Luk 12

Imenyagîîreni mantûûne jegiî aciayia

(Mat 10.26-27)

1 # Mat 16.6; Mar 8.15 Kûrî îgiita rîmwe antû ngiri inyingî boothûranîre amwe mwanka baraambîrîria gûkinyangana. Rîu Jesû areera aritwa baawe ûjû, “Imenyagîîreni mûtheega jwa kwimbithia mîgaate jwa Afarisayo. Mûtheega jûu nî ûciayia. 2#Mar 4.22; Luk 8.17 Gûtî gîntû gîkunîkîri gîtîkûnûrwa, kana witho bûtîmenyekana. 3Tontû bûû, ûntû bunthe bûrîa bwaragîria muunduune bûkaumîrua weerûûne, na ûntû bunthe bûrîa bwaragia na kîoe bûrî bwinka, bûgatûmîîrua bwigîîgue nî antû bonthe.”

Ûrîa ûbuîrîte gûkîra

(Mat 10.28-31)

4Jesû areeta na mbere kûbeera, “Acoore baakwa, bûgákîra barîa boraaga mwîrî, îndî gûtî ûngî boomba kûthithia. 5Îndî ka mbwîre ûrîa bûbuîri gûkîraga: kîrageni ûrîa ûûraga mwîrî, na aathiria kûjûûraga, arî na inya ya kûjûgera mwankiine jwa kenya na kenya. Ga nkûbwîra na mma atîrî, ûu nîwe bûbuîri gûkîraga. 6Ka nyoni ithaano itîgûragwa na mbeecha inkai? Mûrungu atîûragîrua nî kinya îmwe yaacio. 7Mûrungu nî aijî îtari rîa mîtuundu yeenu. Tontû bûû, bûgákîra nîkwîthîrwa bûrî ba gîtûmi nkûrûki ya nyoni inyingî.”

Gûkûûjîîra kana gûkaana Kristû

(Mat 10.19-20,32-33; 12.32)

8“Ndîbwîra na mma atî, muntû wonthe ûrîa ûgankûûjîîra mbere ya antû, kinya Mûtaana wa Muntû akamûkûûjîîra mbere ya araîka ba Mûrungu. 9Îndî ûrîa ûgankaana mbere ya antû, kinya ni nkamûkaana mbere ya araîka ba Mûrungu. 10#Mat 12.32; Mar 3.29 Muntû kinya ûrîkû ûrîa ûkaaria mantû jatîagîrîte jegiî Mûtaana wa Muntû akarekerwa; îndî ûrîa ûkaaria mantû jatîagîrîte jegiî Roho Ûmûtheru atîrekerwa. 11Rîrîa bakabwikia kûbûgambithia iromberoone kana kîrî anene kana kîrî athani, bûkaithangîkieni bûkîuragia ûrîa bûgacokia kana ûrîa bûkauga. 12#Mat 10.19-20; Mar 13.11; Luk 21.14-15 Tontû Roho Ûmûtheru akabûritana ûrîa bûkaaria kagiiteene kau.”

Ngerekano ya gîtonga kîaa

13Ûmwe kuuma kîrî kîrîndî kîu kîothûranîte aramwîra, “Mûritani, îîra mûtaana wa chiaa angaîre into birîa baaba atûtigîîre agîkua.” 14Îndî Jesû aramûûria, “Mûcoore! Nûû ûmpethetie mûgiiti wa îgamba rîeenu kana mûbûgaîri into bieenu?” 15Rîu Jesû aareera antû bonthe, “Imenyagîîreni bûtîkagîe na ûkîa bwa into no birîkû; nîkwîthîrwa muntû atîûmba gûtûûrua mwoyo nî wingî bwa ûtonga bûrîa arî nabu.” 16Ningî arabaa ngerekano îîjî, “Kûrî îgiita muntû ûmwe arîmîre muunda na jûraciara irîo bibingî mono. 17Nawe arathûgaania na araciûria, ‘Nîatîa nkathithia nîûntû ntî na a gwîka maketha jaakwa?’ 18Ningî araciîra atîrî, ‘Nkaathithia ûjû: ndîtharia nchuku ciaakwa cionthe na mbake ingî inene. Rîu mbîke irîo na into biaakwa bingî ku. 19Ncoke nciîre atîrî, Ûrî na into bibingî biakûrîa mîaka îmiingî. Nogoka, na ûrîe na ûnyûe na ûgwîrue.’ 20Îndî Mûrungu areera gîtonga kîu, ‘Ûrî kîaa, ûtukû bûbû ûgaakua! Into bibi ûrî nabio bikaa biaaû?’” 21Jesû akîthiria arauga, “O ûu nîu gûgakara kîrî muntû ûrîa ûciûthûranagîria ûtonga, îndî tî gîtonga mbere ya Mûrungu.”

