Luk 4
4
Jesû Kûgerua
(Mat 4.1-11; Mar 1.12-13)
1Jesû nî aumîre Jorodani, oojûri Roho Ûmûtheru. Roho nî aamûtongeererie mwanka rwanda. 2Nî aakarîre kû ntukû mîrongo îna akîgeragua nî Nkoma. Ntukû iu cionthe, gûtîkîo aarûma. Ntukû iu ikûthira nî aigîrue mpara. 3Nkoma aramwîra, “Ûkëethîrwa ûrî Mûtaana wa Mûrungu, îîra iiga rîrî rîee mûgaate.” 4#Kûr 8.3 Jesû areera Nkoma atîrî, “Nî kwaandîki Maandîkoone atî ‘Muntû atîtûûraga mwoyo nîûntû bwa kûrîa mûgaate akî.’” 5Nkoma aramwitithia antû araaja na aramwonia moonene jonthe ja nthîgûrû, 6na aramwîra, “Ngakwaa inya ya kwathaga moonene jaja jonthe na nkwee mwago jwaajo. Nî nenkeretwe moonene jaja na ndoomba kûnenkera o ûrîa nkeenda. 7Tontû bûû, ûgänturîrîa maru na ûkanthaathayia, moonene jaja jonthe jakaa jaaku.” 8#Kûr 6.13 Jesû aracokeria Nkoma aramwîra, “Kwaandîki, ‘Thaathagia Mwathani Mûrungu waaku, na ûmûtumîkagîre we wenka.’” 9Nkoma aratongeeria Jesû mwanka kathûmbî ka kîûrû kîa Jerusalemu na aramwîra, “Këethîra ûrî Mûtaana wa Mûrungu, ciarûkie nthî; 10#Zab 91.11 nîûntû nî kwaandîki, ‘Akeera araîka baawe bakûmenyeere na bagûkarie’ 11#Zab 91.12 na ‘bakûgwatîîre ûtîkeeje kûringwa kûgûrû gwaaku nî iiga.’” 12#Kûr 6.16 Jesû aracokeria Nkoma atîrî, “Maandîko jarîuga, ‘Ûkágeria Mwathani Mûrungu waaku.’” 13Rîrîa Nkoma aathirîrie kûgeria Jesû na njîra cionthe, aramûtiga mwanka rîrîa akoona kaanya kaangî.
Jesû kwambîrîîria gûtûmîîria Galili
(Mat 4.12-17; Mar 1.14-15)
14Jesû oojûri Roho Ûmûtheru nî aacokere Galili na nteto imwegiî iratamba nthîgûrû iu yonthe. 15Nî aaritanîre iromberoone biaao agîkumagua nî antû bonthe.
Jesû kûregwa ntûûreene ya Nazarethi
(Mat 13.53-58; Mar 6.1-6)
16Agûkinya Nazarethi, ntûûreene îrîa arereerwe, nî aakûrûkîre kîromberoone ntukû ya sabatû, o ta ûrîa kwaarî wîthîre bwaawe kûthithagia. Nî aarûngamîre nîkenda athoma Maandîko. 17Nî aanenkerwe yuku rîa Kîroria Isaya. Akûguûria aroona arîa kwaandîki,
18 #
Isa 61.1-2
“Roho wa Mwathani arî kîrî ni,
nîûntû nî ambathûrîte ntûmagîîria Nteto Injega kîrî nkîa.
Antûmîte nîkenda ndita atae ûkomboone,
na ntûma atumuumu boona.
Ntûûme barîa bainyîrîtue boone ûciathi.
19Ntûmîîrie îgiita rîrîa Mwathani akoonokia antû baawe.”
