Cantar de los cantares 6
6
Waljani
1Muncañ warminac taypita wali muncañ warmi,
¿cawquirus munatamajja sarjjejja?
¿Cawcsa tokerus sarawayi?
¡Jumamp chica thakeri sarañäni!
Warmi
2Nayan munatajjajj pankar yapuparuw sarjje,
suma k'aphichat pankar yapuparu,
tamapa awatisiri, lirio pankaranaca apthapiriraqui.
3Nayajj munatajjanctwa, jupasti nayancaraquiwa.
Jupajj tamanacapjja lirio pankaranac taypiruw awatisi.
Pheskër k'ochu
Chacha
4Jumasti munatajjay, sinti muncaña wali jiwaquïtawa,
Tirsa, uqhamarac Jerusalén marcanacjama;
sarantasquir ejercitor uñtat jan atipcayätawa.
5¡Jan juc'ampi uñch'ucjjestati,
uñch'uquitamasti nayarojj chuyma lunthatitu!
Ñic'utamasti Galaad sat kollu cayuna jipirata cabrito tamanacar uñtatawa.
6Laca ch'aqhanacamasti sumacamaquiwa chhuyu yawirata, uqhamaraqui umat mistut jank'o ovejanacar uñtatawa.
7Ajanumasti granada fruta k'alljatjamaraquiwa velo khepäjjana imantata.
8Reinanacasti pakallk tuncanïpjjewa,
uñt'atanacapasti quimsakallk tuncanïpjjaraquiwa,
tawakonacas waljanïpjjaraquiwa,
9ucampis nayan suma palomajjasti maya sapaquiwa;
mä sapaquiwa taycapana wali munat phuchapajja,
jupar wawachqui uca taycapansa ajllitawa.
Tawakonacasti jupar uñjasinjja cusisipjjewa;
reina warminacasa, uñt'atanacasa juparojj jach'aruw aptapjjaraqui.
Waljani
10“¿Qhitirac acasti willjta khanjam uñstani,
phajjsir uñtatjama wali suma, intjama suma c'ajaraquisti?
¡Suma sarantir jan atipcaya ejercitor uñtata!”
Warmi
11Nogal sat kokanac taypiruw sarakawayta,
uma jalsu ch'ojjñanaca uñatatasiri;
uva kokanacajj ch'ojjñatatjjpachati janicha uc uñjiriw sarta,
uqhamarac granado alinacan pankaranacapsa.
12Ucatsti janiw yatcti cunatejj lurascäna ucjja,
carro patjjana nayan uñstatajjcama, reyin yokap thiyana.
Waljani
13¡Cutt'anjjam, Sulamita, cutt'anjjam!
¡Cutt'anjjam, uñjañwa munapjjsma!
Warmi
¿Cunataquis Sulamitarojj uñjañ munapjjta?
Waljani
¡Campamentonac taypin thokhorinacarjama!
Currently Selected:
Cantar de los cantares 6: AYOP
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
