ikiyakia keng' iare kokipone kece kalo agelakina elosete kesi idirarito aduket. 13Kobong'orete kesi alimokin luce, konye mam apotu komunokisi kesi.
Atakaniki Yesu Itomonkape
(Mat 28:16-20; Luk 24:36-49; Yoa 20:19-23; Asom 1:6-8)
14Kosial cut, kotakanuni Yesu kamaka ikiyakia itomonkape enyemete. Kiretakini nesi kesi kanu amamare kesi ajaatatar ka akiyuun ka akicasite kitawon kes, naarai amam kesi apotu komunokisi ng'ulu lukanyuto nesi kedau ajarun. 15Kolimokini nesi kesi, “Kolototo akwap kere kisiarasiarata akiro nukajokak kamaka itung'anan kere. 16Ng'ini kere ni emunokini kosodete akibatisa nesi eyuuno nesi. Konye ng'ini kere ni emam kimunokini etubokino nesi. 17Ebunete aumosia nu akigwapa ng'ulu lu emunokinete. Ebunete kesi akireng'ianar ipara ko okiror kang', ebunete kesi ejori ka ang'ajepa kanu egelegela kanu itetiaka, 18ebunete kesi akirum imunwo, kere de kematata kesi ibore nikaran, mam kikang'asi kesi, idokokinete kesi akanin kes kuju kalu edekasi, kong'aleunete.”
Ayari Yesu Kuju
(Luk 24:50-53; Asom 1:9-11)
19Kedau Lokapolon Yesu ejori ka kesi, koyarete nesi kuju, kosodi akiboikin teten ka Akuju. 20Koikarete ikiyakia akisiarasiara ng'olo wai. Abu Lokapolon kisomata ka kesi, ka akitodiar nukisiarisiaro kopone kaloka aumosia kanu esomaete kesi.
Currently Selected:
Mariko 16: TESOP
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
