ROMANIK 13
13
Agobo kasetab it ne kigase it bounik
1Ingogas it chi tugul bounatosiek che eechen: amu mami bounato, kobate ne bunu Jehovah; ak kiindoi Jehovah choto mitei. 2Noto anyun inendet ne kirindoi bounatet, kobistoe ng’atutietab Jehovah: ak ichek che bistoe kocheng’jingei kiruoget. 3Amu ma bo bounik kamuiset eng’ boisionik che miach, ago eng’ che yaach. Ak tos meiywei bounatet? Yai ne mie, si inyoru kalosunet eng’ noto; 4amu inendet ko kiboitiotab Jehovah eng’ inye, ne yaei ne mie. Ago ngiyai ne ya, iywei; amu maiboti rotwetab chok buch: amu inendet ko kiboitiotab Jehovah, yaaktaindetab mugetut agobo neregek eng’ inendet ne yaei yaitio. 5Noto anyun kanyol ogas it, ma amu neregek kityo, ago amu kabwatet agine.
6Amu ng’olyondonito anyun ogoitoi aisurut agine; amu icheget ko kiboitinikab boisietab Jehovah, che igiiljingei kotugul kioto. 7Ogochi tugul tuguk che nyoljin: kodi eng’ inendet ne nyoljin kodi; aisurut eng’ inendet ne nyoljin aisurut; kaiyweisiet eng’ inendet ne nyoljin kaiyweisiet; teegisto eng’ inendet ne nyoljin teegisto.
Chamnyetab che tupcho
8Amobesen chi kiy age tugul, ago ochamnye: amu inendet ne chamei chitab kokwennyi ko kagoyai kosulda Ng’atutiet. 9Amu eng’ mwaonato kimwaei kele, Amoipge, Amerumisie, Amechorse, Amegase miat kiy ne bo chi, ago ngo mi ng’atutiet age, kiyumi tugul eng’ ng’olyondoni, kele, Cham chitab kokweng’ung’ ko u ole ichamdoige. 10Mayachin chamnyet kiy ne ya chitab kokwennyi: noto anyun chamnyet ko kasuldaetab Ng’atutiet.
Kagorik Betutab Kristo
11Ak anyun, ongen betusiek, ole kagoit sait ne kanyol ogosu eng’ ruondo: amu kagorikyech nguno yetunet kosiir ye kingiyan eng’ tai. 12Negit kosiirto kemout, karik betut; noto anyun ongireegu boisionikab mesundeito, ak ongilaach karikab lapkeiyet. 13Ongebendoti ko u ye nyolu, ko u bet; ma eng’ wasang’natet anan bogitet, ma eng’ sokset anan maget ne ya, ma eng’ boriet ak ng’etkong’. 14Ago olach Kiptaiyat Jesu Kristo, amochopchi borto boroindo, si oyai magutikyik.
Currently Selected:
ROMANIK 13: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
