Luk 10
10
Jesû gûtûma aritwa mîrongo mûgwanja na baîrî
1Mwathani akûthiria kuuga ûu arathuura antû bangî mîrongo mûgwanja na baîrî. Arabatûma baîrî baîrî beeta ntûûreene cionthe na gûntû kunthe, kûrîa eerîgîîrîte gwîta. 2#Mat 9.37-38 Akîbatûma arabeera atîrî, “Maketha nî jamaingî îndî akethi nî babakai. Tontû bûû, rombeni mwene maketha nîkenda agatûma akethi muundeene jwaawe. 3#Mat 10.16 Nandî îteeni, ndabûtûma bûkari ta ng'ondu gatîgatî ka mbawa. 4#Mat 10.7-14; Mar 6.8-11; Luk 9.3-5 Bûgákamata kîbeeti kana kîondo, kana iraatû. Ningî bûgákeethia muntû kinya ûrîkû njîreene. 5Nyomba îrîa bûgatonya, ambenî buuge, ‘Thîîrî nî îkare nyomba îîjî!’ 6Këethîra kûrî muntû wendeete thîîrî ku, thîîrî îîu îgakara nawe, îndî këethîra gûtî we, thîîrî îîu îkabûcokera. 7#1Ako 9.14; 1Tim 5.18 Kareni nyomba îîu, bûkîrîjaga na kûnyua birîa bakabûnenkera. Nîkwîthîrwa gûtî mûriti ngûgî ûtîbuîrîte kûewa mûchaara jwaawe. Bûgákara bûgîtangatangaga kuuma nyomba îmwe mwanka îngî. 8Rîrîa bûgakûrûka ntûûreene na bûgwatwe ûgeni, rîjageni kîrîa bakabûrûmia. 9Oragieni barîa baajîtue na bûbeerage, ‘Ûnene bwa Mûrungu bûkwîja akuî naabuî.’ 10#Maj 13.51 Îndî bwakûrûka ntûûra na, yarega kûbûgwata ûgenî, îtanieni na njîra ciaayo bûkiugaga, 11‘Kinya tîîri ya ntûûra yeenu îrîa îkûgwete magûrû jeetû tûkûmîringaringa nîkenda îkaa ûkûûjî kîrî buî na îbûgambithie. Îndî amwe na bûu, menyeni atî Ûnene bwa Mûrungu bûrî akuî kwîja!’ 12#Kîam 19.24-28; Mat 11.24; 10.15 Ndîbwîra na mma atîrî, ntûkû îrîa Mûrungu akagambithia antû, akaigîîrua ntûûra ya Sodomu kîaao nkûrûki ya ntûûra îîu.”
Jesû kûrîrîra ntûûra irîa ciaregere kwirira
(Mat 11.20-24)
13 #
Isa 23.1-18; Ezek 26.1—28.26; Joe 3.4-8; Amo 1.9-10; Zek 9.2-4 “Wûûi kîrî gwe Korazini! Wûûi kîrî gwe Bethisaida! Këethîra biama birîa biaringîrwe kîrî buî nî biaringîrwe Tiro na Sidoni, antû bau barîngî kwîthîrwa bairirîre tene, bekîrîte mathango na baciakîte mûju. 14Îndî ntukû ya îgamba yakinya Mûrungu akaigîrua ntûûra ya Tiro na Sidoni kîaao nkûrûki ya baabuî. 15#Isa 14.13-15 Naagwe Kaperinaumu ka ûgûciimbaimbia ûkîthûgaanagia ûgakumua mwanka îgûrû? Ûkageerwa mwankiine jwa kenya na kenya.” 16#Mat 10.40; Mar 9.37; Luk 9.48; Joh 13.20 Jesû areera aritwa baawe atîrî, “Muntû wonthe ûrîa ûkabûthikîîra, nî ni akûthikîîra. Ningî muntû ûrîa ûkabûrega nî ni akûrega, na ûrîa ûkandega, nî ûrîa waantûmîre akûrega.”
Aritwa barîa mîrongo mûgwanja na baîrî gûcoka
17Aritwa barîa mîrongo mûgwanja na baîrî nî baacokere bagwîrîtue mono bakiugaga, “Mwathani, kinya roho inthûûku nî iratwathîkîîre rîrîa tûraciîngîre tûgîtumagîra riîtwa rîaaku.” 18Jesû arabeera, “Nî ndîronere Nkoma akîgwa ta rweni kuuma îgûrû. 19#Zab 91.13 Nî mbûeete inya ya gûkinyanga njoka na tûng'aurî, na ndaabûaa inya ya gûciinda mainya jonthe ya mûnthû. Gûtî gîntû kinya kîrîkû gîkabwîkîra ngûma. 20Îndî amwe na bûu bûkagwîrueni nîûntû roho inthûûku nî ikûbwathîkîra, îndî gwîrueni nîûntû mariîtwa jeenu nî jaandîki îgûrû.”