Kwîrîgîîra Mûrungu

(Mat 6.25-34)

22Jesû areera aritwa baawe, “Tontû bûû, ndîbwîra atîrî, bûkáithangîkia bûkîûragia bûgatûûra atîa kana bûkarîa mbi kana bûgeekîra mbi. 23Nîkwîthîrwa ûtûûro bûrî gîtûmi nkûrûki ya biakûrîa, na mwîrî jûrî gîtûmi nkûrûki ya nguû. 24Raithîrieni nyoni: itîaandaga kana îketha, na îtî nchuku, îndî amwe na bûu, Mûrungu nî areraga nyoni iu. Buî bûrî ba gîtûmi gîkînene nkûrûki ya nyoni! 25Nî ûrîkû weenu ûûmba gûciongeera ntukû îmwe kîrî ûtûûro bwaawe nîûntû bwa ûrîa aithangîkîtie? 26Rîu këethîra buî bûtîûmba kûthithia gantû kaniini ta kau rî, nîmbi îtûmaga bwithangîkia na mantû jau jangî? 27#1Ane 10.4-7; 2Ma 9.3-6 Raithîrieni ûrîa maûa jaumaga. Jatîritaga ngûgî kana jatuma nguû. Îndî ndîbwîra kinya Solomoni ûrîa waarî na mwago jûmûnene ateekîra nguû inthongi ta îuwa rîmwe rîa jau. 28Këethîra Mûrungu nî athongomagia matî ja kîthaka, jarîa jaumaga naarua na rûûjû jakooma rî, agatûma bwîkîra nguû inthongi atîa, îbuî antû ba wîtîkio bûbûkai! 29Bûkaithangîkieni bûgîciûragia nîmbi bûkaarîa kana bûnyua. 30Nîkwîthîrwa mîgongo îngî yonthe ithangîkagîria mantû jau; îndî Abaagu weenu nî aijî kîrîa bûrî na ûbatu bwaakîo. 31Îndî buî ambeeni bûcwee Ûnene bwa Mûrungu na akabûaa into biu bingî bionthe bûrî na ûbatu bwaabio.

Ûtonga bûrîa Mûrungu abwîkîrîte îgûrû

(Mat 6.19-21)

32“Bûgakîreni buî antû babakai, nîûntû Abaagu weenu nî oonete kwagîrîte kûbûnenkera Ûnene. 33Endieni into bieenu bionthe na bûteethagie nkîa. Îkageni ûtonga bweenu Îgûrû arîa aamba batîûmba kwiya kana bûthûkangua nî nungu. 34Nîkwîthîrwa arîa ûtonga bwaaku bûrî, nîo kinya nkoro yaaku îkeethîrwa îrî.

Nthûûmba îmenyerete mantû jaayo bwega.

35 # Mat 25.1-13 “Karageni bwithuranîrîte na bûkarage na taawa cieenu îgîakanaga, 36#Mar 13.34-36 bûkare ta nthûûmba cietereete mûnene waacio aumîte kîathoone kîa mûranû. Nîkenda rîrîa akaringaringa bamûrugûrîra ntûti. 37Nthûûmba irîa mûnene akeethîra itîmami rîrîa agacoka, nî itharimi. Ndîbwîra na mma atî mûnene ûu akaithuranîra na arîjanîrie biakûrîa nacio. 38Akëeja kwîja ûtukû gatîgatî, kana nchamba ya ngûkû îkîgamba na akethîra itîmami, nthûûmba iu nî intharime. 39#Mat 24.43-44 Îndî menyeni atî, këethîra mwene nyomba nî ethagîrwa aijî thaa irîa mwamba akeeja, atîreka nyomba yaawe yuunwa. 40Kinya buî karageni bwithuranîrîte, tontû Mûtaana wa Muntû akeeja rîrîa bûtîmwîrîgîrîte.”

