Mat 12

Kîûria kîegiî ntukû ya sabatû

(Mar 2.23-28; Luk 6.1-5)

1 # Kûr 23.25 Îgiiteene rîmwe kûrî ntukû ya sabatû, Jesû na aritwa baawe nî bakûrûkîrîîte muundeene jwa nkano. Aritwa baawe barambîrîria kuuna nkano bakîrîjaga, nîûntû nî baarî na mpara. 2Îndî Afarisayo bakwona ûu bareera Jesû atîrî, “Tega aritwa baaku bakîthithia ûntû bûrîa Waatho buugîîte bûkáthithua ntukû ya sabatû!” 3#1Sam 21.1-7 Jesû arabacokeria arabeera atîrî, “Ka bûtaathoma ûrîa Daudi aathithîrie rîrîa we na antû barîa aarî nabo baigîrue mpara? 4#Ala 24.9 Nî aakûrûkîre ndeene ya kîûrû arî na antû baawe, na bararîa mîgaate îrîa yaathûrîri Mûrungu. We na barîa baarî amwe nawe batetîkîrîîtue nî Waatho kûrîa mîgaate îîu tiga athînjîri-Mûrungu bonka. 5#Gût 28.9-10 Kana ka bûtaathoma Waathoone bwa Musa bwona ûrîa athînjîri-Mûrungu baunîre Waatho bwegiî ntukû ya sabatû barî kîûrûûne, ntukû ya sabatû îndî jatajukîrue jarî meeyia? 6Nandî ndîbwîra, kûrî ûmwe ûrî aja ûmûnene nkûrûki ya kîûrû. 7#Mat 9.13; Hos 6.6 Ningî këethîra nî bwijî gîtûmi gîa nteto iji atî, ‘Mpendaga barîa baigagîrua bangî kîaao, îndî ni ntî bata na kîgongwana kîa gwakîîria,’ bûtîngîtuîra antû batî na maatia ta barî na maatia. 8Nîkwîthîrwa Mûtaana wa Muntû nîwe mwathi wa sabatû.”

Jesû kworia muntû waarî na njara yonji

(Mar 3.1-6; Luk 6.6-11)

9Jesû arauma au na arakûrûka kîromberoone kîaao 10na areethîra muntû waarî na njara yonji. Antû baramûûria atîrî, “Waatho nî bûgwîtîkîîria muntû orua ntukû ya sabatû?” Baamûûrîrie ûû nîkenda boona ûntû bwa kûmûthitanga nabu. 11#Luk 14.5 Jesû arabooria atîrî, “Nî ûrîkû weenu ng'ondu yaawe îgwîkia îriinyeene ntukû ya sabatû na akarega kûmîrita ntukû o îîu? 12Muntû nîwe ûrî gîtûmi gîkînene nkûrûki ya ng'ondu. Tontû bûû, Waatho nî bwîtîkîîrîtie muntû athithia ûntû bûbwega ntukû ya sabatû.” 13Rîu Jesû areera muntû ûu waarî na njara yonji atîrî, “Tambûrûkia njara yaaku.” Nawe aratambûrûkia njara yaawe, nayo îrabua na îrakara o ta îrîa îngî. 14Tontû bûû, Afarisayo barauma au na baraireba ûrîa bakamûûraga.

Nthûûmba îrîa Mûrungu athuurîte

15Rîrîa Jesû amenyere ûntû bûû arauma gûntû kûu. Antû babaingî baramûthingata na arooria bonthe barîa baajîtue, 16na arabakaania batîkeere antû we nûû. 17Athithîriee ûu nîkenda jarîa kîroria Isaya augîîte joojûra:

18 # Isa 42.1-3 “Îîjî nîyo nthûûmba yaakwa îrîa nthuurîte,

ûrîa mpendeete na ûrîa ngwîragua nîwe.

Ngatûma Roho waakwa akare kîrî we,

na agatûmîîria mantû ja îota kîrî antû bonthe barîa batî Ayahudi.

19Atîteta kana akaya,

ningî kajû kaawe gatiigîgua njîreene.

