Maj 1
1
1 #
Luk 1.1-4
Kîrî Theofilo,
Yukuune rîa mbere, nî ndaandîkîre mantû jonthe jarîa Jesû aathithîrie na jarîa aaritanîre, 2mwanka rîrîa aitithîrue îgûrû. Mbere ya aitithua îgûrû nî aarî akwarîria atûmwa barîa aathuurîte oojûrîtwe nî Roho Ûmûtheru. 3Jesû akûriûka nî aacionanîrie kîrî atûmwa baawe kagiita ga ntukû mîrongo îna, na araritana mantû jegiî Ûnene bwa Mûrungu, nîkenda bamenya buru atî arî mwoyo. 4#Luk 24.49 Rîrîa boothûranîte amwe nî aabeerîre ûjû, “Bûkáuma Jerusalemu, îndî eteereni kîewa kîrîa Baaba eeranîrîte, nakîo nî kîrîa bwaigîrue nkîaria mantû jaakîo. 5#Mat 3.11; Mar 1.8; Luk 3.16; Joh 1.33 Nîkwîthîrwa Johana aabatithanagia na rûûjî, îndî nyuma ya ntukû inkai, buî bûkabatithua na Roho Ûmûtheru.”
Jesû gwitia îgûrû
6Rîrîa atûmwa baacemanîtie amwe na Jesû, nî baamûûrîrie, “Mwathani, îgiita rîrî nîrîo ûgacokeria Aisraeli ûnene bwaao kaîrî?” 7Îndî Jesû arabeera, “Gûtî gîtûmi gîa kwenda kûmenya, nîûntû îgiita kana kiingo kîa mantû jaja nî Baaba wenka ûtuîte kûringana na Waatho bwaawe. 8#Mat 28.19; Mar 16.15; Luk 24.47-48 Îndî rîrîa Roho Ûmûtheru akeeja kîrî buî bûkagwata inya, naabuî bwee akûûjî baakwa Jerusalemu, na Judea na Samaria na nthîgûrû yonthe.” 9#Mar 16.19; Luk 24.50-51 Akuuga ûu, araitia îgûrû bonthe bamûtegeete na îtu rîramwitha batîmwoone kaîrî.
10Bategeete îgûrû, baroona antû baîrî beekîrîte nguû injerû barabaumîîra ntûti na bararûngama akuî nabo barabeera, 11“Antû ba Galili, nîmbi îtûmîte bûrûngama aja bûtegeete îgûrû? Jesû ûûjû wajûkua kuuma kîrî buî aitia îgûrû, agacoka kaîrî o ûu bwona aitia îgûrû.”
Mathia kûthuurwa ajûkia kaanya ka Judasi
12Rîu atûmwa baracoka Jerusalemu kuuma kîrîmeene kîa Mîzeituni, kîrîa kîaarî ta kilomita îmwe kuuma ntûûreene. 13#Mat 10.2-4; Mar 3.16-19; Luk 6.14-16 Rîrîa baakinyîre ntûûreene, baraitia ngorobeene na barakûrûka nyomba îrîa baakaraga. Atûmwa bau baarî baba: Peterû, na Johana, na Jakubu, na Anderea, na Filipû na Toma, na Batholomeo na Mathayo, na Jakubu mûtaana wa Alifayo, na Simioni ûrîa Zeloti, na Juda mûtaana wa Jakubu. 14Bau bonthe amwe na eekûrû bamwe na kinya Maria ng'ina wa Jesû na ataana ba ng'ina ba Jesû nî baarombaga barî amwe.
15Nyuma ya ntukû inkai, barîa beetîkîtie nî baacemanîrie. Antû bau baarî îgana rîa mîrongo îîrî (120). Peterû nî aarûngamîre mbere yaao arauga, 16“Ataana na aarî ba baaba, kwaarî no mwanka Maandîko joojûre, jarîa Roho Ûmûtheru aatûmîre Daudi aarîa jegiî Judasi ûrîa waatongeererie antû barîa baagwatîre Jesû. 17Judasi aarî ûmwe weetû, ûrîa waathuuri arita ngûgî amwe naatuî. 18#Mat 27.3-8 (Nî aagûrîre muunda na mbeecha irîa oonere irî îrîi rîa ûthûûku bwaawe na aragwa nthî, na kîu kîaawe kîratambûka mara jaraumîra. 19Gûtî muntû ûtûûraga Jerusalemu ûtaigua ûntû bûbû. Tontû bûû, antû beetaga muunda jûu na rûthiomi rwaao Akelidama, ûu nî kuuga ‘Munda jwa tharike.’)
20 #
Zab 69.25; 109.8 Nîkwîthîrwa nî kwaandîki yukuune rîa Zaburi ûjû,
‘Nyomba yaawe nî îtigwe îrî întheri;
gûkágîta muntû ûtûûra ku.’
Kaîrî nî kwaandîki:
‘Muntû ûngî nî ajûkie kaanya kaawe kûrîa aritaga ngûgî.’
21“Tontû bûû, nî tûthuure muntû ûmwe ûrîa waarî amwe naatuî kuuma rîrîa Jesû aarî aja nthîgûrû, 22#Mat 3.16; Mar 1.9; 16.19; Luk 3.21; 24.51 kwambîrîria rîrîa Johana aabatithanagia mwanka ntukû îrîa Jesû aitithîrue îgûrû. Ûu akaa ûmwe weetû wa gûkûûjîîra atî Jesû nî aariûkîre.”
23Rîu baragweta mariîtwa ja antû baîrî; wa mbere aarî Josefu ûrîa weetagwa Baasaba (Kana riîtwa rîngî Jastasi), na wa baîrî aarî Mathia. 24Nabo bararomba ûjû, “Mwathani, gwe nî wiijî nkoro cia antû bonthe. Tontû bûû, twonie nî ûrîkû kîrî baba bobaîrî ûthuurîte 25nîkenda ajûkia kaanya ka Judasi, arita ngûgî ya ûtûmwa, îrîa Judasi aatiganîre nayo.” 26Rîu bararinga kuura na kuura îragwîrîra Mathia, araa ûmwe wa gîkundi kîa atûmwa barîa îkûmi na ûmwe.
Currently Selected:
Maj 1: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