Nthûûmba ya gwîtîkua na nthûûmba îrîa îtîûûmba gwîtîkua

(Mat 24.45-51)

41Peterû aramwîra, “Mwathani, nî tuî ûkwaa ngerekano îîjî kana nî antû bonthe?” 42Jesû arauga, “Nthûûmba ya gwîtîkua na înjûme nî îrîa mwathi waayo anenkagîra mûciî jwaawe îjûmenyeera na îejaga antû barîa barî ku irio thaa irîa ciagîrîte. 43Nthûûmba îrîa îkeethîrwa îkîthithagia ûu rîrîa mwathi waayo akeeja nî îtharimi. 44Nî mma akaethia nthûûmba îîu mûrûngamîîri wa into biaawe bionthe. 45Îndî nthûûmba îîu îkëeja gûciîra yongwa, ‘Mwathi waakwa agakara îgiita rîrîraaja atîracoka,’ na îkaambîrîria kûûra nthûûmba irîa ingî na kûrîa na kûnyua na kwogita, 46mwathi waayo agacoka rîrîa îtîmwîrîgîrîte na amîkanûkie na amîgere kûrîa barîa batîathîkaga bageragwa. 47Îndî nthûûmba îrîa ijî ûrîa mwathi waayo eendaga îndî îkeethîrwa îtithuranîrîte na îtîthithîtie ûrîa mwathi waayo endaga, nthûûmba îîu îkaûûrwa ibooko bibingî. 48Îndî nthûûmba îrîa îtaamenyere ûrîa mwathi waayo eendaga, na îrathithia mantû jatîbui îkaûûrwa ibooko bibikai. O muntû ûrîa weei na wingî, nîu akeerîgîrwa kwejana na wingî; na muntû ûrîa weei na wingî nkûrûki, nîu akeerîgîrwa kweejana na wingî nkûrûki.

Jesû ateejîre kûreeta thîîrî

(Mat 10.34-36)

49“Ndeejîre kûmuntia nthîgûrû mwanki na ndîngîgwîrua mono kwîthîra mwanki jûu jwambîrîtie gwakana! 50#Mar 10.38 Nî mbeteereete kûbatithua na nî nkûthangîka mono mwanka rîrîa ntukû ya kûbatithua kûu îgakûrûka. 51Bûrîthûgaania mbîjîte kûreeta thîîrî nthîgûrû? Ndîbwîra, nteejîre kûreeta thîîrî nthîgûrû, îndî ndeejîre gûtûma antû baathûkana. 52Kwambîrîria nandî antû bataano ba mûciî jûmwe bakaathûkana; bathatû bagwatanîre bambîrîrie kûrwaa na bau bangî baîrî na bau baîrî barwee na bau bangî bathatû. 53#Mik 7.6 Îthe akarwaa na mûtaana waawe na mûtaana arwee na îthe; ng'ina akarwaa na mwarî waawe na mwarî arwee na ng'ina; ng'ina wa nthaka akarwaa na mûka wa mûtaana waawe na mûka wa mûtaana arwee na ng'ina wa nthaka.”

Gûcîûra mantû jarîa jagûkarîka îgiita rîrî

(Mat 16.2-3)

54Ningî Jesû areera kîrîndî, “Rîrîa bwonaga matu jaumîte bwa rûgûrû buugaga, ‘Ngai îkaura,’ na nî mma îkaura. 55Rîrîa ruuo rurutanaga kuuma bwa ûmotho buugaga, ‘No mwanka kware mono,’ na gûgakara u. 56Îbuî aciayia baba! Buî nî bwîjî gûciûra ûrîa gûgakara bwaraithîîria ûrîa matu na nthî îkwonekana îkari. Nîmbi îndî îkûgiria bûûmba gûciûra mantû jarîa jagûkarîka îgiiteene rîrî?”

Rîîkania na mûnthû waaku mbere ya bwîta kootini

(Mat 5.25-26)

57“Nîmbi îgiragia bûmenya mantû ja mma, jarîa jaagîrîte kûthithagua? 58Gûkëethîrwa kûrî muntû ûkûthitangîte, bwabua bûkaiganua na bûkathiria mantû mbere ya bûkinya kootini. Bûkëeja gûkinya kootini ûkagiitîrwa îgamba na asikarî bagwîkie ncheera. 59Ndîkwîra na mma ûtiuma ncheera mwanka rîrîa ûkarîa baini îrîa ûrîngî yonthe.”

Currently Selected:

Luk 12: KIMERUBIBLE

Highlight

Copy