20Atînyang'inyûra kathanje karîa karî akuî kûnyang'inyûka,

kana oorîa rûtambi rûrîa rûrî akuî kwoora,

mwanka rîrîa agatûma îota rîtue kûthingatagwa,

21na antû barîa batî Ayahudi bamwîrîgagîîre.”

Jesû na Beelizebuli

(Mar 3.20-30; Luk 11.14-23)

22Rîu Jesû arareeterwa muntû waarî mûtumuumu na atoombaga kwaria nîûntû nî aarî na roho inthûûku. Jesû arooria muntû ûu na arambîria kwona na kwaria. 23Antû bonthe bararigara bakîûragia, “Ûjû oomba kwîthîrwa nîwe Mûtaana wa Daudi?” 24#Mat 9.34; 10.25 Îndî rîrîa Afarisayo baigîrue ûu barauga, “Muntû ûjû engaga roho inthûûku agîtumagîra inya kuuma kîrî Beelizebuli, mûnene wa roho inthûûku.” 25Jesû akûmenya ûrîa baathûgaanagia arabeera atîrî, “Antû ba ûnene kinya bûrîkû bakeethîrwa bakîrûjaga gatîgatîîne kaao, ûnene bûu bûtîûmba gûtûûra îgiita rîrîraja. Ningî antû ba ntûûra îmwe kana antû ba mûciî jûmwe bakeethîrwa bakîrûjaga gatîgatîîne kaao, ntûûra îîu kana mûciî jûu, batîûmba gûtûûra amwe îgiita rîrîraja. 26Këethîra roho îthûûku nî îkwînga roho îngî na cio-ijîîrî îrî ûneneene bûmwe bwa Nkoma rî, ûnene bûu bwoomba gûtûûra? 27Buugaga atî mpîngaga roho inthûûku ngîtumagîra inya kuuma kîrî Beelizebuli, nabo aana beenu beengaga roho inthûûku bagîtumagîra inya yaaû? Tontû bûû, aana beenu nîbo bakabûgiitîra îgamba. 28Îndî nkëethîrwa mpîngaga roho inthûûku na inya ya Roho wa Mûrungu, menyeni atî Ûnene bwa Mûrungu bûgûkinya kîrî buî. 29Ningî nîatîa muntû oomba gûtonya nyomba ya muntû ûrî inya na akajûkia into biaawe, tiga akaamba kûmûtheeka rîu akajûkia into. 30#Mar 9.40 Ûrîa ûtî amwe naani, nîka arûjaga naani. Ningî ûrîa ûtîûthûranagia amwe naani nîka anyagagia. 31Tontû bûû, ndîbwîra atî antû bakarekerwa meeyia jonthe, na kinya barîa barumaga Mûrungu bakarekerwa, îndî barîa barumaga Roho Ûmûtheru batîrekerwa. 32#Luk 12.10 Ningî ûrîa ûkaaria ûntû bûbûûî bwegiî Mûtaana wa Muntû akarekerwa, îndî ûrîa ûkaaria ûntû bwa kûmeneeria Roho Ûmûtheru atîrekerwa nandî na kenya na kenya.”

Mûtî jûmenyekanaga na maciara jaaju

(Luk 6.43-45)

33 # Mat 7.20; Luk 6.44 “Mûtî jûkëethîrwa jûrî jûmwega, kinya maciara jaaju jeethagîrwa jarî jameega, îndî jûkëethîrwa jûrî jûmûûî, kinya maciara jaaju jethagîrwa jarî jamaaî. Mûtî jûmenyekanaga na maciara jaaju. 34#Mat 3.7; 23.33; 15.18; Luk 3.7; 6.45 Îbuî rûciara rwa njoka! Nîatîa bûûmba kwaria mantû jameega na bûrî babaaî? Nîkwîthîrwa o muntû aragia mantû jarîa jojûrîte nkoroone. 35Muntû ûmwega aragia mantû jameega jaumîte kîrî wega bûrîa bûrî ndeene yaawe, na muntû ûmûûî aaragia mantû jamaaî jaumîte kîrî ûûî bûrîa bûrî ndeene yaawe.