Jesû gûcokeria Mûrungu nkaatho
(Mat 11.25-27; 13.16-17)
21Kagiiita o kau Jesû oojûrîtwe nî Roho Ûmûtheru, aragwîrua na arauga, “Nî ngûgûcokeria nkaatho gwe Baaba, Mwathani wa îgûrû na nthî, nîkwîthîrwa nî withîte mantû jaja jatîkamenyekane nî barîa boome na barîa boombaga gûciûra mantû, na wajaguûrîra nkenke. Baaba, ûu nîu weendaga gûkarîke.
22 #
Joh 3.35; 10.15 “Nî nenkeri into bionthe nî Baaba. Gûtî we wiijî Mûtaana nûû tiga Îthe, na gûtî we wiijî Îthe nûû tiga Mûtaana na barîa mûtaana amenyithagia Îthe nûû.”
23Rîu araraithîria aritwa baawe na arabeera barî bonka, “Buî nî bûtharimi nîûntû bwa kwona mantû jarîa bûkwona! 24Nî mma iroria na anene babaingî nî beendeete kwona mantû jarîa bûkwona, îndî bataajonere, na nî beendeete kwigua mantû jarîa bûkwigua, îndî batajaigîrue.”
Ngerekano ya Mûsamaria ûmwega
25 #
Mat 22.35-40; Mar 12.28-34 Mûritani ûmwe wa Waatho nî aairitîre na arooria Jesû kîûria gîkî akîmûgeria, “Mûritani, nîatîa mbuîri kûthithia nîkenda mbona ûtûûro bwa kenya na kenya?” 26Jesû aramûûria, “Maandîko jaugaga atîa? Wajathoma wigagua jakiuga atîa?” 27#Ala 19.18; Kûr 6.5 Nawe arauga atîrî, “Endaga Mwathani Mûrungu waaku na nkoro yaaku yonthe, na mwoyo jwaaku junthe, na inya yaaku yonthe, na mathûgaanio jaaku jonthe. Ningî weende mûtûûri waaku o ta ûrîa ûciendeete gwengwa.” 28#Ala 18.5 Jesû aramwîra, “Ûgûcokia ûrîa kwagîrîte. Thithagia ûu, na ûgatûûra.” 29Îndî akîenda gûcieethia ûmwega arooria Jesû, “A mûtûûri waakwa nûû?” 30Jesû aramûcokeria, “Kûrî muntû ûmwe weenamîte Jeriko, aumîte Jerusalemu. Nî aatirimanîre na aamba, nabo baramûrita nguû na baramûtutuma na baramûtuunya into bionthe birîa aarî nabio, na baramûtiga arî akuî gûkua. 31Mûthînjîri-Mûrungu ûmwe nî eenamîrîte njîreene îîu, na akûmwona arakûrûkîîra rûteere rûrîa rûngî rwa njîra. 32Ningî o ûu Mûlawi ûmwe nî eenamîrîte njîreene îîu, na agûkinya au muntû ûu aarî, aramûtega îndî arakûrûkîîra rûteere rûrîa rûngî rwa njîra. 33#2Ma 28.15 Îndî Mûsamaria ûmwe arî rûgendoone, agûkinya au muntû ûu aarî nî aamwonere na aramwigîîrua kîaao. 34Nî eetîre arîa aarî na areetûrîria ironda maguta na ndibei na arabioga na itambaa. Rîu aramwitithia ntigiriine na aramwikia mûkaweene, na aramûmenyeera. 35Rûûneene Mûsamaria ûu aranenkera mwene mûkawa denari ijîîrî na aramwîra, ‘Menyagîîra muntû ûûjû, na akeeja gûtumîra mbeecha inyingî nkûrûki ya iu, ngakûrîaa ngîcoka.’” 36Jesû arooria mûritani ûu atîrî, “Nî ûrîkû kîrî antû bau bo-bathatû woonanîrie arî mûtûûri wa muntû ûu waaûri nî aamba?” 37Mûritani ûu wa Waatho aramûcokeria, “Nî muntû ûrîa waamwigîîrue kîaao.” Jesû aramwîra, “Îta na ûthithagie o ta ûu.”
Jesû kûriûngîra Mariitha na Maria
38 #
Joh 11.1
Rîrîa Jesû na aritwa baawe beetîte ntûûreene îmwe, Mariitha nî aamûgwatîre ûgeni nyomba yaawe. 39Mariitha nî aarî na mwarî wa ng'ina weetagwa Maria. Nawe Maria arakara nthî akuî na magûrû ja Jesû amûthikîîrîtie akîritana. 40Îndî Mariitha nî aithangîîkagia na ngûgî cionthe cia kûmathîra ageni. Rîu areeta kîrî Jesû na aramwîra, “Mwathani, ka ûtîkûûria woona mwarî wa chiaa antiganîritie maathîra ageni ndî ninka? Mwîre eeje anteethie.” 41Îndî Mwathani aramûcokeria atîrî, “Mariitha, Mariitha, nî winogeetie na waithangîkia na mantû jamaingî. 42Nî ûntû bûmwe bunka bûrî na bata, na Maria nî aithuurîre ûntû bûu na atîûmba gûtunywa bu.”
Currently Selected:
Luk 10: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
