LIRAANGA 6
6
Vwoni vwa Vandu Vakhola
1Lwa vandu varaanga khwivulana nivashila mu vunyishi muno mu shivala, vivula khandi vaana vi shikhana; 2vaana vi shiyayi va Nyasaye valola vaana vi shikhana venavo vali ni likoondo lilahi, nivarovola khuvahila. 3Mwami Nyasaye yavoola, “Shimbuchililakhu vandu vatsililile khuva mwoyo mihika ni mihika tawe. Valiitsa khukhutsa. Khuraanjila nunundi khutsililila imbeli, valiitsa khuvula khumenya khuvira mihika imia indala na makhomi kavili.” 4Mumatukhu kenako, khali kaliho, khwali ni mindu mikali miraambi chi tsingulu mu shivala nichili vitsukhulu va vaana vi shiyayi va Nyasaye nende vaana vi shikhana va vandu. Mindu chienecho chiali chiamanyikhana, khandi chiali chiaheelwa luyali mumatukhu kenako; nachio chialaangwa Nefili.
5Lwa Mwami Nyasaye yalola vwoni vwa vandu nu vunyishi muno mu shivala, khandi mundu ali ninganakani yu khukhola vutamanu khumatukhu koosi, 6Mwami Nyasaye yavelela mu mwoyo amanyakhu, khani shiyakhalombi mundu nu khumuvikha mu shivala tawe. Mwami Nyasaye yasalila vutiinyu mu mwoyo kwekwe, 7navoola, “Niitsa khutivitsa mundu, wa inzi mwene naloonga khurula khulilova khunu; niitsa khumulula tsinyama tsiumbulimu, vilombe vimolanga nende manyonyi. Mbelele mu mwoyo manyakhu khali shinakhavilombi mu shivala tawe.” 8Navutswa Nuhu yanyola tsikhaavi imbeli wu Mwami Nyasaye.
Nuhu Yumbakha Liaro
9Yaka nako makhuva kahandikwa khulondokhana khu Nuhu. Nuhu yali mundu mu suuvilwa mumatukhu koosi ka yali nashili mwoyo. Yali wamenya nasaalanga khu Nyasaye. 10Nuhu yivula vaana vi shiyayi vavaka nivali Shemu, Hamu, nende Yafetsa. 11Vandu vakhola vwoni imbeli wa Nyasaye, nivava vatamanu muno. 12Nyasaye yahenza mu shivala, nalola ni shitamanu muno, shichila vandu voosi vamenyanga limenya liu khukhola vutamanu.
13Nyasaye yavoolela Nuhu, “Mali khuviritsa, nzitsanga khumulula vandu voosi mu shivala; shichila vutamanu nu vunyishi muno mu shivala khuvirila muvo. Nzitsanga khuvamulula vo voosi nende shivala. 14Khulwa yako, nzumbashili liaro khurula khu musala mulahi; uremu viiko khandi uveshe ilaamu mukari nende ilwanyi. 15Lilombe live nu vuraambi tsimita 133, vukalamu tsimita 22, khutsia ikulu nu vulunji vuve tsimita 13. 16Lomba liaro lienelo live ving'otso viachelekhana vivaka; khandi live nu muliango mulala mumbeka. Mwivale vwiyangu vwi tsisentimita 44 hakari hi shisechese nende mu tsimbeka. 17Nzitsanga khulera michelelo chia matsi mu shivala, khumulula vilombe viosi vili mwoyo. Vindu viosi vili mu shivala viliitsa khukhutsa. 18Navutswa nalomba lilakano nivi. Yinjila mu liaro halala nu mukhali wowo, vaana vovo vi shiyayi, nende vakhali vavo. 19Kenyekhanga winjilitsi mu liaro shia vilombe lukanu lwosi, vi shisatsa nende vi shikhali, khuvilomba vive mwoyo nivi. 20Ulinjilitsa manyonyi khulondokhana khutsikavila tsiako, tsinyama khulondokhana khutsikavila tsiatsio, khandi shia shilombe khulondokhana nikavila yashio, khuvilomba vive mwoyo. 21Khutukha winjilimu khandi ni shiukhulia lukanu lundi lwosi shiukhulia; khandi uremu shia imu yosi yu khulia; shiliitsa khuva shiukhulia shioshio nende shiatsio.” 22Nuhu yakhola vutswa, khuli Nyasaye yali namuvoolele akhole.
Currently Selected:
LIRAANGA 6: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013