36“Ndîbwîra na mma atî Ntukû ya Îgamba yakinya o muntû akoorua mantû jegiî nteto cia rûûgo irîa aaria. 37Nîkwîthîrwa nteto ciaaku nîcio igatûma ûtuîrwa atî ûrî ûmwega kana ûrî ûmûûî.”

Afarisayo kwîra Jesû aringe kîama

(Mar 8.11-12; Luk 11.29-32)

38 # Mat 16.1; Mar 8.11; Luk 11.16 Rîu aritani bamwe ba Waatho na Afarisayo nî beerîre Jesû atîrî, “Mûritani, nî tûkwenda kwona ûkîringa kîama.” 39#Mat 16.4; Mar 8.12 Îndî Jesû arabacokeria atîrî, “Buî nthukî îmbîî ya antû athûngîîri! Bûrîenda kwona nkîringa kîama bûkîona, îndî gûtîkîo bûkoona tiga kîrîa kîa kîroria Jona. 40#Joh 1.17 O ta ûrîa Jona aakarîre kîu kîa gîkûyû gîkînene ntukû ithatû, ûtukû na mûthenya, o ûu nîu Mûtaana wa Muntû agakara nthîgûrû ndeene, ntukû ithatû, utukû na mûthenya. 41#Joh 3.5 Ntukû ya Îgamba yakinya antû ba Nineve bakeeja na bagambithie antû ba nthukî îîjî, nîkwîthîrwa antû bau ba Nineve nî bairirîre rîrîa Jona aabatûmîîrîrie. Raithîrieni! Ûmwe ûmûnene nkûrûki ya Jona arî aja. 42#1Ane 10.1-10; 2Ma 9.1-12 Mûka-mûnene wa nthîgûrû ya Sheba akeeja Ntukû ya Îgamba yakinya, na agambithie antû ba nthukî îîjî. Mûka-mûnene ûu nî aumîre kûraaja na areeta kûthikîîra kîrîra kîa mûnene Solomoni. Raithîrieni! Ûmwe ûmûnene nkûrûki ya Solomoni arî aja.”

Gûcoka kwa roho inthûûku kîrî muntû

(Luk 11.24-26)

43“Rîrîa roho înthûûku yuumaga kîrî muntû îriûnganagia na rwanda îgîcûaga antû a kuurûka, îndî îtîone. 44Rîu îgaciîra atîrî, ‘Ngacoka nyomba yaakwa îrîa ndaumîre.’ Yacoka îkeethîra nyomba îrî întheri na yeegeri na yathongoma bwega. 45Yoona ûu îgeeta îkagîîra roho ingî mûgwanja inthûûku nkûrûki yaayo, naacio igatûûra nyomba îîu. Tontû bûû, muntû ûu akeethîrwa arî ûmûûî nkûrûki ya ûrîa aakari mbere. Ûû nîu antû ba nthukî îîjî ya ûmaramari îgakara.”

Ng'ina na ataana ba ng'ina ba Jesû gwîta kûmûcwa

(Mar 3.31-35; Luk 8.19-21)

46Rîrîa Jesû aaragîria antû, ng'ina na ataana ba ng'ina nî baakinyîre na bararûngama oome bakîendaga kwaria nawe. 47Muntû ûmwe areera Jesû atîrî, “Nyakwe na ataana ba nyakwe nî barûngi oome bakîendaga kwaria naagwe.” 48Îndî Jesû aramûûria atîrî, “Chiaa nûû? Nabo ataana ba chiaa nî baaû?” 49Rîu aroorota aritwa baawe na arauga, “Baba nîbo chiaa na nîbo ataana ba chiaa! 50Nîkwîthîrwa muntû ûrîa ûthithagia ûrîa Baaba ûrîa ûrî îgûrû endaga, nîwe chiaa na nîwe mûtaana wa chiaa na ningî nîwe mwarî wa chiaa.”

Currently Selected:

Mat 12: KIMERUBIBLE

Highlight

Copy