Mat 22
22
Ngerekano ya kîatho kîa mûranû
(Luk 14.15-24)
1Jesû nî aarîrie kîrîndî kaîrî agîtumagîra ngerekano akiugaga: 2“Ûneene bwa îgûrû bwoomba kûng'uananua na mûnene ûrîa wathithîrie kîatho kîa mûranû nîûntû bwa mûtaana waawe. 3Nî aatûmîre nthûûmba ciaawe nîkenda ciîta gwîta barîa beeti kîathoone kîa mûranû, îndî antû barareega gwîta kîathoone. 4Aracoka aratûma nthûûmba ingî na araciîra atîrî, ‘Îteeni bwîre barîa bagwîti ûjû: kîatho gîaakwa nî kîthirîtie kûthuranîrwa; ndeegwa irîa noru nî ithînji na mantû jonthe nî jathuranîri. Bereeni beeje kîathoone kîa mûranû.’ 5Îndî antû bau batatindanîre na mantû jau ja mûranû. Ûmwe areeta muundeene jwaawe, na ûngî areeta ngûgîîne ciaawe, 6na barîa bangî baragwata nthûûmba iu ciatûmi na baraciûûra na barabooraga. 7Mûnene ûu nî aathûûrîre mono, na aratûma asikarî barooraga ooragani bau na baraîîthia ntûûra yaao. 8Rîu areera nthûûmba ciaawe, ‘Ndîbwîra na mma atî kîatho kîa mûranû nî gîkûthuranîri buru, îndî bau bagwîti batîkwagîri gwîtwa. 9Tontû bûû, îteeni njîreene na bwîte bonthe barîa bûkoona bûbeere beeje kîathoone.’ 10Tontû bûû, nthûûmba iu ireeta njîreene na ireeta bonthe barîa cionere: babeega na babaaî. Nyomba îrîa yaathuranîri îroojûra antû ndoo.
11“Rîrîa mûnene aakûrûkîre nyomba kîrî ageni, nî oonere muntû ûteekîrîte nguû ya mûranû. 12Mûnene ûu aramûûria atîrî, ‘Mûcoore, nîatîa ûûmbîre gûkûrûka aja ûtî na nguû ya mûranû?’ Muntû ûu atoonere bwa kûmwîra. 13#Mat 8.12; 25.30; Luk 13.28 Rîu mûnene areera nthûûmba ciaawe atîrî, ‘Mûtheekeni njara na magûrû, bûmûgere oome kûrîa kûrî na muundu. Kûu nîku antû bakarîraga na gûkabakabaga maîgo.’ 14Nîkwîthîrwa babaingî nî beeti îndî barîa bathuuri nî babakai.”
Kîûria kîegiî kûrîaa ûgoti
(Mar 12.13-17; Luk 20.20-26)
15Rîu Afarisayo bareeta na baraireba ûrîa bakagwata Jesû kuumania na rwaria rwaawe. 16Tontû bûû, baramûtûmîra athingati baao, amwe na antû barîa baagwataga Herode mbaru. Beeta barooria Jesû atîrî, “Mûritani, tuî nî tûkûmenya atî ûrî muntû waragia ûûma, na ûritanaga mantû ja Mûrungu ûrîa kwagîrîte. Gûtî muntû ûkîraga nîûntû ûtîûragia këethîra muntû arî na îgweta kana atî na îgweta. 17Nandî twîre ûrîa ûkûthûgaania. Waatho bweetû nî bûgwîtîkîîria tûrita ûgoti kîrî Kaisarî, mûnene wa Roma?” 18Îndî nîûntû Jesû nî aamenyaga ûûî bûrîa baarî nabu, arabeera, “Îbuî aciayia, nîkî bûkwenda kûngeria? 19Mbonieni mbeecha irîa bûrîaga ûgoti nacio.” Nabo baramûnenkera mbeecha irîa ciatumagîrwa îgiita rîu. 20Jesû arabooria, “Mbicha îîjî na maandîko jaja nî jaû?” 21Baramûcokeria, “Nî bia Kaisarî.” Rîu Jesû arabeera, “Nenkagîreeni Kaisarî birîa birî biaawe, na bûnenkagîre Mûrungu birîa birî biaawe.” 22Rîrîa baigîrue ûrîa aabacokerie nî baarigarîre mono na baraciîtîra.