20Jesû arakunîka yuku, na aracokeria ûrîa waamenyagîîra kîrombero, rîu arakara nthî. Antû bonthe barîa baarî ku baramûkûnîîra kûnûû. 21Araambîrîria kûbeera, “Naarua Maandîko jaja bwathiria kûthomerwa jakûjûra.” 22Antû bonthe nî bamûkumîrie na bararigarua nî nteto irîa aaragia na barauga, “Anga ûjû tî mûtaana wa Josefu?” 23Arabeera atîrî, “Gûtî nkaanja bûkambîîra njuno îîjî, ‘Ndagitarî ciorie gwengwa; thithia aja ntûûreene yaaku jarîa jonthe twigîtue nî ûthithîtie kûûrîa Kaperinaumu.’” 24#Joh 4.44 Arabeera, “Ndîbwîra na mma atî, gûtî kîroria kîrî îgweta ntûûreene yaakîo. 25#1Ane 17.1 Ndîbwîra na mma atî, nî kwaarî na ntîgwa inyingî Israeli rîrîa Elija aarî o, rîrîa îgûrû rîaingîrwe mîaka îthatû na nusu gûtîkuura na kûragîa na mpara înene nthîgûrû yonthe. 26#1Ane 17.8-16 Îndî Elija atatûmîrwe kîrî ntigwa kinya îmwe ya iu, tiga kîrî ntigwa îrîa yaatûuraga Zarefathi, nthîgûrûûne ya Sidoni. 27#2Ane 5.1-14 Ningî nî kwaarî antû babaingî baajîtue nî mûtigiri kûu Israeli rîrîa Kîroria Elisha aarî o, îndî gûtî kinya ûmwe waabo woorerue tiga Naamani ûrîa waumîte Sîria.” 28Rîrîa antû bonthe barîa baarî kîromberoone baigîrue ûu nî baathûûrîre mono. 29Nî bookîîrîre na baramuumagaria oome ya ntûûra. Baramwikia akuî na rwaara rwa kîrîma kîrîa ntûûra yaaki, bakîendaga kûmwarûkia. 30Îndî Jesû arakûrûkîîra gatîgatî kaao na araciîtîra.
Muntû waathangîkagua nî roho înthûûku
(Mar 1.21-28)
31Jesû nî eenamîre ntûûreene ya Kaperinaumu, îrîa yaarî Galili, na araritana antû kûrî ntukû ya sabatû. 32#Mat 7.28-29 Antû nî bararigarîrue mono nî ûritani bwaawe nîûntû bwa ûrîa ariitanaga arî na inya. 33Kîromberoone kîu nî kwaarî na muntû waarî na roho înthûûku. Muntû ûu arakaya akiugaga, 34“Wûûi! Nîatîa ûkwenda naatuî Jesû wa Nazarethi? Ka wîîjîte gûtwînyangia? Nînkûmenya gwe ûrî û. Ûrî Ûrîa Mûtheru wa Mûrungu.” 35Îndî Jesû aramîgondokera aramîîra, “Kira ki na uume kîrî muntû ûûjû!” Rîrîa yaumaga kîrî we, îramûgwithia nthî gatîgatî kaao na îtamwîkîra rûgûma. 36Antû bonthe nî baarigarîre na bareerana, “Nî nteto îkari atîa iji? Tontû arîgondokera roho inthûûku arî na inya na waatho bûbûnene, na ikauma!” 37Mantû jamwegiî jaratamba nthîgûrû îîu yonthe.
Jesû kworia antû babaingî
(Mat 8.14-17; Mar 1.29-34)
38Jesû nî aumîre kîromberoone na areeeta nyomba ya Simioni. Ng'ina wa mwekûrû wa Simioni nî aajîtue nî nchoma mono. Antû baramwerenca amworie. 39Jesû ararûngama akuî nawe na aragondokera mûrimo jûu. Mwekûrû arabua na arookîîra ntûti na arabamathîra. 40Rîrîa ûgoro bwakinyîre, bonthe barîa baarî na antû baajîtue nî mîrimo mwanya mwanya nî babaikîrie kîrî Jesû. Arabarîkîîra njara o ûmwe kwa ûmwe, na bonthe barabua. 41Jesû nî agondokeere roho inthûûku irauma kîrî antû babaingî. Roho iu nî ciakayaga ikiugaga, “Gwe ûrî Mûtaana wa Mûrungu.” Îndî aracigondokera na atîreke ciaria, nîûntû nî ciamenyaga atî nîwe Kristû.
Jesû gûtûmîîria kîromberoone
(Mar 1.35-39)
42Rîrîa gwakeere Jesû nî aumagarîre na areeta gûntû gûtaarî na antû. Antû baramûcwaa na rîrîa baamwonere, baramwerenca atîkaume kûu kwaao. 43Îndî Jesû arabeera, “No mwanka ntûmîîrie Nteto Injega ciegiî Ûnene bwa Mûrungu ntûûreene irîa ingî kinya cio. Nîkwîthîrwa kîu nîkîo gîatûmîre Mûrungu aantûma.” 44Tontû bûû, aratûmîîria iromberoone bia nthîgûrû ya Judea.
Currently Selected:
Luk 4: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
