LUKA 13
13
Kigiili bik kosik
1Kimi bik alage eng’ betusiechoto che kimwachi inendet agobo Galilik, che kiburuch Pilato korotikwak ak tiseiywekwak. 2Ak kowolji kolenji, Tos olen ki kiptengeginik bichoto bo Galili kosiir Galilik tugul, amu kinyor nyalilwogichu? 3Amwawok ale, Achicha: ago, ngot ko mosigu okwek, olustosi okwek tugul ko u noto. 4Anan choto taman ak sisiit, che kisieb got ne koi ne bo Siloam, ak kobar, tos olen ki kiptengeginik kosiir bik tugul che kimenyei Jerusalem? 5Amwawok ale, Achicha: ago, ngot ko mosigu ak okwek, olustosi tugul ko u noto.
Kalewenet agobo mogoiywet ne ma yiei kiy
6Ak kimwa kalewenoni, kolenji, Kimi chito age ne kitinyei mogoiywet ne kiga minji mbarennyi ne bo sabibuk; ak kinyo kocheng’ logoekab ketoto, amanyorji kiy. 7Kolenji ribindetab mbaretab sabibuk, Keero, kenyini ko ne bo somok anyone acheng’e logoek eng’ mogoiywoni amanyorune kiy: eb kolul; amu nee si koamei ng’ung’unyek buch? 8Ak kiwolji kolenji, Kiptaiyandani, ingotebi kenyini agine, si kota asemberji ak ande ng’atatek: 9ak ngo ii logoek kong’eete nguno, ko mie; ak ngo maii, ieb anyun kolul.
Kobogoriot ne kigisoob eng’ betuutab sabato
10Ak kiinetisiei eng’ sunagogit age eng’ betutab sabato. 11Ak ogeero, kobogoriot age ne kitinyei tamirmiriet ne bo nyalulet kenyisiek taman ak sisiit; ak kigarigak, ak kima kota komuchi kochuulgei agot kitigin. 12Ak kingogeer Jesu inendet, koguur ak kolenji, Kobogoriondoni, kagitiachin eng’ nyaluleng’ung’. 13Ak kiigonoor eunekyik inendet: kochuulak ngunoto, ak kolos Jehovah. 14Kinerech anyun bounindetab sunagogit, amu kiisoob Jesu chito eng’ betutab sabato, ak komwachi tuiyet kolenji, Mitei betusiek lo che nyolu koboisie bik: obwa anyun eng’ betusiechoto si kisoobok, ama eng’ betutab sabato.
15Ago kiwolji Kiptaiyat, kolenji, Okwek chombilik, tos mayatei age tugul eng’ okwek eitanyi anan sigiriennyi eng’ bii eng’ betutab sabato, ak kokweri koee beek? 16Ak kobogoriondoni, ne cheptab Abraham, ne kigorat Setani kenyisiechu taman ak sisiit, tos manyol kitiach eng’ ratutioni eng’ betutab sabato? 17Ak ye kingota komwaei tuguchu, kolilanso bunikyik tugul: ago kiboiboitu tuiyet komugul agobo tuguk che tororen che kiyaei inendet.
Kalewenaik agobo karadali ak agobo mermerek
18Kimwa anyun, kole, Kergei bounatetab Jehovah ak nee? Ak tos aroge nee? 19Kergei ak keswotab karadali, ne kinam chito, ak kominji mbarennyi; ak kibit, agoi koek ketit; ak kitebe taritik che bo barak temenikyik.
20Ak kimwa kogeny kole, Aroge nee bounatetab Jehovah? 21Kergei ak mermerek, che kinam kobogoriot, ak koburukto busiek che bo kitongok somok, agoi kogut tugul.
Mariich ole kebunei kebendi sobondo
22Ak kibunot nganasok che eechen ak che mengech, konetisioti, kobunei oret ne wendi Jerusalem. 23Ak kilenji chito age, Kiptaiyandani, tos ng’ering’ che tun kisoru? Ak kilenji, 24Ogiilge obun kurget ne mariich: amu amwawok ale, cheng’ei tun che chang’ kobun yoto, ago matun imuchi. 25Ak ye tun kang’eet chitab kobo got, ak koger kurget, ak otau anyun otononse eng’ sang’, ak ogongony kurget, ole, Kiptaiyandani, yatwech; ak kowolwok inendet kole, Mangenok, ak ole obunu; 26otau anyun ole, Kigiamisiei ak kigiee eng’ taing’ung’, ak kiinetisiei eng’ ortinwekyok; 27ak tun mwaei kole, Mangen ole obunu; oba eng’ ane, okwek tugul yaikab tengek. 28Koek anyun rirek ak nyeetab kelek, ye tun ogeer Agraham, ak Isak, ak Jakobo, ak maotik tugul, eng’ bounatetab Jehovah, ak kewirjok okweget sang’. 29Ak tun bwanei kobunu kong’asis ak cherongo, ak murot ne bo katam ak murot ne bo tai, ak koteb ng’ony koamis eng’ bounatetab Jehovah. 30Ak ogeero, mi che bo let che tun egu che bo tai, ak mitei che bo tai che tun egu che bo let.
Bunyondit ne bo Herod
31Kibwa Parisaik alak eng’ sainato, ak kolenji, Ng’eet mande, ui eng’ oli: amu machei kobarin Herod. 32Ak kilenji ichek, Oba omwachi lelwandonoto, olenji, Keero, aone oik ak asoobi bik rani ak mutai, ak eng’ betutab somok abegechi. 33Ago kanyol awo bandanyu rani ak mutai ak betut ne bo somok: amu manyoljin komechi maotiondo oldo age kobate Jerusalem.
Rirek agobo Jerusalem
34Ee, Jerusalem, Jerusalem, inye ne ibare maotik, ak ilage koik che kiyogun! Kiamach konyil ata ayum lagoguk, ko u ngogiet ne iyumjin arekyik kebebaikyik, ago kima ocham! 35Ogeero, kagebagakwok gong’wong’ koek kipkubere: ak amwawok ale, Maogeera, agoi tun ole, Iberurot ne nyonei eng’ kainetab Kiptaiyat.
Currently Selected:
LUKA 13: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