Kîûria kîegiî kûriûka
(Mar 12.18-27; Luk 20.27-40)
23 #
Maj 23.8
Ntukû o îîu Asadûkayo barîa batetîkagia atî antû baakuû bakariûka, nî beetîre kîrî Jesû na baramwîra atîrî, 24#Kûr 25.5 “Musa nî augîre atî muntû akëeja gûkua atî na twaana, no mwanka mûtaana wa ng'ina ajûkie ntigwa îîu nîkenda agaciarîra mûtaana wa ng'ina twaana. 25Nandî aja gweetû nî kwaarî na ataana mûgwanja ba muntû ûmwe. Wa mbere nî aagûranîre îndî arakua atî na twaana, na mûtaana wa ng'ina arajûkia ntigwa îîu. 26Kinya we arakua atî na twaana, na wa bathatû arathithia o ûu mwanka wa mûgwanja. 27Ataana bau bonthe bagûkua kinya ntigwa îîu nî yakuîre. 28Nandî rî, rîrîa akuû bakariûka mûka ûu akeethîrwa arî mwekûrû waaû, nîkwîthîrwa ataana bau bonthe mûgwanja nî baamûgûrîte?”
29Jesû arabacokeria, “Nî mma bûtiijî mantû jau nîûntû bûtiijî Maandîko kana bûmenya Mûrungu arî na inya. 30Nîkwîthîrwa rîrîa akuû bakariûkua bakeethîrwa bakari ta araîka barîa barî îgûrû, bo batîgûranaga kana bagûrwa. 31Îndî ka bûtathoma ûrîa Mûrungu augîîte bwegiî kûriûka kwa barîa bakuîte? 32#Kum 3.6 Augîîte, ‘Ûûni nî ni Mûrungu wa Abrahamu, na wa Isaaka na wa Jakubu.’ Tontû bûû, we tî Mûrungu wa barîa bakuîte, îndî we nî Mûrungu wa barîa barî mwoyo.” 33Rîrîa ntundu yaigîrue ûu îrarigarua nî ûritani bwaawe.
Rîathana rîrîa rînene kîrî jangî
(Mar 12.28-34; Luk 10.25-28)
34Rîrîa Afarisayo baigîrue atî Jesû nî aathirîrie nkaanja cia Asadûkayo, nî boothûranîre amwe. 35#Luk 10.25-28 Mûgambi ûmwe waao, ûrîa waijî Waatho bwega akîgeria Jesû aramûûria atîrî, 36“Mûritani, nî rîathana rîrîkû rîrîa rînene nkûrûki ya jangî jonthe kîrî Waatho bwa Musa?” 37#Kûr 6.5 Jesû aracokia, “Endaga Mwathani Mûrungu waaku na nkoro yaaku yonthe, na mwoyo jwaaku junthe, na mathûgaanio jaaku jonthe. 38Rîrî nîrîo rîathana rîrîa rînene buru na rîa mbere. 39#Ala 19.18 Rîathana rîa jaîrî rîng'uanene na rîo. Narîo nî: ‘Endaga muntû ûngî o ta ûrîa ûciendeete gwengwa!’ 40Waatho bunthe bwa Musa na mooritani ja iroria jaumanîtie na maathana jau jo jaîrî.”
Kîûria kîegiî Kristû
(Mar 12.35-37; Luk 20.41-44)
41Rîrîa Afarisayo boothûranîte amwe, Jesû nî aaboorîrie atîrî, 42“Babuî bûthûgaanagia atîa mantû jegiî Kristû? We nî mûtaana waû?” Baramûcokeria, “Nî mûtaana wa Daudi.” 43Jesû arabeera, “Îndî nîkî Daudi oojûri Roho Ûmûtheru aamwîtaga ‘Mwathani?’ rîrîa augîre:
44 #
Zab 110.1
‘Mwathani nî eerîre Mwathani waakwa:
Kara nthî rûteere rwaakwa rwa ûrîo,
mwanka rîrîa nkaethia anthû baaku gîkinyithio kîa magûrû jaaku.’
45“Rîu këethîra Daudi arîîta Mesia ‘Mwathani’ rî, nîatîa Mesia ûu oomba kwîthîrwa arî mûtaana waawe?” 46Gûtî muntû kinya ûmwe woombîre kûmûcokeria noo atîa. Kuuma ntukû îîu gûtî muntû woomîîrîrie kûmûûria kîûria kaîrî.
Currently Selected:
Mat 22: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
